Popular Bible Verses from ᤔᤳᤋᤡ 6

Share

ᤁᤖ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤈᤢᤶ ᤏᤢ ᤁᤢᤛᤠᤶᤕᤥᤏᤡᤔᤠᤴ ᤁᤥ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ ᤁᤧᤒᤡᤖᤡ᤹ᤖᤥ॥

ᤂᤧᤸᤗᤧᤆᤥᤃᤢᤸᤗᤧ ᤋᤠ᤺ᤴᤍᤡᤰ ᤌᤣ ᤐᤥᤱ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰᤐᤠ ᤋᤢᤰᤂᤣᤴ ᤋᤠ᤺ᤴᤍᤡᤰᤁᤣ ᤐᤥᤱ. ᤜᤧᤰᤁᤩᤠᤱ ᤀᤠᤀᤡᤴᤒᤠ ᤋᤢᤰᤂᤣᤴ ᤀᤠᤀᤡᤴᤇᤠ ᤕᤖᤡᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”

“ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴᤏᤥ ᤌᤣ᤺ᤴ ᤆᤠᤔᤠ ᤌᤢᤱᤔᤠ ᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤴ ᤏᤠᤛᤡᤱᤃᤧᤴ ᤌᤰᤁᤥᤀᤠᤱ ᤌᤣ᤺ᤴ ᤆᤠᤱᤔᤠ ᤘᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤆᤠᤔᤠ ᤌᤢᤱᤔᤠᤏᤢ᤺ᤸᤗᤧ ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤴ ᤆᤠᤱᤔᤠ ᤘᤠ᤺ᤵᤔᤠᤏᤢ᤺ᤸᤗᤧ ᤏᤢᤒᤠ ᤔᤧᤈᤥ᤺ᤰᤏᤧᤴᤒᤡ᥅

ᤁᤖ ᤂᤧᤏᤧ᤹ ᤋᤢᤘᤠ ᤁᤧᤈᤥᤃᤢᤸᤗᤧ ᤁᤧᤜᤡᤶᤗᤰᤛᤡᤱ ᤛᤡᤃᤠᤱ ᤗᤠᤛᤧ᤹ᤀᤠᤱ ᤗᤠᤶᤎᤣ᤺ᤵᤐᤠᤴ ᤛᤢᤒᤧ᤹. ᤜᤧᤰᤁᤩᤠᤱ ᤏᤡᤔᤧᤴᤍᤧᤵᤔᤏᤠᤒᤠ ᤐᤠᤏᤢᤍᤡᤱ ᤁᤧᤶᤒᤠᤏᤢ ᤀᤣ᤺ᤰ ᤋᤢᤘᤠ ᤆᤥᤃᤧ᤹ᤀᤥ॥ ᤜᤧᤰᤁᤩᤠᤱ ᤛᤫᤠ᤺ᤳᤋᤠᤱ ᤆᤥ᤺ᤰᤔᤏᤠᤒᤠ ᤕᤠ᤺ᤶᤒᤰ ᤁᤧᤏᤡᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡᤖᤥ॥

“ᤂᤧᤸᤗᤧᤆᤥᤃᤢᤸᤗᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤧᤶᤔᤧ᤹ᤀᤥ— “‘ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤀᤠᤏᤡᤃᤣ ᤐᤠᤏᤢᤍᤡᤱ ᤐᤠᤀᤣ. ᤔᤏᤠᤜᤠ᤹ᤖᤧ ᤁᤧᤔᤡᤱᤅᤡᤴ ᤛᤣᤛᤣ ᤔᤧᤀᤡ᤺ᤳᤋᤢᤖ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤖᤥ॥ ᤁᤧᤜᤠᤱᤈᤢᤶᤔᤡᤴ ᤋᤠᤖᤖᤥ. ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤜᤧᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤀᤠᤱ ᤁᤧᤏᤡᤱᤘᤠ᤹ ᤁᤢᤀᤡᤛᤡ᤺ᤰᤁᤣ ᤔᤧᤈᤥᤃᤢᤖᤖᤥ॥

ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰᤐᤠ ᤁᤢᤈᤠᤴ ᤀᤠᤒᤡᤖᤧ᤹ᤀᤥ॥

ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤗᤧᤵᤔᤡ ᤐᤡᤖᤢᤶᤛᤡᤶᤒᤧᤒᤠ ᤜᤧᤰᤁᤣᤀᤣ ᤀᤠᤏᤡᤃᤣ ᤆᤥᤃᤢᤶᤒᤧᤒᤠ ᤗᤠᤕᤥᤴ ᤗᤧᤵᤔᤡ ᤀᤠᤒᤡᤖᤧ᤹ᤀᤥ॥

ᤜᤱᤛᤠ᤹ᤔᤥ ᤀᤠᤴᤎᤠᤛᤧᤴᤏᤧ᤹ᤀᤥ. ᤁᤖ ᤔᤠᤑᤧᤴᤛᤠᤶᤗᤠᤶ ᤀᤠᤛᤧ᤺ᤵᤋᤧ᤹ᤀᤥ॥ ((ᤌᤣᤀᤠᤱᤓᤧᤸᤗᤧ ᤜᤠᤱᤈᤢᤶ. ᤔᤢᤰᤛᤠᤶ ᤏᤢ ᤔᤡᤔᤡᤍᤡᤱᤅᤡᤴ ᤛᤍᤠᤍᤡᤱ ᤂᤧᤏᤧ᤹ᤀᤡᤴᤏᤣᤖᤥ॥))’

“ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤗᤧᤵᤔᤡ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤗᤧᤵᤔᤡ ᤁᤧᤒᤡᤖᤡ᤹ᤖᤥ॥

ᤐᤢᤛᤠᤜᤠ᤹ ᤀᤥᤔᤧᤳᤋᤧᤶᤛᤡᤶᤔᤧ᤹. ᤂᤧᤱᤜᤠ᤹ᤖᤧ ᤆᤠ ᤔᤧᤴᤍᤣᤛᤢᤴ ᤔᤧᤴᤇᤢᤵᤛᤢᤴ ᤜᤧᤰᤁᤩᤠᤱ ᤕᤠᤱᤔᤧᤱᤄᤥ᤺ᤳᤋᤢᤴᤇᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤐᤠ᤺ᤸᤗᤧ ᤂᤧᤱᤜᤠ᤹ ᤆᤠᤔᤠ ᤐᤡᤖᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤂᤧᤱᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤁᤧᤴᤈᤥᤃᤡᤶᤒᤡ᥅

“ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤠᤱᤛᤠᤁᤢᤴᤎᤣ ᤔᤧᤗᤢᤵᤛᤧᤴᤏᤧ᤹ᤀᤥ॥ ᤂᤧᤵᤔᤥᤃ ᤌᤰᤐᤠᤜᤠ᤹ᤖᤧ ᤔᤧᤈ᤹᤺. ᤜᤡᤱᤎᤥ᤺ᤰᤁᤡᤸᤗᤧ ᤕ᤺ᤴᤍᤢ᤹. ᤜᤧᤰᤁᤩᤠᤱ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧ ᤔᤧᤄᤢ᤺ᤳᤋᤢ᤹ᤖᤥ॥ ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤠᤱᤛᤠᤁᤢᤴᤎᤣ ᤗᤢᤵᤛᤧᤶᤔᤧ᤹ᤀᤥ॥ ᤂᤧᤵᤔᤥᤃ ᤌᤰᤐᤠᤜᤠ᤹ᤖᤧ ᤔᤧᤴᤈᤏᤧᤴ. ᤜᤡᤱᤎᤥ᤺ᤰᤁᤡᤸᤗᤧᤀᤠᤱ ᤔᤧᤕ᤺ᤳᤇᤢᤴ. ᤜᤧᤰᤁᤩᤠᤱ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧᤀᤠᤱ ᤔᤧᤴᤄᤢ᤺ᤳᤋᤢᤴᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤳᤋᤥ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤴ ᤘᤠ᤹. ᤂᤧᤵᤔᤥᤀᤣ ᤂᤡᤏᤡ᤹ ᤏᤡᤱᤘᤠ᤹ᤀᤡᤴᤏᤠᤱ ᤐᤣ᤺ᤰᤗᤥ॥

ᤀᤠᤳᤋᤡᤸᤗᤧᤀᤠᤱ ᤏᤧᤵᤑᤢ ᤍᤠᤱᤒᤠᤜᤠ᤹ ᤛᤧᤘᤠ ᤆᤥ᤺ᤰᤔᤠᤛᤡ ᤔᤧᤛᤢᤰᤋᤢᤴᤛᤡᤴᤗᤥ॥ ᤂᤧᤸᤗᤧ ᤌᤡᤰᤁᤡᤴ ᤏᤢᤖᤡᤰ ᤔᤧᤳᤋᤢ᤹ᤀᤠᤱ ᤘᤣ᤹ᤛᤔᤠ ᤆᤡ᤺ᤳᤋᤢ᤹ᤖᤥ. ᤔᤧ᤺ᤱᤃᤪ ᤌᤡᤰᤁᤡᤴ ᤀᤡᤱᤎᤠᤱ ᤐᤡᤖᤢᤀᤠᤱ ᤘᤣ᤹ᤛᤔᤠ ᤀᤡᤱᤎᤠᤱ ᤔᤧᤒᤡᤖᤢᤴᤗᤥ॥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤕᤠᤱᤛᤠᤁᤢᤴᤎᤣᤴ ᤛᤥᤛᤥᤖᤡᤰ ᤛᤧᤘᤠ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤴᤗᤥ॥”

ᤏᤛᤠᤴ ᤁᤧᤛᤢ᤺ᤶᤒᤠᤛᤣ. ᤀᤠᤀᤡᤴ ᤁᤧᤗᤡᤱᤒᤠᤀᤠᤱ ᤋᤠ᤺ᤴᤍᤡᤰ ᤔᤡᤀᤥ ᤗᤠᤵᤑᤢᤔᤠ ᤁᤧᤒᤥᤱᤒᤠ ᤕᤠᤴ ᤑᤢᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤠᤖᤡᤰ ᤏᤢᤒᤠ ᤆᤥᤃᤢᤛᤡᤸᤗᤧ ᤂᤧᤴᤏᤢ᤺ᤸᤗᤧ ᤏᤢ᤺ᤖᤡᤰᤁᤠᤱ ᤋᤣᤳ ᤂᤡᤏᤡ᤹ ᤁᤧᤴᤈᤠ᤺ᤰᤋᤡᤶᤒᤡ᥅

ᤁᤖ ᤂᤧᤏᤧ᤹ ᤔᤧᤱᤃᤵᤔᤏᤠᤒᤠᤜᤠ᤹ ᤁᤧᤒᤡᤖᤢᤛᤡᤸᤗᤧ ᤘᤣ᤹ᤜᤠ᤹ᤖᤧ ᤔᤧᤴᤏᤡᤀᤣ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤒᤡᤖᤢᤛᤡᤒᤠ ᤐᤠ᤺ᤴᤏᤡᤴ ᤛᤫᤠ᤺ᤳᤋᤠᤱ ᤐᤥᤱᤗᤖᤥ॥ ᤜᤧᤰᤁᤩᤠᤱᤗᤰ ᤛᤫᤠ᤺ᤳᤋᤠᤱ ᤁᤧᤈᤥᤃᤢᤒᤠ ᤐᤠᤴ ᤁᤧᤏᤡᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡᤖᤥ॥”

ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤀᤠᤱ ᤂᤡᤏᤡ᤹ ᤏᤠᤖᤠ ᤔᤧᤓᤥᤛᤢᤖ ᤑᤠ᤹ᤀᤠᤱ ᤔᤏᤠ ᤋᤃᤡ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤌᤣᤀᤠᤱ ᤁᤧᤱᤄᤥᤛᤢᤶᤔᤡᤴᤗᤥ॥

“ᤜᤧᤰᤁᤩᤠᤱ ᤂᤡᤏᤡ᤹ ᤆᤠᤏᤧᤳ ᤁᤧᤕᤢᤱᤅᤡᤸᤗᤧ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ ᤁᤢᤀᤡᤛᤡᤰ ᤂᤡᤏᤡ᤹ ᤏᤠ ᤔᤧᤔᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤆᤠᤏᤧᤳ ᤔᤧᤕᤢᤱᤅᤡᤸᤗᤧ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖ ᤑᤠ᤹ᤀᤠᤱ ᤂᤢᤏᤡ᤹ ᤏᤠᤖᤠᤴ ᤔᤧᤃᤡ᤺ᤴᤍᤢᤖ ᤔᤧᤕᤢᤱᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤱᤜᤠ᤹ᤖᤧᤃ ᤂᤢᤏᤡ᤹ ᤜᤠᤱᤛᤧᤶᤔᤡᤴ ᤁᤧᤖᤧᤰ ᤔᤧᤄᤥᤛᤢ ᤔᤧᤛᤢᤖᤢᤀᤠᤱ ᤔᤧᤘᤠ᤹ᤖᤥ॥ ᤁᤖ ᤂᤧᤏᤧ᤹ ᤆᤠᤏᤧᤳ ᤁᤧᤕᤢᤱᤅᤡᤸᤗᤧ ᤂᤧᤏᤧ᤹ ᤁᤧᤎᤧᤃᤣ᤺ᤰᤐᤥ ᤏᤡ᤺ᤱᤃᤣ᤹ ᤜᤢ᤺ᤳᤋᤧ᤹ᤀᤠᤱ ᤁᤧᤏᤠᤖᤠᤴ ᤘᤠᤜᤵᤋᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤆᤠᤏᤧᤳ ᤁᤧᤕᤢᤱᤒᤠᤴ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥᤛᤢᤴᤗᤖᤥ. ᤁᤖ ᤏᤡᤔᤧᤴᤍᤧᤵᤔᤏᤠᤒᤠ ᤐᤠᤏᤢᤍᤡᤱ ᤁᤧᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤏᤡᤛᤢᤖᤖᤥ॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤆᤥ᤺ᤰᤔᤏᤠᤒᤠ ᤁᤧᤏᤡᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡ᤹ᤖᤥ॥”