ᤔᤳᤋᤡ 6
6
ᤆᤠᤃᤧᤏᤠ᤺ᤰᤐᤠᤜᤠ᤹ ᤛᤫᤠ᤺ᤳᤋᤠᤱ ᤐᤡᤔᤠᤛᤡ
1ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤀᤠᤱ ᤂᤡᤏᤡ᤹ ᤏᤠᤖᤠ ᤔᤧᤓᤥᤛᤢᤖ ᤑᤠ᤹ᤀᤠᤱ ᤔᤏᤠ ᤋᤃᤡ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤌᤣᤀᤠᤱ ᤁᤧᤱᤄᤥᤛᤢᤶᤔᤡᤴᤗᤥ॥ 2ᤜᤧᤰᤁᤣᤗ᤹ᤖᤡᤰ ᤔᤧᤱᤃᤵᤔᤏᤠᤒᤠᤜᤠ᤹ ᤁᤢᤈᤠ ᤁᤧᤒᤡᤖᤢᤛᤡᤸᤗᤧ ᤘᤣ᤹ᤜᤠ᤹ᤖᤧ ᤔᤧᤄᤧᤵᤛᤢᤖ ᤔᤧᤏᤡᤛᤢᤖ ᤑᤠ᤹ᤀᤠᤱ ᤔᤢᤰᤗᤠ ᤔᤧᤔᤢᤰᤂᤧᤴᤏᤧ᤹ᤀᤥ॥ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤗᤠᤶᤗᤠᤶᤔᤥ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤏᤠᤖᤠ ᤔᤧᤓᤥᤛᤢᤖ ᤑᤠ᤹ᤀᤠᤱ ᤜᤧᤰᤁᤣ ᤔᤧᤈᤥᤃᤢ᤹॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤛᤧᤶᤔᤡᤱᤃ ᤋᤃᤡᤛᤠ ᤔᤧᤄᤥᤛᤢ ᤔᤧᤛᤢᤖᤢᤀᤠᤱ ᤔᤧᤘᤠ᤹॥ 3ᤁᤖ ᤂᤧᤏᤧ᤹ ᤔᤧᤱᤃᤵᤔᤏᤠᤒᤠᤜᤠ᤹ ᤁᤧᤒᤡᤖᤢᤛᤡᤸᤗᤧ ᤘᤣ᤹ᤜᤠ᤹ᤖᤧ ᤔᤧᤴᤏᤡᤀᤣ ᤐᤡᤖᤧᤛᤧ᤹ᤀᤥ॥#᥌:᥉ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤁᤧᤈᤢᤵᤛᤠᤱ ᤜᤢᤰᤁᤡᤸᤗᤧ ᤁᤧᤒᤡᤖᤢᤛᤡᤒᤠᤴ ᤁᤧᤓᤧᤴᤇᤠᤱ ᤜᤢᤰᤁᤡᤸᤗᤧ ᤏᤡᤱᤘᤠ᤹ ᤔᤧᤄᤥᤛᤢᤴᤗ” ᤐᤥᤱ॥ 4ᤜᤧᤰᤁᤣᤗ᤹ᤖᤡᤰ ᤁᤧᤒᤡᤖᤢᤛᤡᤒᤠ ᤐᤠ᤺ᤴᤏᤡᤴ ᤛᤫᤠ᤺ᤳᤋᤠᤱ ᤐᤥᤱᤗᤖᤥ॥ ᤜᤧᤰᤁᤩᤠᤱᤗᤰ ᤛᤫᤠ᤺ᤳᤋᤠᤱ ᤁᤧᤈᤥᤃᤢᤒᤠ ᤐᤠᤴ ᤁᤧᤏᤡᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡᤖᤥ॥”
ᤋᤢᤘᤠ ᤆᤥ᤺ᤰᤔᤠ
(ᤗᤢᤁᤠ ᥇᥇:᥈-᥊)
5“ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ ᤁᤢᤀᤡᤛᤡᤰ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ ᤂᤧᤱᤜᤠ᤹ᤖᤧᤃ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤖ ᤑᤠ᤹ᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤗᤠᤶᤗᤠᤶᤔᤥ ᤕᤧᤵᤔᤠᤀᤠᤱ ᤋᤢᤘᤠ ᤆᤥ᤺ᤰᤔᤠ ᤂᤢᤏᤡ᤹ ᤛᤡᤖᤠ᤹ᤌᤠᤱᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤸᤗᤧᤴ ᤜᤠᤱᤛᤧᤶᤔᤡᤴ ᤋᤃᤡᤀᤣ ᤔᤧᤄᤥᤛᤢ ᤔᤧᤛᤢᤖᤢᤀᤠᤱ ᤔᤧᤘᤠ᤹ᤖᤥ॥ 6ᤁᤖ ᤂᤧᤏᤧ᤹ ᤋᤢᤘᤠ ᤁᤧᤈᤥᤃᤢᤸᤗᤧ ᤁᤧᤜᤡᤶᤗᤰᤛᤡᤱ ᤛᤡᤃᤠᤱ ᤗᤠᤛᤧ᤹ᤀᤠᤱ ᤗᤠᤶᤎᤣ᤺ᤵᤐᤠᤴ ᤛᤢᤒᤧ᤹. ᤜᤧᤰᤁᤩᤠᤱ ᤏᤡᤔᤧᤴᤍᤧᤵᤔᤏᤠᤒᤠ ᤐᤠᤏᤢᤍᤡᤱ ᤁᤧᤶᤒᤠᤏᤢ ᤀᤣ᤺ᤰ ᤋᤢᤘᤠ ᤆᤥᤃᤧ᤹ᤀᤥ॥ ᤜᤧᤰᤁᤩᤠᤱ ᤛᤫᤠ᤺ᤳᤋᤠᤱ ᤆᤥ᤺ᤰᤔᤏᤠᤒᤠ ᤕᤠ᤺ᤶᤒᤰ ᤁᤧᤏᤡᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡᤖᤥ॥
7“ᤜᤧᤰᤁᤩᤠᤱ ᤋᤢᤘᤠ ᤁᤧᤈᤥᤃᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ ᤜᤧᤰᤁᤣ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤔᤢᤏᤢᤏᤢ ᤔᤧᤗ᤹ᤖᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤕᤖᤡᤰ ᤔᤧᤒᤠ᤺ᤳᤋᤡᤸᤗᤧᤖᤰ ᤔᤠᤱᤅᤡᤸᤗᤧ ᤂᤢᤏᤡ᤹ ᤋᤢᤘᤠᤴ ᤂᤧᤵᤛᤢ᤹ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢ᤹ᤖᤥ॥ 8ᤁᤖ ᤂᤡᤏᤡ᤹ ᤂᤧᤱᤜᤠ᤹ ᤜᤧᤰᤁᤣ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤠ᤺ᤰᤔᤠᤏᤢ᤺ᤸᤗᤧ ᤋᤃᤡᤀᤣ ᤛᤠᤱᤃᤪᤠᤶᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤧᤱᤃᤳᤋᤢᤶᤔᤡᤴᤒᤠᤴ ᤏᤡᤛᤢ᤹ᤖᤥ॥
9“ᤂᤧᤸᤗᤧᤆᤥᤃᤢᤸᤗᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤧᤶᤔᤧ᤹ᤀᤥ—
“‘ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤀᤠᤏᤡᤃᤣ ᤐᤠᤏᤢᤍᤡᤱ ᤐᤠᤀᤣ.
ᤔᤏᤠᤜᤠ᤹ᤖᤧ ᤁᤧᤔᤡᤱᤅᤡᤴ ᤛᤣᤛᤣ ᤔᤧᤀᤡ᤺ᤳᤋᤢᤖ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤖᤥ॥
10ᤁᤧᤜᤠᤱᤈᤢᤶᤔᤡᤴ ᤋᤠᤖᤖᤥ.
ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤜᤧᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤀᤠᤱ ᤁᤧᤏᤡᤱᤘᤠ᤹ ᤁᤢᤀᤡᤛᤡ᤺ᤰᤁᤣ ᤔᤧᤈᤥᤃᤢᤖᤖᤥ॥
11ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰᤐᤠ ᤁᤢᤈᤠᤴ ᤀᤠᤒᤡᤖᤧ᤹ᤀᤥ॥
12ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤗᤧᤵᤔᤡ ᤐᤡᤖᤢᤶᤛᤡᤶᤒᤧᤒᤠ ᤜᤧᤰᤁᤣᤀᤣ
ᤀᤠᤏᤡᤃᤣ ᤆᤥᤃᤢᤶᤒᤧᤒᤠ ᤗᤠᤕᤥᤴ ᤗᤧᤵᤔᤡ ᤀᤠᤒᤡᤖᤧ᤹ᤀᤥ॥
13ᤜᤱᤛᤠ᤹ᤔᤥ ᤀᤠᤴᤎᤠᤛᤧᤴᤏᤧ᤹ᤀᤥ.
ᤁᤖ ᤔᤠᤑᤧᤴᤛᤠᤶᤗᤠᤶ ᤀᤠᤛᤧ᤺ᤵᤋᤧ᤹ᤀᤥ॥
((ᤌᤣᤀᤠᤱᤓᤧᤸᤗᤧ ᤜᤠᤱᤈᤢᤶ. ᤔᤢᤰᤛᤠᤶ ᤏᤢ ᤔᤡᤔᤡᤍᤡᤱᤅᤡᤴ ᤛᤍᤠᤍᤡᤱ ᤂᤧᤏᤧ᤹ᤀᤡᤴᤏᤣᤖᤥ॥))’
14“ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤗᤧᤵᤔᤡ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤗᤧᤵᤔᤡ ᤁᤧᤒᤡᤖᤡ᤹ᤖᤥ॥ 15ᤁᤖ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤗᤧᤵᤔᤡ ᤁᤧᤶᤒᤡᤖᤢᤶᤛᤡᤶᤔᤡᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤡᤏᤡ᤹ ᤗᤠᤕᤥᤴ ᤗᤧᤵᤔᤡ ᤁᤧᤶᤒᤡᤖᤡᤴᤗᤥ॥”
ᤆᤠᤏᤧᤳ
16“ᤜᤧᤰᤁᤩᤠᤱ ᤂᤡᤏᤡ᤹ ᤆᤠᤏᤧᤳ ᤁᤧᤕᤢᤱᤅᤡᤸᤗᤧ#᥌:᥇᥌ ᤕᤜᤢᤍᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠᤱ ᤐᤡᤛᤧ ᤆᤠᤏᤧᤳ ᤔᤧᤕᤢᤅᤧᤖᤥ॥ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ ᤁᤢᤀᤡᤛᤡᤰ ᤂᤡᤏᤡ᤹ ᤏᤠ ᤔᤧᤔᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤆᤠᤏᤧᤳ ᤔᤧᤕᤢᤱᤅᤡᤸᤗᤧ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖ ᤑᤠ᤹ᤀᤠᤱ ᤂᤢᤏᤡ᤹ ᤏᤠᤖᤠᤴ ᤔᤧᤃᤡ᤺ᤴᤍᤢᤖ ᤔᤧᤕᤢᤱᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤱᤜᤠ᤹ᤖᤧᤃ ᤂᤢᤏᤡ᤹ ᤜᤠᤱᤛᤧᤶᤔᤡᤴ ᤁᤧᤖᤧᤰ ᤔᤧᤄᤥᤛᤢ ᤔᤧᤛᤢᤖᤢᤀᤠᤱ ᤔᤧᤘᤠ᤹ᤖᤥ॥ 17ᤁᤖ ᤂᤧᤏᤧ᤹ ᤆᤠᤏᤧᤳ ᤁᤧᤕᤢᤱᤅᤡᤸᤗᤧ ᤂᤧᤏᤧ᤹ ᤁᤧᤎᤧᤃᤣ᤺ᤰᤐᤥ ᤏᤡ᤺ᤱᤃᤣ᤹ ᤜᤢ᤺ᤳᤋᤧ᤹ᤀᤠᤱ ᤁᤧᤏᤠᤖᤠᤴ ᤘᤠᤜᤵᤋᤧ᤹ᤀᤥ॥ 18ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤆᤠᤏᤧᤳ ᤁᤧᤕᤢᤱᤒᤠᤴ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥᤛᤢᤴᤗᤖᤥ. ᤁᤖ ᤏᤡᤔᤧᤴᤍᤧᤵᤔᤏᤠᤒᤠ ᤐᤠᤏᤢᤍᤡᤱ ᤁᤧᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤏᤡᤛᤢᤖᤖᤥ॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤆᤥ᤺ᤰᤔᤏᤠᤒᤠ ᤁᤧᤏᤡᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡ᤹ᤖᤥ॥”
ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤠᤱᤛᤠᤁᤢᤴᤎᤣ
(ᤗᤢᤁᤠ ᥇᥈:᥉᥉-᥉᥊)
19“ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤠᤱᤛᤠᤁᤢᤴᤎᤣ ᤔᤧᤗᤢᤵᤛᤧᤴᤏᤧ᤹ᤀᤥ॥ ᤂᤧᤵᤔᤥᤃ ᤌᤰᤐᤠᤜᤠ᤹ᤖᤧ ᤔᤧᤈ᤹᤺. ᤜᤡᤱᤎᤥ᤺ᤰᤁᤡᤸᤗᤧ ᤕ᤺ᤴᤍᤢ᤹. ᤜᤧᤰᤁᤩᤠᤱ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧ ᤔᤧᤄᤢ᤺ᤳᤋᤢ᤹ᤖᤥ॥ 20ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤠᤱᤛᤠᤁᤢᤴᤎᤣ ᤗᤢᤵᤛᤧᤶᤔᤧ᤹ᤀᤥ॥ ᤂᤧᤵᤔᤥᤃ ᤌᤰᤐᤠᤜᤠ᤹ᤖᤧ ᤔᤧᤴᤈᤏᤧᤴ. ᤜᤡᤱᤎᤥ᤺ᤰᤁᤡᤸᤗᤧᤀᤠᤱ ᤔᤧᤕ᤺ᤳᤇᤢᤴ. ᤜᤧᤰᤁᤩᤠᤱ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧᤀᤠᤱ ᤔᤧᤴᤄᤢ᤺ᤳᤋᤢᤴᤗᤥ॥ 21ᤌᤣᤀᤠᤱᤓᤧᤸᤗᤧ ᤀᤠᤳᤋᤥ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤴ ᤘᤠ᤹. ᤂᤧᤵᤔᤥᤀᤣ ᤂᤡᤏᤡ᤹ ᤏᤡᤱᤘᤠ᤹ᤀᤡᤴᤏᤠᤱ ᤐᤣ᤺ᤰᤗᤥ॥
22“ᤔᤡᤰᤁᤡᤱᤃ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤛᤣᤔᤡᤖᤥ. ᤂᤧᤸᤗᤧᤆᤥᤃᤢᤸᤗᤧ ᤁᤧᤔᤡᤰᤁᤡᤴ ᤏᤢ᤹ᤏᤧ ᤑᤠ᤹ᤃᤪ. ᤁᤧᤖᤧᤰ ᤏᤠᤛᤡᤱᤃᤧᤴ ᤁᤧᤎᤰᤁᤡᤴ ᤀᤥ᤺ᤳᤗᤥ॥ 23ᤁᤖ ᤂᤧᤏᤧ᤹ ᤁᤧᤔᤡᤰᤁᤡᤴ ᤑᤧᤴᤏᤧ ᤑᤠ᤹ᤃᤪ ᤁᤧᤖᤧᤰ ᤏᤠᤛᤡᤱᤃᤧᤴ ᤁᤧᤎᤰᤁᤡᤴ ᤂᤠᤍᤠᤶᤔᤥ ᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ᤀᤥᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴᤏᤣ ᤂᤠᤍᤠᤶᤏᤧ ᤑᤠ᤹ᤃᤪ ᤂᤧᤴ ᤂᤠᤍᤠᤶᤔᤠᤴ ᤀᤠᤰᤂᤧᤴ ᤛᤠ᤹ᤖᤡᤰ ᤐᤥᤱᤒᤡᤗᤠ॥ 24ᤀᤠᤳᤋᤡᤸᤗᤧᤀᤠᤱ ᤏᤧᤵᤑᤢ ᤍᤠᤱᤒᤠᤜᤠ᤹ ᤛᤧᤘᤠ ᤆᤥ᤺ᤰᤔᤠᤛᤡ ᤔᤧᤛᤢᤰᤋᤢᤴᤛᤡᤴᤗᤥ॥ ᤂᤧᤸᤗᤧ ᤌᤡᤰᤁᤡᤴ ᤏᤢᤖᤡᤰ ᤔᤧᤳᤋᤢ᤹ᤀᤠᤱ ᤘᤣ᤹ᤛᤔᤠ ᤆᤡ᤺ᤳᤋᤢ᤹ᤖᤥ. ᤔᤧ᤺ᤱᤃᤪ ᤌᤡᤰᤁᤡᤴ ᤀᤡᤱᤎᤠᤱ ᤐᤡᤖᤢᤀᤠᤱ ᤘᤣ᤹ᤛᤔᤠ ᤀᤡᤱᤎᤠᤱ ᤔᤧᤒᤡᤖᤢᤴᤗᤥ॥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤕᤠᤱᤛᤠᤁᤢᤴᤎᤣᤴ ᤛᤥᤛᤥᤖᤡᤰ ᤛᤧᤘᤠ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤴᤗᤥ॥”
ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤠ
(ᤗᤢᤁᤠ ᥇᥈:᥈᥈-᥉᥇)
25“ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴᤏᤥ ᤌᤣ᤺ᤴ ᤆᤠᤔᤠ ᤌᤢᤱᤔᤠ ᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤴ ᤏᤠᤛᤡᤱᤃᤧᤴ ᤌᤰᤁᤥᤀᤠᤱ ᤌᤣ᤺ᤴ ᤆᤠᤱᤔᤠ ᤘᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤆᤠᤔᤠ ᤌᤢᤱᤔᤠᤏᤢ᤺ᤸᤗᤧ ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤴ ᤆᤠᤱᤔᤠ ᤘᤠ᤺ᤵᤔᤠᤏᤢ᤺ᤸᤗᤧ ᤏᤢᤒᤠ ᤔᤧᤈᤥ᤺ᤰᤏᤧᤴᤒᤡ᥅ 26ᤐᤢᤛᤠᤜᤠ᤹ ᤀᤥᤔᤧᤳᤋᤧᤶᤛᤡᤶᤔᤧ᤹. ᤂᤧᤱᤜᤠ᤹ᤖᤧ ᤆᤠ ᤔᤧᤴᤍᤣᤛᤢᤴ ᤔᤧᤴᤇᤢᤵᤛᤢᤴ ᤜᤧᤰᤁᤩᤠᤱ ᤕᤠᤱᤔᤧᤱᤄᤥ᤺ᤳᤋᤢᤴᤇᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤐᤠ᤺ᤸᤗᤧ ᤂᤧᤱᤜᤠ᤹ ᤆᤠᤔᤠ ᤐᤡᤖᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤂᤧᤱᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤁᤧᤴᤈᤥᤃᤡᤶᤒᤡ᥅ 27ᤏᤡᤱᤛᤠᤶᤔᤥ ᤁᤧᤎᤩᤧ᤹ᤀᤡᤀᤠᤱ ᤂᤡᤏᤡ᤹ ᤜᤡᤱᤔᤴᤏᤥ ᤁᤢᤔᤢᤰᤌᤡᤰ ᤑᤥᤔᤠ ᤁᤧᤴᤇᤢᤰᤋᤢᤶᤔᤡᤴ॥
28“ᤜᤧᤰᤁᤣ᤺ᤸᤗᤧ ᤌᤧᤔᤠ᤺ᤴ ᤆᤠᤱᤔᤠ ᤘᤠ᤺ᤵᤔᤠᤒᤣ ᤑᤠ᤹ᤀᤠᤱ ᤌᤣᤀᤠᤱ ᤏᤡᤱᤛᤠᤶᤔᤥ ᤁᤧᤎᤩᤧ᤹ᤀᤡᤒᤠᤒᤣ᥅ ᤋᤠᤶᤓᤢᤱᤔᤥ ᤁᤧᤗᤡᤱᤒᤠ ᤑᤢᤱᤅᤡᤴ ᤀᤥᤔᤧᤳᤋᤧᤶᤔᤧ᤹. ᤂᤧᤱᤜᤠ᤹ ᤕᤠ᤺ᤶᤒᤰ ᤔᤧᤴᤈᤥ᤺ᤰᤏᤧᤴ ᤂᤡᤀᤠᤱ ᤔᤧᤴᤗ᤺ᤴᤏᤧᤴ॥ 29ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤛᤥᤗᤥᤔᤏ ᤜᤠᤱᤅᤡᤴ ᤔᤡᤱᤛᤥᤎᤠ᤺ᤱᤛᤥᤀᤥ ᤔᤢᤰᤋᤧᤀᤠᤱ ᤘᤕᤧᤛᤠᤱ ᤂᤧᤴ ᤕᤠᤖᤡᤰᤁᤠᤱ ᤏᤢᤒᤠ ᤋᤣᤳ ᤔᤧᤈᤠᤰᤛᤡᤱᤅᤡᤴᤗᤥ॥ 30ᤏᤛᤠᤴ ᤁᤧᤛᤢ᤺ᤶᤒᤠᤛᤣ. ᤀᤠᤀᤡᤴ ᤁᤧᤗᤡᤱᤒᤠᤀᤠᤱ ᤋᤠ᤺ᤴᤍᤡᤰ ᤔᤡᤀᤥ ᤗᤠᤵᤑᤢᤔᤠ ᤁᤧᤒᤥᤱᤒᤠ ᤕᤠᤴ ᤑᤢᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤠᤖᤡᤰ ᤏᤢᤒᤠ ᤆᤥᤃᤢᤛᤡᤸᤗᤧ ᤂᤧᤴᤏᤢ᤺ᤸᤗᤧ ᤏᤢ᤺ᤖᤡᤰᤁᤠᤱ ᤋᤣᤳ ᤂᤡᤏᤡ᤹ ᤁᤧᤴᤈᤠ᤺ᤰᤋᤡᤶᤒᤡ᥅ 31ᤂᤧᤸᤗᤧᤆᤥᤃᤢᤸᤗᤧ ᤌᤣ᤺ᤴ ᤆᤠᤔᤠ ᤌᤢᤱᤔᤠ ᤒᤣ. ᤌᤣ᤺ᤴ ᤆᤠᤱᤔᤠ ᤘᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ 32ᤌᤣᤀᤠᤱᤓᤧᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤒᤠ ᤂᤧᤴ ᤐᤠ᤺ᤴᤜᤠ᤹ᤀᤥ ᤐᤳᤗᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤠᤜᤠᤒᤠ ᤁᤧᤈᤥᤃᤡ᤹ ᤑᤠ᤹ᤀᤠᤱ ᤏᤡᤛᤢᤖᤥ॥ 33ᤁᤖ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤈᤢᤶ ᤏᤢ ᤁᤢᤛᤠᤶᤕᤥᤏᤡᤔᤠᤴ ᤁᤥ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ ᤁᤧᤒᤡᤖᤡ᤹ᤖᤥ॥ 34ᤂᤧᤸᤗᤧᤆᤥᤃᤢᤸᤗᤧ ᤋᤠ᤺ᤴᤍᤡᤰ ᤌᤣ ᤐᤥᤱ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰᤐᤠ ᤋᤢᤰᤂᤣᤴ ᤋᤠ᤺ᤴᤍᤡᤰᤁᤣ ᤐᤥᤱ. ᤜᤧᤰᤁᤩᤠᤱ ᤀᤠᤀᤡᤴᤒᤠ ᤋᤢᤰᤂᤣᤴ ᤀᤠᤀᤡᤴᤇᤠ ᤕᤖᤡᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”
Currently Selected:
ᤔᤳᤋᤡ 6: LIFOTNT
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
