Popular Bible Verses from ᤔᤳᤋᤡ 5

Share

ᤀᤠᤳᤋᤡᤸᤗᤧᤀᤠᤱ ᤛᤣᤔᤡᤴ ᤜᤠ᤺ᤴᤍᤢᤀᤠᤱ ᤏᤀᤡᤔᤠᤸᤗᤧ ᤔᤧᤛᤢ᤺ᤵᤋᤢᤴ. ᤁᤖ ᤜᤡᤶ ᤛᤡᤃᤠᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤠᤏᤡᤔᤠ ᤔᤧᤛᤢᤰᤗ ᤑᤠ᤹ᤀᤠᤱ ᤌᤥ ᤛᤣᤔᤡᤕᤢᤱᤍᤧᤴᤏᤥ ᤕᤢᤰᤂᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤛᤣᤔᤡᤴ ᤀᤥ᤺ᤵᤐᤠ ᤜᤧᤰᤁᤣᤀᤣ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤛᤢᤕᤠ᤺ᤶᤒᤰᤜᤠ᤹ ᤔᤏᤠᤜᤠ᤹ ᤀᤥᤛᤣ᤺ᤴᤎᤠᤰᤋᤧᤶᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤐᤠ᤺ᤸᤗᤧ ᤁᤢᤏᤠᤖᤠ ᤔᤧᤓᤥᤛᤢ᤹ᤖᤥ॥

ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤥ᤺ᤳᤋᤡᤏᤡᤱᤗᤥ॥ ᤁᤥ᤺ᤰᤔᤠᤀᤥᤒᤠ ᤕᤧᤰᤕᤰᤁᤡᤴ ᤌᤣ᤺ᤸᤗᤧᤀᤠᤱ ᤀᤡ᤺ᤵᤔᤠ ᤔᤧᤛᤢᤰᤋᤢᤴ॥

ᤛᤡᤰᤗᤢᤱᤔᤥ ᤛᤣᤛᤣ ᤁᤧᤘᤠ᤹ᤒᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤏᤡᤛᤢ᤹ᤖᤥ॥

ᤜᤧᤰᤁᤩᤠᤱ ᤛᤠᤶᤕᤥᤒᤠ ᤕᤠ᤺ᤶᤒᤰ ᤛᤩᤠᤱᤔᤧᤴᤍᤠᤱ ᤆᤥ᤺ᤰᤔᤠᤀᤥ ᤁᤧᤒᤵᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤂᤧᤱᤜᤠ᤹ ᤑᤠ᤹ᤖᤢᤛᤡ᤹ᤖᤥ॥

ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤠᤱ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠᤜᤠ᤹ ᤋᤢᤘᤠ ᤆᤥᤃᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥

“ᤁᤧᤖᤧᤰ ᤐᤠ᤺ᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤠᤜᤠᤒᤠ ᤁᤧᤈᤥ᤺ᤰᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤂᤧᤱᤜᤠ᤹ᤖᤧᤴᤏᤣᤖᤥ॥

ᤏᤠᤍᤱ ᤁᤧᤈᤥ᤺ᤰᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤛᤠ ᤔᤧᤒᤥᤱᤗᤥ॥

ᤔᤧᤖᤡᤱ ᤁᤧᤎᤰᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤜᤠᤱᤜᤠᤱ ᤔᤧᤳᤇᤡᤱᤔᤠᤴ ᤔᤧᤄᤥᤛᤢ᤹ᤖᤥ॥

ᤛᤠᤶᤕᤥᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤂᤧᤱᤜᤠ᤹ᤖᤧᤴᤏᤣᤖᤥ॥

ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡ᤹ᤖᤥ॥

“ᤀᤡᤱᤃᤠ᤹ ᤆᤥᤃᤢᤱᤅᤡᤸᤗᤧ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤡᤏᤠ᤺ᤴᤍᤡ ᤁᤧᤶᤒᤡᤖᤡ᤹. ᤋᤢᤰᤂᤣ ᤁᤧᤶᤈᤠ᤺ᤳᤋᤡᤀᤠᤱ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤑᤥᤋᤩᤠᤒᤠ ᤑᤧᤴ ᤐᤠ᤺ᤴᤜᤠ᤹ ᤔᤧᤒᤠ᤺ᤳᤋᤢᤸᤗᤧ ᤔᤢ᤹ᤀᤡᤛᤠᤒᤠ ᤁᤧᤒᤥᤰᤂᤡᤖᤥ॥ ᤂᤧᤴ ᤕᤧᤶᤔᤥ ᤐᤛ᤺ᤳ ᤛ᤺ᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤡᤏᤡ᤹ ᤌᤢᤶᤄᤥᤴ ᤕᤶᤒᤠ ᤆᤥᤰᤗᤥ॥ ᤀᤢᤴᤇᤣ᤺ᤴᤛᤔᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤔᤏᤠᤜᤠ᤹ᤖᤧ ᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤖᤥ॥

ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤔᤏᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤧᤱᤜᤠ᤹ᤖᤧᤴᤏᤣᤖᤥ॥

“ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤀᤥᤒᤠ ᤕᤢᤶᤏᤡᤱᤗᤥ. ᤁᤖ ᤕᤢᤶᤔᤡᤸᤗᤧ ᤁᤢᤗᤡᤶᤔᤧᤴ ᤔᤠᤒᤣ᤺ᤰᤏᤧ ᤑᤠ᤹ᤃᤪ ᤕᤠᤶᤔᤥ ᤁᤧᤗᤡᤶᤒᤠ ᤆᤥ᤺ᤰᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ ᤂᤧᤸᤗᤧ ᤁᤢᤕᤠ᤺ᤶᤒᤰ ᤌᤣᤀᤠᤱ ᤜᤥᤵᤗᤥ. ᤁᤖ ᤂᤧᤱᤃ ᤗᤠᤵᤑᤢᤔᤠ ᤐᤥᤱᤅᤠᤱ ᤔᤏᤠᤜᤠ᤹ᤖᤧ ᤔᤧᤍᤥ᤹ᤖᤢᤖᤥ॥

ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤐᤠ᤺ᤴᤏᤥ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤆᤥ᤺ᤰᤐᤠ ᤁᤢᤀᤡᤛᤡᤰ ᤂᤡᤏᤡ᤹ᤀᤠᤱ ᤜᤧᤰᤋᤱᤒᤠ ᤐᤥᤱᤔᤠᤀᤣ ᤐᤥᤱᤗᤥ॥”

ᤂᤡᤏᤡ᤹ ᤀᤰᤂᤣᤖᤰ ᤐᤠ᤺ᤳᤋᤧᤶᤔᤧ᤹. ‘ᤀᤥ’ ᤏᤧ ᤑᤠ᤹ᤃᤪ ‘ᤀᤥᤖᤥ’. ‘ᤔᤣ᤺ᤴ’ ᤏᤧ ᤑᤠ᤹ᤃᤪ ‘ᤔᤣ᤺ᤴᤗᤥ’॥ ᤂᤧᤴᤏᤠᤱᤎᤥ ᤘᤣ᤹ ᤁᤢᤓᤠ ᤐᤠ᤺ᤴᤏᤡᤱᤃ ᤋᤠᤵᤑᤧ᤺ᤶᤒᤠᤗᤠᤶ ᤁᤧᤍᤠᤒᤠᤖᤥ॥”

“ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ‘ᤔᤡᤰᤁᤡᤸᤗᤧ ᤁᤢᤗᤧᤰᤘᤠ ᤔᤡᤰ. ᤜᤧᤰᤁᤩᤠᤱ ᤜᤠᤒᤥ᤹ᤒᤠᤸᤗᤧ ᤁᤢᤗᤧᤰᤘᤠ ᤜᤠᤒᤥ᤹ᤒᤠ’ ᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤔᤏᤠᤜᤠ᤹ᤖᤧ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳᤋᤡᤸᤗᤧ ᤂᤧᤱᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹॥ ᤀᤠᤳᤋᤡᤸᤗᤧ ᤆᤢᤵᤛᤠᤱ ᤗᤧᤵᤔᤠᤱᤒᤠ ᤁᤧᤏᤧᤍᤧᤱᤒᤠᤴ ᤁᤧᤗᤧᤱ ᤁᤧᤒᤡ᤹. ᤂᤧᤴ ᤘᤣ᤹ᤛᤔᤠᤴᤏᤠᤱ ᤋᤥ᤺ᤴᤍᤧ ᤐᤡᤖᤧ᤹॥

ᤂᤧᤏᤧ᤹ ᤆᤢᤵᤛᤠᤱ ᤁᤧᤔᤡᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤗ᤺ᤳᤋᤧ᤹ᤀᤠᤱ ᤗᤠᤵᤑᤢᤛᤧ᤹ᤀᤥ॥ ᤁᤧᤖᤧᤰ ᤏᤠᤛᤡᤱᤃᤧᤴ ᤌᤰᤁᤡᤴ ᤂᤧᤔᤠᤕᤱᤛᤱᤅᤥ ᤗᤠᤵᤑᤢᤔᤠᤏᤢ᤺ᤸᤗᤧ ᤔᤡᤰᤌᤡᤰ ᤔᤣ᤺ᤴᤏᤣ ᤘᤠ᤹ᤔᤠᤀᤣ ᤏᤢᤒᤠᤖᤥ॥ ᤜᤧᤰᤁᤩᤠᤱ ᤆᤢᤵᤛᤠᤱ ᤜᤢᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤧᤴᤏᤠᤱ ᤂᤰᤋᤧ᤹ᤀᤠᤱ ᤗᤠᤵᤑᤢᤛᤧ᤹ᤀᤥ॥ ᤁᤧᤖᤧᤰ ᤏᤠᤛᤡᤱᤃᤧᤴ ᤌᤰᤁᤡᤴ ᤂᤧᤔᤠᤕᤱᤛᤱᤅᤥ ᤗᤠᤵᤑᤢᤔᤠᤏᤢ᤺ᤸᤗᤧ ᤜᤢᤰᤌᤡᤰ ᤔᤣ᤺ᤴᤏᤣ ᤘᤠ᤹ᤔᤠᤀᤣ ᤏᤢᤒᤠᤖᤥ॥”