Popular Bible Verses from Vaebulaniya 13

Share

Mutanage ukuvedza nu wudobofu uwuviifu wa magoobeli mu miikalile gyenyo, nda haamu, mwisiikilage fye muli nafyo. Pakuva uNguluvi aalongile ukutigila, “Sindilakuleka nambe kukuseemwa nambi.”

UYesu Kilisiti asiihambuka, umwene yuuyula ngita kye aali ukuhuma kataali, umusika ugu, mbeepali na mbeepali.

Lwe lwene twilonga kitoogopa ukutigila, “UMutwa ye mwene ye akuunanga uneene, sindiloogopa kikivedzaga. Umuunu ahadza akuundimila kiki?”

Mutanage ukuleka ukulima inofu nu kuvagavila avangi ifiinu fye muli nafyo, pakuva uwusembe ngita uwo, wukumukeeledza uNguluvi.

Wugendela mwa Yesu tuginage ukumulumba uNguluvi, pakuva amadzwi geesu ga kulilumba ilitaawa lyakwe, giihwanana nu wusembe we tukumuteekelela.

Inoolane yiginikwage na vaanu vonda, kangi umugoosi nu mudala viiyefyage nu wudumuli-noolane, pakuva uNguluvi alavahiga avadumuli-noolane na vagoni.

Kangi muginage ukuvasangila avagendzi mu nyumba dzeenyo, pakuva pa kulima ewo, avangi vavasangiye nava vanyamwandza va Nguluvi kitadzeela.

UNguluvi umunya lutengamaso ye amudzulubwise uMutwa veesu uYesu, avagelanidzage ukulima amalimo amanofu gonda kulingʼaana ni mikeelelele gyakwe, kangi alimage umwesu twivonda dzonda idzikumukeeledza umwene wugendela mwa Yesu Kilisiti. Umwene ye Mudiimi uMukomi va ngʼolo, ye aadzulubwiswe nu Nguluvi ukuhuma ku wulungu, mu danda yaakwe iyiikwitika wiimila wa lufingo lwa mbeepali na mbeepali. Neke lino, apeelwage indolo mbeepali na mbeepali. Eena.