Popular Bible Verses from याकुब 2

Share

तिहियें विश्वास बि अगर अच्छै कंमा सिंउ ना भुईया, ता अपड़ै स्वभावा मझ बेकार आ।

जिहीं शरीर श्वांशै बगैर मौरा, तिहियें विश्वास बि भलै कंमा बगैर मौरा।

मिंडै प्यारे विश्वासी भाईयो, अगर कोई ऐ बोलता कि आंउ प्रभु यीशु पन विश्वास काता, पण सै होरनियां सिंउ अच्छै कम ना कातै, ता तेसैरा विश्वास बेकार आ, क्या ऐतिया विश्वास तेसैरा उद्धार करि सकता? बिल्कुल ना।

ताउ विश्वास आ कि अकै परमेश्वर आ; तु अच्छु काता। बुरी आत्माय बि ऐहीं विश्वास काति, जां कंपति रींहथी।

किछ मैहणुवां किनि विश्वास आ जां किछ मैहणुवां किनि अच्छै कंम अत्तै ता आंउ बोलता कि तुवे मूंनी लुहाआ कि तुवे सच मझ यीशु मसीह मझ विश्वास कातै जेख्णी तुवे अच्छै कंम ना कातै जां मूं तुहांनि अपड़ै अच्छै कंमै ला जैन्हां आंउ काता तैन्हैं ला लुहानु कि आंउ सच मझ यीशु मसीह पन विश्वास काता।

केईनी कि जै कौ होरनियां पन दया ना करैला, ता परमेश्वरा बि तैस पन न्याएरी धियाड़ि दया ना कांनी। पण जै कौ होरनियां पन दया करैला, ता परमेश्वरा बि न्याएरी धियाड़ि तैस पन दया कांनी।

तुहैं तका लियु कि मैहणु सिर्फ विश्वासै ला ना, पण सै अपड़ै कंमै ला एकि धर्मी मैहणुरै रूपा मझ गिणियूंता।

तीं तका लियु अब्राहमेरा परमेश्वरा पन यौउता भरौसा थ्या कि, जै किछ परमेश्वरै तैस सिंउ कांननी बौलु, तैस कांननी सै तियार भौ ग्या; तेसैरा विश्वास तेख्णी पूरा मनियां, जेख्णी तेनी सै कियु जै तेसनी कांननी बोलथियु।