याकुब 2
2
भेद-भावेरै खिलाफ चेतावनी
1मिंडै विश्वासी भाईयो, तुवे असेड़ै महिमा बाऐ प्रभु यीशु मसीहरै चैलै अत्तै, ऐठणीरै तेईनी तुहां मझ कोई भेद-भाव ना भूंणा चेहिंथा। 2अगर तुहां मैहणुवां केरी कलीसियै मझ सुन्नैरी अंगुठी जां कीमति लिकड़ै ला करि कोई मैहणु ऐईछिया जां कोई अक गरीब मैहणु बि ऐयिड़ै-कुतैयिड़ै लिकड़ै ला करि ऐईछिया। 3अगर तुवे कीमति लिकड़ै लाउरै मैहणुनी जादी इज्जत दी-करि बोलतै, “तुवे इठि इस कुर्सी पन बेशा” जां गरीबा सिंउ बोलिया, “तु ओठि खड़ा-खड़ा बेश” या “मिंडै पैयिड़ा किनि भुणां बेश।” 4ता क्या तुहैं योकिया सिंउ भेद-भाव ना केया, जां क्या तुवे बुरै-विचारै ला न्याय कांने बाऐ ना बंणै?
5मिंन्डै प्यारे विश्वासी भाईयो, ध्यान सिंउ शुणा, क्या परमेश्वरै सैक्यै मैहणु नत्तै चुणोरै, जै संसारेरी नजरिया मझ गरीब अत्तै, ताकि सैक्यै विश्वासेरै धनी भौ गहिया जां तैस राज्यरै वारिस बणियां, जेसैरा वायदा परमेश्वरै तैन्हांं सिंउ क्यौरा जै परमेश्वरा सिंउ प्रेम रखतै? 6पण तुहैं गरीबैरा अपमान केया। तुहां पता कि ऐ धनवान मैहणु ऐ अत्तै जै तुहां पन अत्याचार कातै। ऐ सैहै अत्तै जै जबरदस्ती तुहां अदालती मझ लै गांहथै। 7ऐ सैहै मैहणु अत्तै जै यीशु मसीहरै तैस उत्तम नाँईयेरी निंदा कातै, जै तुहांनि दियोरू आ।
8अगर तुवे पवित्र शास्त्रेरै बड़ै खास नियमेरा पालन कातै कि, “तु अपड़ै पड़ोसी सिंउ ऐपु समान प्रेम कर।” ता तुवे ठीक कातै। 9पण अगर तुवे भेद-भाव कातै, ता तुवे पाप कातै जां व्यवस्था तुहां अपराधी बंणा दींति।
10केईनी कि जै कौ सारी आज्ञाय ता मनता पण एकि आज्ञाय ना मनता, फिरी बि सै सारिया गला मझ दोषी समझियुंणा। 11केईनी कि परमेश्वरै ऐ बौलु, “तु व्यभिचार मेईं काता” तेनियें ऐ बि बोलोरू आ कि, “तु हत्या मेईं काता।” ऐठणीरै तेईनी अगर तुवे अगर व्यभिचार ना कातै, पण हत्या कातै ता तुवे व्यवस्था ना मनतै। 12तुवाड़ी गल-बात जां तुवाड़ा बर्ताव तैन्हांं मैहणुवां सैयि भूंणा चेहिंथा, जैन्हैरा न्याय तैस व्यवस्थाईरै अनुसार भूंणा, जै असु आजाद काति। 13केईनी कि जै कौ होरनियां पन दया ना करैला, ता परमेश्वरा बि तैस पन न्याएरी धियाड़ि दया ना कांनी। पण जै कौ होरनियां पन दया करैला, ता परमेश्वरा बि न्याएरी धियाड़ि तैस पन दया कांनी।
विश्वास जां अच्छै कर्म
14मिंडै प्यारे विश्वासी भाईयो, अगर कोई ऐ बोलता कि आंउ प्रभु यीशु पन विश्वास काता, पण सै होरनियां सिंउ अच्छै कम ना कातै, ता तेसैरा विश्वास बेकार आ, क्या ऐतिया विश्वास तेसैरा उद्धार करि सकता? बिल्कुल ना। 15अगर कोसक्यै विश्वासी भाई भींणी किनि लांणेरै तेईनी जरूरतिरै लिकड़ै ना भुईया ना धियाड़िनी रोटी भुईया। 16अगर कोई तुहां मझां तैन्हांं सिंउ बोलिया, “शांति सेईतै गहा, गर्म-गर्म लिकड़ै ला, पैट भरी खा, पण सै तैन्हांंनि शरीरेरै तेईनी जरूरतिरी चीज ना दिया, ता तेसैरा ऐत किना केया फायदा?”किछ बि ना। 17तिहियें विश्वास बि अगर अच्छै कंमा सिंउ ना भुईया, ता अपड़ै स्वभावा मझ बेकार आ। 18किछ मैहणुवां किनि विश्वास आ जां किछ मैहणुवां किनि अच्छै कंम अत्तै ता आंउ बोलता कि तुवे मूंनी लुहाआ कि तुवे सच मझ यीशु मसीह मझ विश्वास कातै जेख्णी तुवे अच्छै कंम ना कातै जां मूं तुहांनि अपड़ै अच्छै कंमै ला जैन्हां आंउ काता तैन्हैं ला लुहानु कि आंउ सच मझ यीशु मसीह पन विश्वास काता। 19ताउ विश्वास आ कि अकै परमेश्वर आ; तु अच्छु काता। बुरी आत्माय बि ऐहीं विश्वास काति, जां कंपति रींहथी।
20पण हे मूर्ख मैहणुवां! क्या तु ऐ बि ना जांणता, भलै कम कांने बगैर विश्वास बेकार आ? 21जेख्णी असेड़ै पूर्वज अब्राहमै अपड़ा बच्चा इसहाक वेदी पन चाढ़ा ता तेनी जै भला कंम केया तेनी ला ऐ सैक्या परमेश्वरेरै सांमणै धर्मी ठहराईया। 22तीं तका लियु अब्राहमेरा परमेश्वरा पन यौउता भरौसा थ्या कि, जै किछ परमेश्वरै तैस सिंउ कांननी बौलु, तैस कांननी सै तियार भौ ग्या; तेसैरा विश्वास तेख्णी पूरा मनियां, जेख्णी तेनी सै कियु जै तेसनी कांननी बोलथियु। 23ऐठणीरै तेईनी जिहीं पवित्र शास्त्रैरा ऐ वचन सच भुआ, “अब्राहमै परमेश्वरा पन विश्वास केया जां तेसेरै विश्वासेरी वजहि ला परमेश्वरै सै धर्मी मैहणुरै रूपा मझ ग्रहण केया।” जां सै परमेश्वरैरा मित्र भुआ। 24तुहैं तका लियु कि मैहणु सिर्फ विश्वासै ला ना, पण सै अपड़ै कंमै ला एकि धर्मी मैहणुरै रूपा मझ गिणियूंता। 25तिहियें राहाब वैश्या बि जेख्णी तेनी अपड़ै घरा मझ विषैक दींणारा स्वर्गदूता केरा स्वागत केया जां होरी बत्तै विदा कियै, ता सै अपड़ै कमैं ला अक धर्मी मैहणुरै रूपा मझ स्वीकार भुई। 26जिहीं शरीर श्वांशै बगैर मौरा, तिहियें विश्वास बि भलै कंमा बगैर मौरा।
Currently Selected:
याकुब 2: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
