Popular Bible Verses from ဢေးၽႅတ်ႈ 4

Share

ႁႂ်ႈ​မီး​တၢင်း​ဢၼ်​ၵေႃႉ​ၼိုင်ႈ​လႄႈ​ၵေႃႉ​ၼိုင်ႈ ႁဵတ်း​ၵျေး​ၸူး​တီႈ​ၵၼ်၊ တၢင်း​ဢၼ်​ဢဵတ်း​လူ​ႁၵ်ႉ​ပႅင်း၊ တၢင်း​ဢၼ်​ပွႆႇ​လွတ်ႈ​ဢပႅတ်ႈ ၵေႃႉ​ၼိုင်ႈ​လႄႈ​ၵေႃႉ​ၼိုင်ႈ မိူၼ်​ၸိူဝ်ႉ​ၼင်ႇ​ဢၼ်​ၽြႃး​ပဵၼ်​ၸဝ်ႈ ပွႆႇ​လွတ်ႈ​ဢပႅတ်ႈ​သူ​ၵွပ်ႈ​ပိူဝ်ႈ​ၸဝ်ႈ​ၶရိၸ်ႈ​ၼၼ်ႉ​တႃႉ။

ဢွၼ်​ၵၼ်​ပျေႉ​ၸုမ်ႇ​တင်း တၢင်း​ဢၼ်​ႁူဝ်​ၸႂ်​ၶျႃး​တႅမ်ႇ ၼႂ်း​ၵူႈ​ၸိူဝ်ႉ​ၵူႈ​ပိူင်၊ တၢင်း​ဢၼ်​ၼိမ်​သိမ်ႇ​ဢူၼ်ႈ​ဢွၼ်ႇ၊ တၢင်း​ဢၼ်​ၸႂ်​ယႂ်ႇ​ၸႂ်​ယၢဝ်း​ၸိူဝ်း​ၼၼ်ႉ​သေ​ယဝ်ႉ၊ မီး​တၢင်း​ဢၼ်​ၵေႃႉ​ၼိုင်ႈ​လႄႈ​ၵေႃႉ​ၼိုင်ႈ ပႃး​တင်း​ၸႂ်​မႅတ်ႈ​တႃႇ​ယိူၼ်ႉ​ၶၢမ်ႇ​လႄႈ၊

ယႃႇ​ပေ​ႁႂ်ႈ​ၵႂၢမ်း​ဢၼ်​ၵူဝ်ႈ​ဢၼ်​ၵိူၵ်ႇ​ၼၼ်ႉ လႆႈ​ဢွၵ်ႇ​ၵႃႈ​ၼႂ်း​သူပ်း​သူ​သေ​ၶေႃႈ​သေ​ၵမ်း။ လၢတ်ႈ​ၵႂၢမ်း​ဢၼ်​လီ​ဢၼ်​ငၢမ်း​ပုၼ်ႈ​ဢၼ်​တၵ်း တႄႇ​ႁဵတ်း​ႁႂ်ႈ​လႆႈ​ပွင်​ဢၵျူဝ်း​ၶဝ်​ၸိူဝ်း​ဢၼ်​လႆႈ​ထွမ်ႇ​လႆႈ​ငိၼ်း​ၼၼ်ႉ​ၵူၺ်း​တႃႉ။

ပႄႇ​ပႅတ်ႈ​တၢင်း​ဢၼ်​ၸႂ်​ပွတ်း​ၸႂ်​လွတ်း​ၵူႈ​ၸိူဝ်ႉ​ၵူႈ​ပိူင်၊ တၢင်း​ဢၼ်​ၸႂ်​မႆႈ​ၸႂ်​လိူတ်ႇ၊ တၢင်း​ဢၼ်​တေႃး​သႃႉ​ဢွၵ်ႇ၊ တၢင်း​ဢၼ်​ႁိုတ်း​သႅၼ်ႇ၊ တၢင်း​ဢၼ်​လၢတ်ႈ ယႃႉ​သရေႇ​ပိူၼ်ႈ​ၸိူဝ်း​ၼၼ်ႉ ဢိၵ်ႇ​တင်း​တၢင်း​ဢၼ်​သီႈ​ၵေႉ​ႁေႈ​တႃ​ပိူၼ်ႈ ၵူႈ​ၸိူဝ်ႉ​ၵူႈ​ပိူင် ၼၼ်ႉ​သေ​ၵႃႈ​တီႈ​သူ​တႃႉ။

ၼႂ်း​လွင်ႈ​ဢၼ် တၢင်း​ၸႂ်​မႆႈ​ဢွၵ်ႇ​ၼၼ်ႉ​ၸိုင် ယႃႇ​ပေ​ႁႂ်ႈ​လႆႈ​မီး​ဢပႅတ်ႈ။ ၸူဝ်ႈ​ဢၼ်​တၢင်း​ၸႂ်​မႆႈ ဢမ်ႇ​ပႆႇ​ႁၢႆ​ၼၼ်ႉ​ၸိုင်၊ ယႃႇ​ႁႂ်ႈ​ၵၢင်​ဝၼ်း​တၼ်း​တူၵ်း။- ယႃႇ​ပေ​ပၼ်​ဢၶႂၢင်ႉ​တီႈ​မႃႇၼၢတ်ႈ။

ႁႂ်ႈ​သူ​လႆႈ​ထွတ်ႇ​ၵူၼ်း​ၵဝ်ႇ​သူ​ဢၼ်​ၼဝ်ႈ​တူႇ​လူႉ​လႅဝ် ၵွပ်ႈ​ပိူဝ်ႈ​ၸႂ်​လေႃး​ၽႃႉ​ဢၼ် ၸၢင်ႈ​ပႅတ်ႉ​လႅၼ်​ၼႂ်း​လွင်ႈ​တၢင်း​ဢၼ် သူ​ၵႂႃႇ​မႃး​မိူဝ်ႈ​ဢွၼ်​ၼႆႉ​ၼၼ်ႉ​ပႅတ်ႈ၊- ႁႂ်ႈ​သူ​လႆႈ​ႁူဝ်​ၸႂ်​သၽေႃး​ဢၼ်​မႂ်ႇ​လႄႈ ဢဝ်​ၵူၼ်း​မႂ်ႇ​ဢၼ်​ဢဝ်​တင်း​ပႃႇရမီႇ​တၢင်း​ဢၼ်​သိုဝ်ႈ​တေႃႇ၊- တၢင်း​ဢၼ်​မူတ်း​ၸၢင်ႇ ဢၼ်​ၸၢပ်ႈ​သႅင်ႇ​ၵၼ်​တင်း သမ်ႇမႃႇ​တြႃး​ၽၢၼ်ႇ​သၢင်း​ႁဵတ်း​ပဵၼ် မိူၼ်​ၸိူဝ်ႉ​ၼင်ႇ ၽြႃး​ပဵၼ်​ၸဝ်ႈ ၼၼ်ႉ​ၼုင်ႈ​မႆ​ဢေႃႈ။

ဢဝ်​ႁႅင်း​လႄႈ​ၵျူဝ်း​ၸႃး​ႁႂ်ႈ​လႆႈ​ဢဝ်​တၢင်း​ဢၼ်​မတ်ႉ​ၵိုၵ်း​မတ်ႉ​ႁွမ်း ဢၼ်​သၢင်ႇ​ထုၵ်ႇ​ႁဵတ်း​ၵေႃႉ​သေႈ​ပွင်း​ၵၼ်​ၼၼ်ႉ ပႂ်ႉ​တၢင်း​ဢၼ် ဝီႉၺိၺ်ႇ​ၸဝ်ႈ​ပဵၼ်​ပိူင်​လဵဝ်​ၵၼ်​ၼၼ်ႉ​ယူႇ​တႃႉ။

မၼ်း​ၸဝ်ႈ​ၼၼ်ႉ ၶၢၼ်း​ဝႆႉ​ႁႂ်ႈ​လႆႈ​မႄး​ႁႅၼ်း​ၵူၼ်း​မူတ်း​ၸၢင်ႇ​တင်း​လၢႆ ပုၼ်ႈ​လွင်ႈ​ၼင်ႇ​ႁိုဝ် တၵ်း​မေႃ​ႁဵတ်း​ဢမူႉ ထမ်ႇမႃႉ​သြႃႇ​လႄႈ တႄႇ​ႁဵတ်း​တူဝ်​ၸဝ်ႈ​ၶရိၸ်ႈ၊- ၵမ်ႈ​ၽွင်ႈ ၼႂ်း​ဢရႃႇ​တမၢၼ်ႇ​ၸဝ်ႈ၊ ၵမ်ႈ​ၽွင်ႈ​ၼႂ်း​ဢရႃႇ​ပရေႃးၽႅတ်ႈ၊ ၵမ်ႈ​ၽွင်ႈ​ၼႂ်း​ဢရႃႇ​ဢၼ်​ပွင်​သႃႇသၼႃႇ၊ ၵမ်ႈ​ၽွင်ႈ​ၼႂ်း​ဢရႃႇ ဢၼ်​ဢုပ်ႉ​ၸိူဝ်း​ၸဝ်ႈ ဢိၵ်ႇ​တင်း​ၼႂ်း​ဢရႃႇ​သြႃႇ​ဢေႃႈ။- လွင်ႈ​တၢင်း​ၸိူဝ်း​ၼႆႉ တၵ်း​ပဵၼ်​တေႃႇ​ထိုင်​ႁွတ်ႈ​ႁဝ်း​ၵႃႈ​မီး​တင်း​သဵင်ႈ​တင်း​လူင် ၶိုတ်း​ထိုင်​ၵႃႈ​တီႈ​တၢင်း​ဢၼ်​ယုမ်ႇ​မၢတ်ႈ ဢိၵ်ႇ​တင်း တၢင်း​ဢၼ်​ႁူႉ​ၸၵ်း​လုၵ်ႈ​ၸဝ်ႈ​မိူၼ်​မိူၼ်​ၵၼ်​လႄႈ ထိုင်​ပဵၼ်​ၵူၼ်း​ယႂ်ႇ​ၵူၼ်း​ၵႄႇ​ဢၼ်​ဝႃႈ ပမႃႇၼႃႉ တၢင်း​ဢၼ် ၸဝ်ႈ​ၶရိၸ်ႈ​ပျေႉ​ၸုမ်ႇ​ၼၼ်ႉ​ဢေႃႈ။

လွင်ႈ​မၼ်း​ၸမ်ႉ လွင်ႈ​ၼင်ႇ​ႁိုဝ် မိူဝ်ႈ​ၵမ်း​လိုၼ်း ႁဝ်း​တၵ်း​ဢမ်ႇ​ပဵၼ်​လုၵ်ႈ​ဢွၼ်ႇ ဢၼ်​လူမ်း​ဢေႃးဝႃႇတႃႉ ၵႃႈ​မီး​တင်း​သဵင်ႈ​တင်း​လူင်​ထူဝ်း​လႄႈ​ၽူင်ႉ​ၵႂႃႇ ၵူႈ​တီႈ​ၵူႈ​လႅၼ်​ၵွပ်ႈ​ပိူဝ်ႈ​ဢၼ်​ပိူၼ်ႈ​တၢင်ႇ​ၵေႃႉ ဢဝ်​တင်း​ပရီႉယႄႇ ၵူၼ်း​ပႅတ်ႉ​လႅၼ်​လၢတ်ႈ​ႁႂ်ႈ ၸူဝ်း​ၵႂႃႇ​ၼႂ်း​ဢပႅတ်ႈ၊- ဢိၵ်ႇ​တင်း လွင်ႈ​ၼင်ႇ​ႁိုဝ်​တၵ်း​ဢဝ်​တင်း​ၸႂ်​မႅတ်ႈ​တႃႇ​ၸွမ်း​သမ်ႇမႃႇ​တြႃး​ယူႇ​သေ​လႄႈ​ယႂ်ႇ​မႃး​ၼႂ်း ၵူႈ​ၸိူဝ်ႉ​ၵူႈ​ပိူင်​ၵႃႈ​တီႈ​ဢၼ် ပဵၼ်​ႁူဝ်​ႁဝ်း ဢၼ်​ဝႃႈ​ၸဝ်ႈ​ၶရိၸ်ႈ​ၼၼ်ႉ​ၸိုင်၊ ၸင်ႇ​ပဵၼ်​ဢေႃႈ။