Popular Bible Verses from Esaaya 53

Share

Tawi lee, wo saabe hakkeeji meeɗen de o barminaa. Wo junuubaaji meeɗen ngaɗi de o niisaa. Jukkungo waddoowo jam meeɗen ngoon wo dow makko saami. Wooɗi du, wo saabe nawnallaaji makko ɗiin de keɓuɗen cellal.

En fuu eɗen njiilonoo hono baali, mono fuu e laawol muuɗum. De Joomiraaɗo jippini junuubaaji meeɗen ɗiin fuu dow makko.

Ammaa wo torraaji meeɗen o ronndii, wo naawuuji meeɗen o jaɓi. De enen lee, miiluɗen wo jukkungo saami dow makko, mo Laamɗo fiyi de semtini.

Kuyfinaaɗo mo yimɓe njoppi, neɗɗo keewɗo naawalla, annduɗo torra, nannduɗo e doggeteeɗo. O huyfinaama, en ndaardii mo hono faa'e.

O yarnaama mettorgal, o jaɓii torreede. Ammaa o omtay hunnduko makko. O wa'i hono ɓii mbaala kirsoyteenga, hono no mbaala yeeso hesooɓe leeɓi muuɗum noon, o muɓɓitay hunnduko.

Joomiraaɗo muuyii niisude mo ley naawalla cattuɗo. Ammaa saabe o hokkii hoore maako, o laatake sadaka njoɓdi hakke dee, o heɓan ƴuwdi, o juutan balɗe, wooɗi muuyɗe Joomiraaɗo du, tabitan saabe makko.

Imo mawnannoo yeeso Laamɗo hono bilitel, hono ɗaɗol mburtiingol e leydi njoorndi. O walaanoo sifa, o walaa darja faa piloɗen mo, alhaali makko du walaano faa'e ko waawi fooɗude gite meeɗen.

Saabe ɗuum de mi hokkan mo ngeɗu hakkunde yimɓe ɗuuɗɓe. O hawtan e jom'en semmbe ngeɗu, sabo o hokkitirii yonki makko maayde de o limaa hakkunde luttuɓe. Tawi lee, wo hakkeeji yimɓe heewɓe o ronndii, wooɗi du o faabake luttuɓe ɓeen.

Saabe torraaji makko ɗiin dee, o yi'an annoora de o haara jam. Maccuɗo am ponnditiiɗo oon waddanan heewɓe fonnditaare saabe anndal muuɗum. O ronndoto junuubaaji muɓɓen du.

Wo e semmbe o nanngiraa, o hiitaa de o waraa. Ammaa fay gooto ley jamaanu makko hillaaka e no o ittiraa e adunaaru saabe lutti yimɓe am e no masiiba kewtorii o noon.

O uwaa hakkunde caabeeje bonɓe, o wattaa ley yanaande jom jawdi, fay ko o waɗaay ko boni, jammba fuu wurtaaki e hunnduko makko ɗuum fuu.