Popular Bible Verses from Ɩzayi 41

Share

Ta zɔrɛ dɛ̃bɩ̃ɛ ɩ, ɩ̃ be n a fʋ zie. Ta ɩ dɛ̃bɩ̃ɛ sãá a fʋ jɩ́rʋ pʋɔ ɩ. Bʋ̃ʋ n'ʋ vɛ̃, a fʋ Naaŋmɩn a, mãa n'ʋ. Ɩ̃ ɩrɛ na fʋ kpɛmɛ, ɩ̃ waar'ɩ a fʋ sõwfʋ, ɩ̃ɩ gùre fʋ na nɩ a ɩ̃ nũu na kpɛmɛ ɛ́ mɩ́ zɛb tʋ̃ɔ́ a.

Bʋ̃ʋ n'ʋ vɛ̃, a mãa Sore a, ɩ̃ ɩ n a fʋ Naaŋmɩn. Ɩ̃ nyɔw fʋ nɩ a dʋrʋ nũú. Ɩ̃ yere na kʋ̀rɛ fʋ: «Ta zɔrɛ dɛ̃bɩ̃ɛ ɩ, ɩ̃ waar'ɩ a fʋ sõwfʋ.»

Vĩ nɩ zʋmɛ n'a bɛ na nyɛ̃, a bɛlɩ dem za na nyɛ̃ nɩ fʋ suur a. A bɛlɩ dem na na bɔbr fʋ nɔhaarʋ a, bɛ ta cãà ɩ bom za ɩ, ɛ́ kpi.

Ɩ̃ cen nɩ a tẽw baarʋ zie tɩ tɛr fʋ wa n, ɩ̃ bʋɔlɩ fʋ nɩ a zi-zãánɩ za fʋ na tɩ be a. Ɩ̃ yel fʋ na: «A ɩ̃ tõ-tõ-bie a, fʋ̃ʋ n'ʋ, ɩ̃ kaa na ír fʋ, ɩ̃ bɛ jɛ b bɛr ɛ.»

Fʋ na bɔ n a bɛlɩ dem na zɛbr'ɩ fʋ a, ɛ́ kʋ̃ nyɛ̃ bɛ ɩ. A nɩbɛ na ŋmaarɛ nɩ fʋ a zɛbr a kʋ̃ cãà ɩ bom za ɩ.

Ta zɔrɛ dɛ̃bɩ̃ɛ ɩ, Zakɔb i, fʋ̃ʋ zãzul-cãpile e, fʋ̃ʋ Ɩsɩrayɛl na cɛ bɛ tɛr fãw a. A Sore yere na: Ɩ̃ waar'ɩ a fʋ sõwfʋ. A sob nɛ na yarɛ dier fʋ a, mãa n'ʋ, a Ɩsɩrayɛl Naaŋmɩn na ɩ sõw a.

Ɛcɛ fʋ̃ʋ a, Ɩsɩrayɛl i, fʋ ɩ n a ɩ̃ tõ-tõ-bie, Zakɔb i, fʋ ɩ n a nɩ-bʋʋrɛ ɩ̃ na kaa ír a, a ɩ̃ bá Abraham bʋʋrɛ.

Ɩ̃ na ɩ na mamɛ kʋ̃ɔ zɔrɛ a tã-kpalɩ zu, ɛ́ kʋ̃ɔnɩ bule yire a fʋɔlɩ sɔwlɩsɔw. Ɩ̃ na ɩ na a wɛja-kpalɛ lɩɛbɩ gbãtar, ɛ́ a tẽsɔw-kõw-welwel lɩɛbɩ bul-nɛ́ɛ zie.

A nan dem nɩ a kpɩɛrʋ dem bɔbr'ɩ kʋ̃ɔ ɛ́ a bɛ ka be ɩ. A kʋ̃ɔ-nyúur kpɛ bɛ na a kɔkɔr kò. Ɛcɛ mãa, a Sore, ɩ̃ na sɔw bɛ na, mãa, a Ɩsɩrayɛl Naaŋmɩn, ɩ̃ kʋ̃ zawrɩ bɛ bɛr ɛ.

Ãa n'ʋ ɩ à á ŋá za? A sob nɛ na mɩ́ ɩ a yele ta a pɛr-tib daar a n'ʋ. Mãa n'ʋ, a Sore. Ɩ̃ ɩ n a niw-diere, ɛ́ tɩ ta a baarʋ daar a, ɩ̃ ɩ n a Sore.

A wɛja-kpalɛ pʋɔ a, ɩ̃ na sɛl'ɩ tɩ-pɛ-bʋʋrɛ za, a bɛrɛ nɩ a pʋrmɛ. A ziir al kʋ̃ɔ na bɛ ka be a, ɩ̃ na lãw na ƴãw tɩ-pɛ-bʋʋrɛ dẽdeni. Lɛ n'a a nɩbɛ za na nyɛ̃ k'aa Sore n'ʋ maalɩ a yele á ŋá, k'aa Ɩsɩrayɛl Naaŋmɩn na ɩ sõw a n'ʋ ír a. A nɩbɛ za na bãwnɩ a na, bɛ za na cɛlɛ nɩ be ɛ́ bãw a pɛr.