Popular Bible Verses from YESAYA 61

Share

Akuwasanna PUWANG Iya Pommatanré engkai ri aléku; napiléka sibawa nasuroka untu' tiwi karéba lao ri tau kasiyasié sibawa pajjappai tau iya mareppo'é atinna; untu' mappallebbangengngi lao ri tau ritahangngé makkedaé ripaleppe'i mennang masitta, sibawa lao risining tauwé ri laleng tarungkué makkedaé ripaleppe'i matu mennang. Nasuroka untu' mabbirittangngi makkedaé narapini wettunna PUWANGNGE mappassalama; untu' saléworiwi sininna iya masaraé, sibawa mpale'i sining balinna mennang; untu' mabbéré arennung sibawa ariyo-riyong lao ri tau iya messé sibawa mabbarataé; untu' pinrai amessénna mennang mancaji élong pappojiyang. Pada-padai matu mennang aju iya alénaé PUWANGNGE tanengngi. Napogau'i matu mennang iya makessingngé sibawa tongengngé, angkanna PUWANGNGE ripakaraja.

Nasaba purano masiri leppi wékkaduwa, enrengngé rota'é nenniya atunangngé mancajini bagiyammu, namulolongeng matu mana leppi wékkaduwa ri wanuwammu sibawa mappunnaiwi ariyo-riyong mannennungengngé.

Makkedai Yérusalém, “Marennuka nasaba PUWANGNGE, mariyo-riyoi atikku nasaba Allataala. Pada-pada bottimpurané sibawa makkunraié pakéi bélo-bélo sining magello, makkuwaniro PUWANGNGE pakkennangekka waju asalamakengngé sibawa apakalangngé.

Napatettongngi matu mennang kota-kota iya maittaénna maruttung sibawa patettongngi onrong-ngonrong iya maittaénna masino-sino.

Pada-pada biné iya riyampoé tuwoi mancaji tanet-taneng, Makkuwaniro PUWANG Allataala patuwoi asalamakengngé na sininna bangsaé pojiwi matu Aléna.”

Riteppuko matu atanna Allataala sibawa riyaseng imanna PUWAT-ta. Mupéneddingiwi matu asugirenna bangsa-bangsaé sibawa marasa matempo nasaba waramparanna mennang.

Makkedai PUWANGNGE, “Upojiwi adélékengngé nenniya céccéi attenrekengngé enrengngé jaé. Uwérékko matu saromu sibawa matinulu, sibawa siyo janci mennennungeng sibawa iko.