Popular Bible Verses from 1 कुरिन्थियों 2

Share

पन ज़ेन्च़रे पवित्रशास्त्रे मां लिखेरूए, “कि ज़ैन न एछ़्छ़ेईं लाव, न कन्नेईं शुनू, ते ज़ैना गल्‍लां मैन्हु केरे दिले मां न एई, तैना सब परमेशरे तैन केरे लेई तियार की, ज़ैना तैस सेइं प्यार केरतन।”

पन जिसमानी मैन्हु परमेशरेरे आत्मारी सच़्च़ाई कबूल न केरे, किजोकि तैसेरेलेइ तै बेवकूफीए, ते न तै तैन सेमझ़ी सके, किजोकि तैना सिर्फ पवित्र आत्मारे ज़िरिये सेमझ़ी गैतिन।

पन परमेशरे पवित्र आत्मारे ज़िरिये सेइं असन पुड़ बांदू कियूं; किजोकि पवित्र आत्मा सब गल्‍लां, बल्के परमेशरेरी डुघी गल्‍लां ज़ानते।

पन असन दुनियारी आत्मा नईं, पन तै आत्मा मैल्होरोए, ज़ै परमेशरेरे तरफांए, कि आस तैन गल्‍लन समझ़म, ज़ैना परमेशरे असन दित्तोरिन।

ते मेरे शिक्षाई, ते मेरे प्रचारे मां ज्ञानेरी लालच़ानेरी बैली गल्‍लां न थी; पन पवित्र आत्मा शेक्ति सेइं इन हिरावं कि ज़ै सन्देश मीं शुनव तै सच़ थियो। एल्हेरेलेइ कि तुश्शो विश्वास मैन्हु केरे ज्ञाने सेइं नईं, पन परमेशरेरे शेक्ति पुड़ निर्भर भोए।