1 कुरिन्थियों 2
2
क्रूसे पुड़ च़ाढ़ोरे मसीहेरो सन्देश
1हे ढ्लाव ते बेइनव, ज़ैखन मीं तुसन परमेशरेरे बारे मां सन्देश शुनव, त मीं बेड़ि गल्लां इस्तेमाल न की, कि अवं अपने आपे ज्ञानी हिरेईं। 2किजोकि मीं इन थापेरू थियूं, कि तुसन मां यीशु मसीह, बल्के क्रूसे पुड़ च़ाढ़ोरे मसीहेरे अलावा होरि कोई गल न केरि। 3ते कमज़ोरी ते डरे सेइं तुसन सेइं साथी, ते बड़ो थरकतो तुसन सेइं साथी राव। 4ते मेरे शिक्षाई, ते मेरे प्रचारे मां ज्ञानेरी लालच़ानेरी बैली गल्लां न थी; पन पवित्र आत्मा शेक्ति सेइं इन हिरावं कि ज़ै सन्देश मीं शुनव तै सच़ थियो। 5एल्हेरेलेइ कि तुश्शो विश्वास मैन्हु केरे ज्ञाने सेइं नईं, पन परमेशरेरे शेक्ति पुड़ निर्भर भोए।
परमेशरेरू ज्ञान
6फिरी भी अवं आत्मिक सिद्ध लोकन ज्ञानेरो सन्देश शुनाताईं, पन इस दुनियारे लोकां केरो नईं, ते इस दुनियारे हाकिमां केरो नईं ज़ैना नाश भोनेन। 7पन अस परमेशरेरू तैन छ़पोरू ज्ञान भेदेरे रीति पुड़ ज़ोतम, ज़ैन परमेशरे दुनिया बनाने करां पेइलू इश्शे महिमारे लेई ठहराव। 8परमेशरेरो ई मकसद इस दुनियारे हाकिमन मरां केन्चे भी न समझ़ो, किजोकि अगर समझ़ते भोथे, त महिमा बाले प्रभु क्रूसे पुड़ न च़ाढ़ेथे। 9पन ज़ेन्च़रे पवित्रशास्त्रे मां लिखेरूए,
“कि ज़ैन न एछ़्छ़ेईं लाव,
न कन्नेईं शुनू,
ते ज़ैना गल्लां मैन्हु केरे दिले मां न एई,
तैना सब परमेशरे तैन केरे लेई तियार की, ज़ैना तैस सेइं प्यार केरतन।”
10पन परमेशरे पवित्र आत्मारे ज़िरिये सेइं असन पुड़ बांदू कियूं; किजोकि पवित्र आत्मा सब गल्लां, बल्के परमेशरेरी डुघी गल्लां ज़ानते। 11मैन्हन मरां कौन केसेरी गल्लां ज़ानते, सिर्फ मैन्हेरी आत्मा ज़ै तैस मांए, तेन्च़रे परमेशरेरी गल्लां भी कोई न ज़ाने, सिर्फ परमेशरेरो आत्मा। 12पन असन दुनियारी आत्मा नईं, पन तै आत्मा मैल्होरोए, ज़ै परमेशरेरे तरफांए, कि आस तैन गल्लन समझ़म, ज़ैना परमेशरे असन दित्तोरिन। 13एल्हेरेलेइ अस मैन्हु केरे ज्ञानेरी शिखैलोरी गल्लन मरां नईं, पन पवित्र आत्मारे शिखैलोरी गल्लन मरां आत्मिक गल्लां आत्मिक ज्ञाने सेइं समझ़ातम। 14पन जिसमानी मैन्हु परमेशरेरे आत्मारी सच़्च़ाई कबूल न केरे, किजोकि तैसेरेलेइ तै बेवकूफीए, ते न तै तैन सेमझ़ी सके, किजोकि तैना सिर्फ पवित्र आत्मारे ज़िरिये सेमझ़ी गैतिन। 15पन ज़ैन लोकन पवित्र आत्मा मैल्होरो तैना, तैन सैरी गल्लन परखतन ज़ैना पवित्र आत्मा शिखालते। पन ज़ैन लोकन पवित्र आत्मा नईं मैल्होरो तैना, तैन न सेमझ़ी बटन ज़ैन पवित्र आत्मा मैल्होरोए। 16इन सच़्च़े, किजोकि पवित्रशास्त्र ज़ोते,
“कोई न ज़ाने प्रभुएरे मने मां कुने।”
पन पवित्र आत्मा असन विश्वासी लोकन मसीहेरो मने दित्तोरोए।
Currently Selected:
1 कुरिन्थियों 2: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
