Popular Bible Verses from Isaías 43

Share

Noqam mushuqtana rurashaq. Manaraq unaytam salvashaq. ¡Tantiyakuyay! ¡Qallashkänam! Salvarmi nacionninkunaman desiertu nänipa kutitsimushaq. Imapis mana kanqan tsaki patsakunachömi mayukunata yuritsimushaq.

Jundu mayukunata tsimpayaptikipis qamkunawanmi kaykäshaq. Mayjina mayu jeqarpis manam apayäshunkitsu. Nina pullanpa päsayaptikipis manam rupayäshunkitsu. Manam qashpayllapis qashpayäshunkitsu.

<<Kananqa unay päsanqankunata amana yarparäyaynatsu.

Jacobpita miraq Israel runakuna, kamayäshuqniki DIOS YAYAM niyäshunki: <<Ama mantsakäyaytsu. Kikïpa kayaptikim shutikikunapa qayayarniki salvayashkaq.

Qamkunatam alläpa kuyayaq. Imaykapitapis masmi väliyanki. Tsaymi rantikikuna wañuyänanpaq juk nación runakunata churashkä.

<<Noqam salvashuqniki DIOS YAYA kä. Israel runakunapa santu Diosninmi kä. Qamkunata salvayämurnikim Egipto runakunata castigashkä. Tsaynöllam Etiopía y Seba nación runakunata rantikikuna sufriyänanpaq churashkä.

<<Qamkunawan kaykaptïqa ama mantsakäyaytsu. Rupay yarqamunan kaqläpitam kutitsiyämushayki. Rupay jeqanan kaqläpitam qoriyämushayki.

<<Peru tsaynö kayaptikipis llakipäyarnikim tukuyläya jutsaykikunapita perdonayäshayki. Perdonayarnikim ni imaypis yarpäshaqnatsu.

Kuyanqan runankunatam DIOS YAYA nin: <<Qamkunam testïgükuna kayanki. Akranqä servimaqnïkunam kayanki. Qamkunatam akrayashkaq reqiyämänaykipaq, confiakayämänaykipaq y japallä Dios kanqäta musyayänaykipaq. Imaypitapis noqallam Dios kä. Noqapita masqa manam juk Dios kantsu.

<<Noqam DIOS YAYA kä. Noqapita masqa manam ni pipis salvakuq kantsu.

<<Imaypitapis noqallam Dios kä. Podernïpita manam ni pipis qeshpintsu. Imata rurayta munaptïpis manam ni pï amatsamantsu>>.

<<Tsaymi chucaru wätakunapis agradëcikayämanqa. Chacalkunapis y avestruzkunapis kushishqam alabayämanqa. Akranqä runakuna upyayänanpaqmi tsaki patsakunachö mayukunata pashtatsimushaq. Tsay runakunatam kikïpaq rurarqä. Alabayämänanpaqmi paykunata kamarqä.

Nortitam y surtam nishaq: <¡Wamräkunata ama katsikuyaytsu! ¡Mayjina karuchö katsirpis ollquta y warmitapis kutitsiyämuy! ¡Noqata adoramaqkunata llapanta kutitsiyämuy! Munanqänö kawar alabayämänanpaqmi kamashkä. Paykunatam kikï kamashkä>.

<<Noqam DIOS YAYA kä. Lamar pullanpam nänita rurarqä. Laqchikaykaq yaku pullanpam cällitanö rurarqä. Tsaychömi atska carrëtankunawan y bestiankunawan Israel runakunata qatipämuq soldädukunata ushakätsirqä. Ushakätsiptïmi imaypis kawayämushqanatsu. Aktsi upiqnömi llapan illakäyashqa.

Noqam santu DIOS YAYA kä. Israel nacionta kamashqa karmi mandaqnikikuna rey kä.