Popular Bible Verses from Isaías 41

Share

Qamkunawan kaykaptïqa ama mantsakuyaytsu. Diosnikikuna kaykaptïqa ama llakikuyaytsu. Kallpaykikuna kananpaqmi imaypis yanapayäshayki. Derëcha kaq makïwanmi imaypis jancharäyäshayki.

DIOSNIKIKUNA karmi makipita jancharaykäyaq. Tsaymi niyaq: <Ama mantsakäyaytsu. Yanapayäshaykim>.

<<Contrayki shäriqkunam llapan penqakur ni imanakayta puëdiyanqatsu. Achäqui ashipaqnikikunam jankat ushakäyanqa.

Tsayläya karupitam qamkunata qoriyämushkaq. Maytsaychö kaykaqtam qayayämushkaq. Qamkunatam niyarqaq: <Servimaqnïmi kayanki. Akranqä kayaptikim dëjayäshaykitsu>.

Guërrachö atacayäshuqnikikunata manam ni pipis yarpanqatsu. Paykunata ashirpis mananam tariyankinatsu.

<<Jacobpita miraq Israel runakuna, manakaqnölla karpis ama mantsakäyaytsu. Wallkaqlla karpis ama llakikuyaytsu. Noqam yanapayäshayki. Israel runakunapa santu Diosnin karmi salvayäshayki.

<<Jacobpita miraq Israel runakuna, qamkunam servimaqnï kayanki. Qamkunatam noqa akrayashkaq. Qamkunam amïgü Abrahampita miraq kayanki.

Yaku mana kanqan jirkakunachömi mayukunata pashtatsimushaq. Qechwa pampakunachöpis pashtaq yakukunatam pashtatsimushaq. Desiertukunatapis pätsimanmi tikratsishaq. Yaku mana kanqanpam mayunöraq yaku aywanqa.

<<Waktsakuna yakuta mana tarir shiminkuna tsakiskiptin noqata mañakayämätsun. Noqa DIOSNIN karmi mañakayämaptin yanapashaq. Israel runakunapa Diosnin karmi dëjashaqtsu.

<<Tsaynö kananpaq pï permïtinqanta ¿manaku tantiyayanki? ¿Manaku tantiyayanki qallananpita pï permïtinqanta? Noqa DIOS YAYAM qallanan y ushanan kä.

Desiertumanmi cedru, acacia, arrayán y olïvu jachakunata plantashaq. Tsaki jirkakunachömi ciprés, pïnu y abëtu jachakunata wiñätsimushaq. Tsayta rikarmi pïmaypis noqa ruranqäta tantiyayanqa. Tsaynöllam tantiyayanqa Israel runakunapa santu Diosnin kanqäta>>.