Popular Bible Verses from kolosai 3

Share

hocila yaa yupa ep'ʉcʉ la conino yupa peteozu, yupa peteongaso; mo mainenu na lasi hia peteongasa muu to nooe'oca, tela maezo mainenu na temu hia peteongaso no mocmo ci cou.

temu ma'mamhocni nola hi'hioa ne pepe, teav'a siyahe no 'tohʉngʉ 'ela hi'hioa ta ceoa.

upena hoci cuma nala hioa, la conino mimhocni na 'tohʉngʉ ho hioa, mais'a imu yaahioaneni 'o nooe'oca, o'a imu yaahioaneni 'e cou.

isi ngohia to hamo na muu, epeiya muu ho ta'okoa. ko'koeno, temula yaa himcocoveoi, himngonghi, ma'einu, ma'cocacni ho luaveica ci 'tohʉngʉ.

'o e'e to kilisto temula at'otngasa poa no'ayumonʉ ta 'tohʉngʉmu. la boemi no mav'ov'o ci moutʉs'ʉ ho yupa mo'ma'cohio, eucufnu, boemi no tohmomoengʉ, pasunaeno, pasupiepiya ho i'mʉs'onʉ no 'tohʉngʉ ho tayafi namo 'aveoveoyʉ ci fihngau ho tohmomoengʉ to hamo. 'upena hoci cuma nala hioa, cuma nala e'e, temula aa'pucu boemi to ongko to kilisto, ieni to kilisto ho 'aveoveoyʉ to hamo.

ta acʉcʉhʉsi tan'e, la sopuhngi no himngonghi, mo maica 'e himngonghi mo yuecnguhu to acʉcʉhʉ ʉmnʉ ci peipeis'ausna.

mimucu smoe'upu smoevovei to kilisto, temula biebimi nola hi'hioa ne pepe; ne ne'e. mo yusuhngu to vhona to suoca'ha to hamo 'o kilisto.

'e isi pafeni to kilisto ci moususeomʉ la sotmoyaevona ta 'tohʉngʉmu; nomio no poa yaa moususemʉ na muu, isi epeiya to hamo muu ho poa conofeango, temula 'aveoveoyʉ.

ko'koeno, temu asansana timcoza namo 'afeo'fu'u ta feangomu cimo tma'usnu ta hpʉhpʉngʉ ci ma'konvosʉ, mais'a 'oeno smoc'ou, ma'caca'i, ma'cac'ou, kokuzo, ho i'o makonvosʉ ('e makonvosʉ zou 'oahngʉ to m'ohkuyu no uacoua).

maica ho mimucu tu'upu mcoi to kilisto, ina nsoumu isicu a'upa soʉlʉlʉa no 'ayumona to hamo.

at'inghi, temu asansana antʉha 'emo maica ci hi'hioa: 'otena i'vaho yaa ma'sʉsʉ'no, pak'i, ho mihango; 'ote mo'engho nola ekuzkuzo ho ca'i ci e'e.

'otela yupa memeknuyu, maica imucu yunga na noana'o ci a'o ho noana'o ci h'oyunsova. aʉe no faeva ci a'o. 'e faeva ci a'o, isi ieni no iachisi mi'ausnasi to moso mooyai ci hamo ho ausuhca poa yufafaeva, meelʉ a'sʉftonʉ bohngʉ to hamo.

'e hahocngʉ temu ngohia 'e vcongʉ, teav'a akuzkuzoa.

'e mao'o'oko, temula aa'pucu tmalʉ to maameoi; maica lasi ʉm'ʉmnʉa to hamo na eni.

'e mamespingi temula meo'uzo to vcongʉmu, maica na eni zou anana'o yu'ausna ta kilisto sinto.