Popular Bible Verses from Romanos 3

Share

Porke qkyaqil o qo b'inchan il, ex minti' in qo kanun tu'n qok tz'aqlxix ik tza'n te Dios tz'aqlxixte. Ex noq kukx qo okel te tz'aqlxix noq tu'n t-xtalb'il Dios, tu'nju ma qo kolpet tu'n Jesucrist.

Noq tu'n qokslab'l ti'j Jesucrist qo okel te tz'aqlxix twitz Dios. Ma tzaj tq'o'n Dios jlu kye kykyaqil qeju ma che okslan ti'j Jesús. Porke jun elni qo' qkyaqil.

Ma tzaj q'o'n Crist tu'n Dios tu'n tchjet qil tu'n tchk'el noq tu'n qokslab'l ti'j, tu'ntzun tyek'unjtz qa tz'aqlxix te Dios, ex tu'nju tpasens at, minti' kub' tq'o'n kycastiw xjal tu'n tlaj kyil o kyb'incha ojtxi. Tu'ntzun tchik'b'anjtz tuj tq'ijlalil ja'lo qa tz'aqlxix te Dios ex tu'n in che ok tq'o'n xjal te tz'aqlxix noq tu'n kyokslab'l ti'j Jesús.

ex mi jun xjal jaku tz'ok tq'o'n Dios te tz'aqlxix tu'nju in tb'incha'n tkyaqilju in tma'n ley, porke aju ley, atzun tajb'en tu'n tel qnik' ti'j qa aj il qo'.

Ik tza'n in tma'n tuj Tu'jil: Mi a'l jun xjal tz'aqlxix, misikyer jun; mi jun nne'l tnik' ti'j, mi jun in jyon ti'j Dios. Kykyaqil e je'l txalpuj, kykyaqil e ok minti' kyajb'en. Mi jun in b'inchan b'a'n, misikyer jun.

Kyja'tzun ma tz'el qnik' ti'j, ate xjal nno'k te tz'aqlxix tu'n Dios noq tu'n tokslab'l, ex mya tu'nju in tb'incha'n aju in tma'n ley.

Ax tok ma japun. Porke axix tok te Dios tyol, maske kykyaqil xjal in che nik'an yol, ik tza'n in tma'n tuj Tu'jil: K'elel nik'b'aj ti'ja qa tz'aqlxix tyola, ex kb'el kyi'j xjal tu'na ok toka tuj xjel kyu'n, chi tuj Tu'jil.