Popular Bible Verses from Aizaia 43

Share

Nyamiya, n yɛn tumla tuun’ pala. Di niŋdi pumpɔŋɔ gba; yi bi nya li? N yɛn ŋmɛla soli sɔŋ mɔɣu ni, ka chɛ ka mɔɣa dɔni tiŋgban’ nɛl’ ni.

Yi yi kpe kom puuni ni yi gari, n ni be yi sani, ka yi yi siɣila mɔɣa ni, di ku niŋ ya shɛli. Ka yi yi kpɛla buɣim ni, di ku din ya; di buɣim niɛm ku tooi din ya.

Di teeri ya binshɛŋa din daa niŋ ka di yuui yɛla bee n-lihiri binshɛŋa din daa pun niŋ kurimbuni ha la.

Amaa pumpɔŋɔ, Izraɛlnima, Yawɛ ŋun nam ya ŋɔ yɛliya, “Di zɔriya dabiɛm, n ni tiligi ya. M bolila yi yuli, mani n-sun ya.

Yi ni nyɛ n ninvuɣ’ gahinda, ka n tiri ya jilima, ka yuri ya la zuɣu, n ni zaɣisi zuliya pam niriba, ka tiligi ya.

Mani n-nyɛ Yawɛ ŋun nyɛ yi Naawuni maa. Izraɛl Naawuni ŋun be kasi ŋɔ n-nyɛ yi tiligira. N ni zaɣisi Ijipti mini Itiɔpia ni Siiba, ka tiligi ya.

M be yi sani, di zɔriya dabiɛm. N ni laɣim yi zuliya bɛn be wulimpuhili polo ni wulinluhili polo zaa na.

Amaa mani n-nyɛ Naawuni ŋun kpihindi yi daalahichi. Mmaŋmaŋ’ zuɣu ka n niŋdi lala maa. N ku lan teei yi daalahichi maa yɛla.

Yawɛ yɛliya, “Yinima n-nyɛ n shɛhiranima, ka nyɛ n ni pii n dab’ shɛba ni di chɛ ka yi baŋ ka niŋ ma yɛda. Ka lan baŋ ni mani n-nyɛ Naawuni. Naawuni so ka n tooni, ka so mi ka n nyaaŋa.

“Mani n-nyɛ Yawɛ, ka tiligira so lan kani pahi n zuɣu.

Mani n-nyɛ Naawuni, ka pumpɔŋɔ zaŋ chana, mani n-kul nyɛ Naawuni. So ku tooi fa nira n nuu ni bahi; so ku tooi gu n ni yɛn tum shɛli soli.”

Mɔɣu ni biŋkɔbiri ni paɣi ma. Hal yɔbahi mini taatahi gba ni paɣi ma, dama n ni chɛ ka mɔɣa dɔni tiŋgban’ nɛl’ ni n-ti n ni pii ninvuɣ’ shɛb’ la kom ka bɛ nyu. Bɛ nyɛla n ni nam shɛb’ ti mmaŋa, ka bɛ kul ni yiini yila paɣiri ma!”

N ni yɛli nuzaa polo nim’ ni bɛ bahimi ba ka bɛ kuna; ka yɛli nudirigu polo nim’ ni bɛ di gbibi ba. Chɛliya ka m bidibisi bɛn be katiŋ’ ha kuna, ka chɛ ka m bipuɣinsi bɛn be dunia luɣa anahi ŋɔ ni zaa kuna. Bɛna bɛn zaa nyɛ n niriba maa, mani n-daa nam ba n jilima zuɣu. Bɛ nyɛla n ni nam shɛba.”

Yawɛ yɛliya, “N daa chibi soli teeku ni, ka daa ŋme solɔɣu sɔŋ kom pam puuni. N daa zaŋ tɔbbihi bɛn mali chɛchɛbunsi ni yuri n-kana ti ku ba. N daa ŋme ba luhi ka bɛ kɔŋ yiɣisibu. N daa pɔbisi ba mi bahi kaman bɛ ni pɔbisiri kpihiri firila mia buɣim shɛm la.

Mani n-nyɛ Yawɛ ŋun nyɛ yi Naawuni ŋun be kasi. Mani n-nam yinim’ Izraɛlnima, ka nyɛ yi naa.”