Popular Bible Verses from Matayo 6

Share

Ne ni munyoowe muweentse Buyiinga bweewe ni bukwalaafu bweewe, ni nabino byoosi alibibaloselakho nabyo.

Nashiryo, mukheyembelela bye kumukaamba ta, lwekhuba shifukhu she kumukaamba shiri ni bye khukhwiyembelela byasho. Buli shifukhu shiri ni bisiro byasho bibishimala.

“Nashiryo, imbaloma ndi mukheyembelela lwe bibiwaamba khu bulamu bweenywe, nga muloma muri, manya kane mulye shiina, namwe muri kane munywe shiina, namwe bye kumubili kweenywe muri kane mukwaare shiina ta. Bulamu sibuminyisa naabi biilyo, ni kumubili sikuminyisa naabi bikwaaro?

Ne iwe n'uba nga uloomba, yinjila mu shiseenge shoowo, wikalewo lulwiitsi, uloombe Paapawo ukhabonekha ta, ni Paapawo mweene ubona mu shimoonyo, alikhuwa iwe kumukheemba.

Nashiryo ni muloombatsake muri: ‘Paapa weefwe uli mwikulu, Lisiina lyoowo likhosefu liisibwemo lukoosi. Buyiinga bwoowo bwiitse, khayo byeesi ukana bikholebwe mu shiibala, nga ni bikholebwa mwikulu.

Ukhuwe biilyo byeefwe bye shaleelo.

Khwiyakhile bibyonako byeefwe, nga nafwe ni khwiyakhila babakhwonakisila.

Ukhakhuyila mu khukhonjelesebwa ta, ne ukhuwonese isi umubi.’

“Lwekhuba inywe ni kane mwiyakhile babaandi buubi bweesi baba bakholile isi inywe, Paapa weenywe uli mwikulu naye kane abeyakhile inywe.

Ni mubone binywiinywi bye mu ngaaki; sibimiitsa, namwe byabusanisila mu shiirara ta, ne Paapa weenywe uli mwikulu abiliisa. Inywe si muli be kumukaso naabi khufuura binywiinywi ibyo?

“Mukhebiikhila bye buyiindifu bweenywe khu shiibala isi tsisilili, ni ingikhina binyala byonakisila ta, ni esi babeefwi bayabila babiiba ta. Ne ni mwibiikhile bye buyiindifu bweenywe mwikulu, isi tsisilili ni ingikhina bikhanyala byonakisila ta, namwe esi babeefwi bakhanyala khuyaba beeba ta. Lwekhuba iyo isi buyiindifu bwoowo buba, niyo esi kumwoyo kwoowo nakwo kuba.

“Mbaawo umuundu unyala khuuba umwakaanisi uwe bakoosi babili ta, lwekhuba anyala wabiyila mutweela, wakana ukuundi, namwe wehamba naabi khu mutweela, walekyelesa uramile. Nashiryo, simunyala khukhwakaanisa Wele ni buyiindifu ta.

Ne noola isaambo iyo niyo yeesi Wele akwaarisamo bunyaasi bwe mwirome, bubuuliwo bulamu shaleelo, ne kumukaamba bwatuumibwa mu mulilo, s'alifuurira ilala khubakwaarisa, inywe babaali ni khufukiilila khufwiiti?

Ne iwe n'uwa bataambi, kumukhono kwoowo kumunyeletsi kukhamanya sheesi kumukhono kwoowo kumulayi kuli khukhola ta, nio khukana khwoowo khunyale khuuba khwe mu shimoonyo. Aryo Paapawo ubona mu shimoonyo alikhuwa kumukheemba kwoowo.

“Ni mwitsililise mulekhe khukholela buraambi bweenywe bwe bukwalaafu mu moni tsye babaandu bari nio bababone ta. Ni kane mukhole muryo, singene mufune kumukheemba kukwama isi Paapa weenywe uli mwikulu ta.

“Inywe ni mubuya intsala lwe khukhwisaaya Wele, mukheyokesana mu moni nga babaali mu mutaambo, nga ibo babemiliisa khu ngaaki ni bakhola ta. Lwekhuba bonakisa mu moni mwaawe khukhwokesanisa isi babaandu babaandi bari babuya intsala. Ilala imbaboolela ndi bamalile khaale khufuna kumukheemba kwawe. Ne iwe n'ubuya intsala, yisiinga mu moni mwoowo, wihakhe kamafura mu murwe kwoowo, nio babaandu balekhe khumanya bari, ulikhubuya intsala ta, akhali Paapawo yenyene ukhabonekha uyo amanye, ni Paapawo uyo ubona bibiili mu shimoonyo alikhuwa kumukheemba kwoowo.