Matayo 6

Khuleekela khu bye khuyeeta bataambi

1 # Mat 23.5 “Ni mwitsililise mulekhe khukholela buraambi bweenywe bwe bukwalaafu mu moni tsye babaandu bari nio bababone ta. Ni kane mukhole muryo, singene mufune kumukheemba kukwama isi Paapa weenywe uli mwikulu ta.

2“Iwe n'uba nga ukabila bataambi, ukhafuura ikhoombi lwe khukana khukhwiyokesana nga babemiliisa khu ngaaki ni bakhola mu ntsu tsye khukhwisaayilamo, ni mu mikhoosi nio bari babaandu bababuyile ta. Ilala imbaboolela ndi, bamalile khaale khuweebwa kumukheemba kwawe mu bwitsufu. 3Ne iwe n'uwa bataambi, kumukhono kwoowo kumunyeletsi kukhamanya sheesi kumukhono kwoowo kumulayi kuli khukhola ta, 4nio khukana khwoowo khunyale khuuba khwe mu shimoonyo. Aryo Paapawo ubona mu shimoonyo alikhuwa kumukheemba kwoowo.

Khuleekela khu bye khuloomba

(Luk 11.2-4)

5 # Luk 18.10-14 “Ne ni muba nga muloomba, mukhaba nga babekholisa busa ni bakhola ta. Lwekhuba bakana khuloomba nga beemile khu ngaki mu ntsu tsye khukhwisaayilamo, ni mu mikhoosi esi kyakananila, nio bari babaandu bababone. Ilala ise imbaloma inywe ndi nibo baamala khaale khuweebwa kumukheemba kwaabwe mu bwitsufu. 6Ne iwe n'uba nga uloomba, yinjila mu shiseenge shoowo, wikalewo lulwiitsi, uloombe Paapawo ukhabonekha ta, ni Paapawo mweene ubona mu shimoonyo, alikhuwa iwe kumukheemba. 7#Sir 7.14Inywe ni muba nga muloomba, mukhelaŋana mu bilomo nga Banaambo ni bakhola ta. Lwekhuba nibo bambaasa bari, lwe bilomo byaawe bikali kane Wele abawulile. 8Mukhaba nga nibo ta, lwekhuba Paapa weenywe wamanya byeesi mukana nga mushiili nakhuloomba ta. 9Nashiryo ni muloombatsake muri:

‘Paapa weefwe uli mwikulu,

Lisiina lyoowo likhosefu liisibwemo lukoosi.

10Buyiinga bwoowo bwiitse,

khayo byeesi ukana bikholebwe mu shiibala,

nga ni bikholebwa mwikulu.

11Ukhuwe biilyo byeefwe bye shaleelo.

12Khwiyakhile bibyonako byeefwe,

nga nafwe ni khwiyakhila babakhwonakisila.

13Ukhakhuyila mu khukhonjelesebwa ta,

ne ukhuwonese isi umubi.’

14 # Mrk 11.25,26 # Sir 28.1-5 “Lwekhuba inywe ni kane mwiyakhile babaandi buubi bweesi baba bakholile isi inywe, Paapa weenywe uli mwikulu naye kane abeyakhile inywe. 15Ne ni kane mulekhe khukhwiyakhila babaandu babaandi buubi bwaabwe, Paapa weenywe naye s'alibeyakhila bibyonako byeenywe ta.

Khuleekela khu bye khuubuya intsala

16“Inywe ni mubuya intsala lwe khukhwisaaya Wele, mukheyokesana mu moni nga babaali mu mutaambo, nga ibo babemiliisa khu ngaaki ni bakhola ta. Lwekhuba bonakisa mu moni mwaawe khukhwokesanisa isi babaandu babaandi bari babuya intsala. Ilala imbaboolela ndi bamalile khaale khufuna kumukheemba kwawe. 17#Yuds 10.3Ne iwe n'ubuya intsala, yisiinga mu moni mwoowo, wihakhe kamafura mu murwe kwoowo, 18nio babaandu balekhe khumanya bari, ulikhubuya intsala ta, akhali Paapawo yenyene ukhabonekha uyo amanye, ni Paapawo uyo ubona bibiili mu shimoonyo alikhuwa kumukheemba kwoowo.

Buyindifu mwikulu

(Luk 12.33-34)

19 # Yak 5.2,3 “Mukhebiikhila bye buyiindifu bweenywe khu shiibala isi tsisilili, ni ingikhina binyala byonakisila ta, ni esi babeefwi bayabila babiiba ta. 20#Sir 29.11Ne ni mwibiikhile bye buyiindifu bweenywe mwikulu, isi tsisilili ni ingikhina bikhanyala byonakisila ta, namwe esi babeefwi bakhanyala khuyaba beeba ta. 21Lwekhuba iyo isi buyiindifu bwoowo buba, niyo esi kumwoyo kwoowo nakwo kuba.

Buwaanga bwe kumubili

(Luk 11.34-36)

22“Tsimoni tsoowo nitso itaala ye kumubili. Tsimoni tsoowo ni tsiba nga tsindayi, kumubili kwoowo kwoosi kwitsula buwaanga. 23Ne tsimoni tsoowo ni tsikhaba tsindayi, kumubili kwoowo kwoosi kwitsula shishiilima. Noola buwaanga bubuuli mwiiwe buli shishiilima, ni shishiilima isho shiba she kamaani!

Wele ni byeesi ifwe khwiyembeelela

(Luk 16.13; 12.22-31)

24“Mbaawo umuundu unyala khuuba umwakaanisi uwe bakoosi babili ta, lwekhuba anyala wabiyila mutweela, wakana ukuundi, namwe wehamba naabi khu mutweela, walekyelesa uramile. Nashiryo, simunyala khukhwakaanisa Wele ni buyiindifu ta.

25“Nashiryo, imbaloma ndi mukheyembelela lwe bibiwaamba khu bulamu bweenywe, nga muloma muri, manya kane mulye shiina, namwe muri kane munywe shiina, namwe bye kumubili kweenywe muri kane mukwaare shiina ta. Bulamu sibuminyisa naabi biilyo, ni kumubili sikuminyisa naabi bikwaaro? 26Ni mubone binywiinywi bye mu ngaaki; sibimiitsa, namwe byabusanisila mu shiirara ta, ne Paapa weenywe uli mwikulu abiliisa. Inywe si muli be kumukaso naabi khufuura binywiinywi ibyo? 27Naanu khwiinywe unyala khukhwilooselakho imbuka ifwiiti iri khu bulamu bweewe lwe khukhwiyembelela?

28“Ne lwashiina mwiyembelela lwe bikwaaro? Ni mubone nga bimuli bye mwirome nga ni bitsowa, sibiraamba, namwe siibinabila bikwaaro ta. 29#1 Bay 10.4-7; 2 Kim 9.3-6Ne ise imbaboolela ndi, ikhaba Solomoni mu shiriifwa sheewe shoosi, s'akwaarakho nga shitweela khu bimuli bino ta. 30Ne noola isaambo iyo niyo yeesi Wele akwaarisamo bunyaasi bwe mwirome, bubuuliwo bulamu shaleelo, ne kumukaamba bwatuumibwa mu mulilo, s'alifuurira ilala khubakwaarisa, inywe babaali ni khufukiilila khufwiiti?

31“Ni nashiryo, mukheyembelela nga muloma muri, ne khunalya shiina? Namwe muri khunanywa shiina? Namwe muri khunakwaara shiina ta? 32Lwekhuba bibyeene ibyo nibyo byeesi Banaambo baweentsa, ni Paapa weenywe uli mwikulu wamanya ari mubikana. 33Ne ni munyoowe muweentse Buyiinga bweewe ni bukwalaafu bweewe, ni nabino byoosi alibibaloselakho nabyo. 34Nashiryo, mukheyembelela bye kumukaamba ta, lwekhuba shifukhu she kumukaamba shiri ni bye khukhwiyembelela byasho. Buli shifukhu shiri ni bisiro byasho bibishimala.

Currently Selected:

Matayo 6: LCE

Highlight

Copy

Compare