Popular Bible Verses from Kòlósì ŋa 3

Share

Tsí bí ìnàbí-kã̀ wà nɔ́ɔ̀kã̀ gìɖì oo, ó wà ní e gbódzú, tsí e tɔ́wɔ́ gbàá. Bí ó bèrè gìɖì ní ɔ̀nyà-kã̀ kó bá enìkéèdzì‐ɛ̀ fɔ̀#ɛ́, ɛnɛ nyɛ̀ŋɛ̀ kó ń tɔrɛ fúu. Kíbí Ɔlá-wa gbo ń tɔrɛ fú ŋɛ́, tsí kò bá ŋɛ́ fɔ̀#ɛ́, ɛ̀ŋɛ gbo è náa ń tɔrɛ fú ara-ŋɛ́ ŋa bɛ́ɛ̀.

Ìsérè-ŋɛ́ kó wà ńǹtá-iŋɛ́ yèé ŋa wà nɔ́ɔ̀rɔ̃#ɛ́, kó máa wà ńǹtá-iŋɛ́-ìtalɛ̀ bí ŋa.

Iŋɛ́ ɔ̀kã̀lɔ́ɔ̀kã̀ kpó yèé è nákó tse#ɛ́, è náa tseé inɔ́ tã̀ã́, ànyì tã̀ã́ kíbí Ɔlá-wa ní è wà tseé fú#ɛ́ bɛ́, kò tsi ɔ̀nyà ŋa gé ní è wà tsitsɛ́ fú#ɛ́.

Ńbɛ̀ɛ́, Ɔ̀ɖáyé nɛ́ àmúɖɔ̃̀ fú ŋɛ́, tsí ó tsã̀ ŋɛ́ ní ɛ̀ŋɛ kó dzɛ́ tòŋu. Tsí kíbí ó dzɛ́ bɛ́ɛ̀#ɛ́, ó wà ní e wà rí ànyínɔ́ fúnɛ, tsí wà tse ore fúnɛ. Ó wà ní e wà tɛ ara-ŋɛ́ bɔlɛ̀, tsí wà bu ìɖì si fú ara-ŋɛ́ ŋa, tsí wà nɛ́ àtɛ̀si gbo.

Tsí ikɔ̀ ɖíɖɔ̃̀-Kírísítò yèé àa dzɛ́ fú ŋɛ́#ɛ́, è náa wà tsikpá, tsí e wà tã̀ã́ wò títí e wáa màá títí lɔ ńŋɔ́nɔ́ŋɔ́nɔ́‐ɛ̀. Bí è tse bɛ́ɛ̀, è nákó nyáa mú ifɛ̀ɛ́nɔ́, tsí wà ń tsɛ̀kɔ́ fú ara-ŋɛ́ ŋa, tsí wà ń bá ara-ŋɛ́ ŋa gbo fɔ̀. Tsí è nákó wà kɔ̃rĩ ŋa gbo inɔ́ tã̀ã́, ànyì tã̀ã́, tsí wà ń ɖɔ́kpɛ́ fú Ɔ̀ɖáyé. Nóòtítɔ́#ɛ́, è nákó wà kɔ̃rĩ-Ìwé-Ɔ̀ɖáyé† ŋa, tsí Mímí-Ɔ̀ɖáyé† gbo nákó kɔ́ ŋɛ́ nórĩ ɔ̀kã̀lɔ́ɔ̀kã̀ kpó, tsí è nákó wà kɔ̃ fú Ɔ̀ɖáyé. Tsí iŋɛ́ ɔ̀kã̀lɔ́ɔ̀kã̀ kpó yèé è wà tse#ɛ́, ìnyɛ̀-arũ-ŋɛ́ niì, ìrɛ̃̀-ɛsɛ̀-ŋɛ́ niì, bí è wà tse iŋɛ́-kã̀ gé, è náa wà tseé kíbí ɛnɛ yèé dzɛ́ ti Yèésù Ɔlá-wa#á bɛ́. È náa wà gbà ńǹtá‐ɛ̀, tsí wà ɖɔ́kpɛ́ fú Ɔ̀ɖáyé Boba.

Tsí iŋɛ́ yèé kpã́dzú lárè kpó#ɛ́ ní dzɛ́ e nɛ́ àmúɖɔ̃̀ fú ara-ŋɛ́ ŋa#á. Iŋɛ́ yèé tse#ɛ́, àmúɖɔ̃̀ ní nákó tse tsí è nákó nyáa tse ɔ̀kã̀ntso rere dzálɛ̀#ɛ́.

Báàyí#ɛ́, kíbí Ɔ̀ɖáyé dzí ŋɛ́ ti náàŋírĩ-òkú ŋa wá náyé#ɛ́ bá Kírísítò#ɛ́, odzú-ŋɛ́ kó ta iŋɛ́ yèé ŋa wà nɔ́ɔ̀rɔ̃ si#ɛ́. Kírísítò wà bɛ̀ si, tsí dzokó si náàwóòtã́-Ɔ̀ɖáyé.

È dzɛ́, tsí tútùúrɔ̀ yèé Kírísítò fú ŋɛ́#ɛ́ kó gba àntã̀ dzokó nɛ́ɛ̀ɖɔ̃̀-ŋɛ́, tsí wà gbɛ̃́ ŋɛ́. Ó ɖi, Ɔ̀ɖáyé kpè ŋɛ́ wáa kpìɖé, tsí e wà kíbí ɔ̀nyà ɔ̀kã̀ntso bɛ́, tsí e wà ńtútùúrɔ̀‐ɛ̀ si ni. È náa wà ɖɔ́kpɛ́ gbo fú Ɔ̀ɖáyé.

Náàtsùgbée bɛ́ɛ̀#ɛ́, ìlò-ɔ̀nyà-ìtalɛ̀ bí ŋa yèé wà nɔ́wɔ́-ŋɛ́, tsí è wà lò#ɛ́, è ɖɛ̃ ilɛ̀, tsí e mú ŋa rì. Ɔ̀nyà-ìtalɛ̀ bí ŋa, à náa wà wò gé ní àŋa kó tse íbàɖí. Ká sũ̀ ńɖi-ɔkɔ nàmí ká sũ̀ bá ɔnɔbɛ̃̀ɛ̃ náa le ŋá si gé ni, tsí à náa wà tse àlòwá, tsí wà lìlò wérewère ŋa. Iŋɛ́ kpó náa kí nódzú fú ŋa títí à náa kɔ Ɔ̀ɖáyé dzɔ̀ɔ́, tsí wà sɛ̃ iŋɛ́ yèé à nɛ́ si ŋa#á. Ó wà ní e ɖɛ̃ ilɛ̀, tsí e mú awù-ìrɔ́ nyɛ̀ŋɛ̀ ŋa, tsí ń rì.

Ó ɖi, è wà kíbí òkú ŋa bɛ́. Ńbɛ̀ɛ́, afɔ̀-iŋɛ́-ìtalɛ̀ bí ŋa kò tsɛdzɔ́-ŋɛ́ ró. Ɔ̀ɖáyé fú ŋɛ́ náàyɛ̀ titɔ̃, tsí Kírísítò tse ɔ̀kã̀ntso bá àyɛ̀#ɛ́ si. Tsí àŋa méèdzì méèdzì#ɛ́ kpó, àyɛ̀ titɔ̃-ŋɛ́#ɛ́ gbo, Kírísítò gbo, àŋa kpó, à tse ɔ̀kã̀ntso bá Ɔ̀ɖáyé si. À ɖúkù si ńbí odzú-ɔ̀nyà kàkó nyáa rírã tó#ɛ́.

Ó ɖi báàyí#ɛ́, ɛ̀ŋɛ òŋu, è náa mí iŋɛ́-íbàɖí nyɛ̀ŋɛ̀ ŋa tsítse. È máa wà bínɔ́ ró, è máa wà hɔ̃́rɔ̃́ fúnɛ gbo ró. È máa kãnɔ́ gbo ró, è máa wà bàdzɛ́nɛ gbo ró, è máa wà fɔ afɔ̀-tsítsìíra ŋa gbo fùɖá nárũ-ara-ŋɛ́ ŋa ró.

È máa wà rú ara-ŋɛ́ ŋa gbo ró. Iŋɛ́ yèé tse#ɛ́, kíbí è yà gba#á òŋu iŋɛ́ yèé è náa tse dzɔ̀ɔ́ dzɔ̀ɔ́ ŋa#á, è ti bɔ́ ŋa ǹɖe ná, tsí kɛ́ ŋa sɔ nákpálà-kã̀ kíbí à náa bɔ́ ìwɔ̀ra gbígbó ǹɖe bɛ́#ɛ́. Tsí è kɛ́ ìlò titɔ̃-òmírɛ̃̀-kã̀, tsí ń wɔ̀ kíbí à náa kɛ́ ìwɔ̀ra titɔ̃, tsí ń wɔ̀ bɛ́#ɛ́. Tsí kíbí è tse bɛ́ɛ̀#ɛ́, è ɖi ɔ̀nyà titɔ̃, tsí Ɔ̀ɖáyé wà nyí ɔwɔ́ kpaɖà nára-ɔ̀nyà titɔ̃#ɛ́ oɖé oɖé làkóò, tsí kó wáa kɛ́ ìwànwà tòŋu ká‐ɛ̀. Tsí kíbí ɔ̀nyà titɔ̃#ɛ́ wà nyí kpaɖà oɖé oɖé làkóò bɛ́ɛ̀#ɛ́, è nákó wáa ma Ɔ̀ɖáyé dzálɛ̀ kpó rere.

Ó ɖi ɔnɔkɛ̃̀ɛ̃ ŋa, ɛ̀ŋɛ gbo, kṹnukṹ kó nɛ́ àmúɖɔ̃̀ fú aya‐ɛ̀. È máa wà ɖí mímí fú ŋa.

Ɔma ŋa, è gbɔ̃́ɔ̃̀rã̀ fú ìnà-ŋɛ́ ŋa òŋu boba-ŋɛ́ ŋa nɔ́ɔ̀nà ɔ̀kã̀lɔ́ɔ̀kã̀ kpó. Iŋɛ́ yèé tse#ɛ́, bí è wà tse bɛ́ɛ̀ náa wà dzɔdzú-Ɔ̀ɖáyé, tsí è tse ɔ̀kã̀ntso gbo bá Ɔlá-wa si.

Ɔnɔbɛ̃̀ɛ̃ ŋa, è balɛ éwo fú ɔkɔ-ŋɛ́ ŋa. Bɛ́ɛ̀ ní è nákó wà tse#ɛ́, iŋɛ́ yèé tse#ɛ́, è tse ɔ̀kã̀ntso bá Ɔlá-wa si.