Popular Bible Verses from Isaaya 40

Share

Abarikugwa enshazi abaha amaani, Kandi n'otarikwebaasa, amwongyeraho amaani.

Abarikunyeeta baryagwa enshazi, baruhe, N'abatsigazi baryaghweramu kimwe amaani, Kwonka abategyereza MUKAMA Baryagarukwamu amaani, Batumbiikye ahaiguru n'amapapa nk'amashamba, Baryairuka, tibariruha, Baryagyenda, tibarigwa nshazi.

Tokamanyaga? Tokahuriraga? MUKAMA ni Ruhanga otahwaho, Owaahangire emperu z'ensi. Tagwa nshazi, n'obu kwakuba okuruha; Okucondooza obwengye bwe tikurikubaasika.

Muhurire eiraka ry'orikuranga naagira ati: Mushemeze omuhanda gwa MUKAMA omu ihamba, Mugororere MUKAMA omuhanda rugyndwa omu ihamba ry'omusheenyi.

Obunyaatsi buhonga, orurabyo ruhunduura, Kwonka ekigambo kya Ruhanga waitu kiryagumaho ebiro byona.

Kandi ekitiinisa kya MUKAMA kiryashuuruurwa, Abantu boona bakireebere hamwe, Ahakuba akanwa ka MUKAMA niko kaakigamba.

Empanga zoona ziryatunguurwa, N'enshozi zoona n'ebibungo biryabandikwa; Ebitegami biryagororwa, N'emyanya etaringaniire eryaringanizibwa

Aryariisa obusyo bwe nk'omuriisa, Aryakiikira abaana b'entaama ze omu mikono, Abatwarire omu kifuba kye, N'ezirikuhaka azishotoore.

Mwimutsye amaisho gaanyu ahaiguru, mureebe; N'oha owaahangire biriya? Niwe Ogwo oshohoza amahe gaabyo omu mitwe, Byona akabyeta omu maziina; Ahabw'obukuru bw'amaani ge, Kandi ahabw'okuba ow'amaani omu bushoboorozi, Tihariho na kimwe ekibuzireho.

Niwe Ogwo oshutama ahaiguru y'ensi eyebumburikire. N'abagituuramu bakaba nk'eseenene, Niwe abamba eiguru nk'omukingo, Akariteera nk'eihema ry'okuraaramu

Mugambire Yerusaalemu n'embabazi, Mugirangire n'eiraka rihango, Ku engamba zaayo zihweire, Ku okutahikiirira kwayo kusaasirwe, Kandi ku MUKAMA agihaire kabiri ekifubiro Neeturwa ebibi byayo byona.

Eiraka nirigira riti: Ranga! Naanye naagira ati: Ndangye ki? Emibiri yoona eba nk'obunyaatsi, N'oburungi bwayo bwona buba nk'orurabyo rw'obunyaatsi. Obunyaatsi buhonga, n'orurabyo ruhunduura, Ahakuba MUKAMA arwikiza omwitsyo gwe. Buzimazima abantu n'obunyaatsi.

Reeba, Mukama RUHANGA naija n'amaani, Naategyekyesa omukono gwe; Reeba, naija aine ebihembo, N'enzimuurano ye emwebembeire.

Muhuumurize abantu bangye, mubahuumurize, Nikwo Ruhanga waanyu arikugira.

N'oha orarengire amaizi g'omu nsi yoona omu ngaro ze, Akateera eiguru ekita, Akata omucuucu gw'ensi yoona omu ndengo, Akapima enshozi n'ebibungo aha minzaani? N'oha orahabwire Omwoyo wa MUKAMA, Akamwegyesa nk'omuhi w'obwengye we? N'oha ou areebuurizeho obwengye kumuhabura, Kandi n'oha oramwegyeise emihanda y'eby'oburyo, Akamwegyesa okuamanya n'okwetegyereza?