Popular Bible Verses from Fakahā 8

Share

Na‘e fakaava ‘e he Lamí ‘a e sila hono fitú, pea fakalongolongo ai ‘a e langí ‘o haafe houa nai.

Pea ko ‘ene ifi pē ‘e he ‘uluaki ‘āngeló ‘ene talupité, kuo tō ki māmani ha ‘uha maka mo e afi na‘e fiofio toto. Na‘e vela ai e vahe tolu ‘e taha ‘o māmani, mo e vahe tolu ‘e taha ‘o e vaotaá, pea mo e vahe tolu ‘e taha ‘o e mohukú.

Peá u toe sio atu mo fanongo tā ko ha ‘īkale ‘oku puna he ‘ataá mo kaila, “Mala‘ia! Mala‘ia! Mala‘ia ‘a e kakai kotoa ‘oku nofo ‘i māmaní. He ‘oku teu ifi ‘e he kau ‘āngelo ko eé ‘enau ngaahi talupité.”

Pea ko ‘ene ifi pē ‘e he ‘āngelo hono uá ‘ene talupité, kuo fakapuna ki tahi ha me‘a na‘e hangē ha fu‘u mo‘unga velá. Pea liliu ai e vahe tolu ‘e taha ‘o e tahí ‘o toto

Pea ko ‘ene ifi pē ‘e he ‘āngelo hono tolú ‘ene talupité, kuo tō hifo ha fu‘u fo‘i fetu‘u mei langi. Na‘e hangē ia ko ha fu‘u afi kakahá, pea na‘e tō ia ki he vahe tolu ‘e taha ‘o e ngaahi vaitafe mo e ngaahi matavai ‘i māmaní. Ko e hingoa ‘o e fo‘i fetu‘ú ko Kona, pea na‘e kona ai ‘a e vahe tolu ‘e taha ‘o e vai ‘i māmaní. Pea mate ‘a e kakai tokolahi koe‘uhí ko e fu‘u kona e vaí.

Pea ko ‘ene ifi pē ‘e he ‘āngelo hono faá ‘ene talupité, kuo taa‘i e vahe tolu ‘e taha ‘o e la‘aá, mo e vahe tolu ‘e taha ‘o e māhiná, mo e vahe tolu ‘e taha ‘o e ngaahi fetu‘ú. Na‘e mole ai ‘a e vahe tolu ‘e taha ‘o honau māmá. Pea fakapo‘uli leva ‘a e vahe tolu ‘e taha ‘o e ‘ahó, mo e vahe tolu ‘e taha ‘o e po‘ulí.