Fakahā 8
8
Ko e Sila hono Fitú
1Na‘e fakaava ‘e he Lamí ‘a e sila hono fitú, pea fakalongolongo ai ‘a e langí ‘o haafe houa nai. 2Peá u sio atu ‘oku ‘oange ha talupite takitaha ki he kau ‘āngelo ‘e toko fitu ‘oku tu‘u ‘o hanga ki he ‘afio‘anga ‘o e ‘Otuá.
3Pea ha‘u e ‘āngelo kehe mo ha ‘ai‘anga ‘inisēnisi koula ‘o tu‘u he ve‘e ‘ōlitá. Pea na‘e ‘oange ki ai ha ‘inisēnisi lahi ke ne hapai fakataha mo e ngaahi hū ‘a e kakai lotu mo‘oní ‘i he ‘ōlita koula na‘e hanga ki he taloní. 4Pea ‘alu hake ‘a e kohu ‘o e ‘inisēnisí fakataha mo e ngaahi hū ‘a e kakai lotu mo‘oní mei he nima ‘o e ‘āngelo na‘e tu‘u ‘o hanga ki he ‘Otuá.
5Pea hili iá, pea tata ‘e he ‘āngeló ha malala‘i afi mei he ‘ōlitá ki he ‘ai‘anga-‘inisēnisí, peá ne toki hua‘i hifo ia ki māmani. Pea pā ‘a e maná, pea tapa ‘a e ‘uhilá, pea ngalulu ‘a māmani.
Ko e Kau ‘āngelo ‘e Toko Fitu mo ‘enau Talupite ‘e Fitu
6Na‘e teuteu leva ‘a e kau ‘āngelo ‘e toko fitú ke ifi ‘enau ngaahi talupité.
7Pea ko ‘ene ifi pē ‘e he ‘uluaki ‘āngeló ‘ene talupité, kuo tō ki māmani ha ‘uha maka mo e afi na‘e fiofio toto. Na‘e vela ai e vahe tolu ‘e taha ‘o māmani, mo e vahe tolu ‘e taha ‘o e vaotaá, pea mo e vahe tolu ‘e taha ‘o e mohukú.
8Pea ko ‘ene ifi pē ‘e he ‘āngelo hono uá ‘ene talupité, kuo fakapuna ki tahi ha me‘a na‘e hangē ha fu‘u mo‘unga velá. Pea liliu ai e vahe tolu ‘e taha ‘o e tahí ‘o toto, 9pea mate mo e vahe tolu ‘e taha ‘o e ngaahi me‘a mo‘ui ‘i tahí, pea ‘auha ai foki mo e vahe tolu ‘e taha ‘o e ngaahi vaka ‘i māmaní.
10Pea ko ‘ene ifi pē ‘e he ‘āngelo hono tolú ‘ene talupité, kuo tō hifo ha fu‘u fo‘i fetu‘u mei langi. Na‘e hangē ia ko ha fu‘u afi kakahá, pea na‘e tō ia ki he vahe tolu ‘e taha ‘o e ngaahi vaitafe mo e ngaahi matavai ‘i māmaní. 11Ko e hingoa ‘o e fo‘i fetu‘ú ko Kona, pea na‘e kona ai ‘a e vahe tolu ‘e taha ‘o e vai ‘i māmaní. Pea mate ‘a e kakai tokolahi koe‘uhí ko e fu‘u kona e vaí.
12Pea ko ‘ene ifi pē ‘e he ‘āngelo hono faá ‘ene talupité, kuo taa‘i e vahe tolu ‘e taha ‘o e la‘aá, mo e vahe tolu ‘e taha ‘o e māhiná, mo e vahe tolu ‘e taha ‘o e ngaahi fetu‘ú. Na‘e mole ai ‘a e vahe tolu ‘e taha ‘o honau māmá. Pea fakapo‘uli leva ‘a e vahe tolu ‘e taha ‘o e ‘ahó, mo e vahe tolu ‘e taha ‘o e po‘ulí.
13Peá u toe sio atu mo fanongo tā ko ha ‘īkale ‘oku puna he ‘ataá mo kaila, “Mala‘ia! Mala‘ia! Mala‘ia ‘a e kakai kotoa ‘oku nofo ‘i māmaní. He ‘oku teu ifi ‘e he kau ‘āngelo ko eé ‘enau ngaahi talupité.”
Currently Selected:
Fakahā 8: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
