Is ek sout en lig soos die Woord van my vra?Voorbeeld

Sout van die aarde — identiteit en invloed

"Julle is die sout vir die aarde. Maar as sout verslaan het, hoe kry 'n mens dit weer sout? Dit is niks meer werd nie. Dit word buitekant weggegooi, en die mense vertrap dit" (Matteus 5:13 AFR83).

Jesus sê in Matteus 5:13: "Julle is die sout vir die aarde." In die antieke wêreld het sout verskeie gebruike gehad: dit het voedsel bewaar teen bederf en smaak gegee. Wanneer Hy hierdie beeld gebruik, dui dit op die teenwoordigheid van sy volgelinge in die wêreld as 'n bewarende en lewensveranderende invloed. Die wêreld is geneig tot morele en geestelike verval, maar gelowiges word geroep om dit teen te werk deur 'n lewe van gehoorsaamheid, waarheid en genade.

Jesus waarsku ook: "Maar as sout verslaan het, hoe kry 'n mens dit weer sout?" Hierdie frase beklemtoon dat sout net waarde het as dit werklik sout is — net so het Christene invloed slegs wanneer hulle getrou bly aan die waarheid en karakter van Christus. 'n Lewe sonder onderskeid van die wêreld verloor sy getuienis. Wanneer Christene in ‘n wêreld van morele en geestelike verval nie die verandering lééf nie, hoe gaan ons getuienis ‘n positiewe impak hê? Dit kan tog nie. Daarom is dit belangrik om te onthou dat goeie gesindheid en dade nie vir ons verlossing en 'n ewige lewe waarborg nie. Ons moet wel anders leef omdat ons meer soos Jesus wil wees en sy gebooie uit liefde wil behou en volg. Met hierdie gesindheid en integriteit toon ons deur ons dade dat ons vanuit ons verlossing leef en vir die wêreld ons “andersheid” wil wys.

Vrae vir nadenke:

•Wat beteken dit in jou konteks om "sout" te wees?

•Is daar areas waar jy jou invloed verloor het?

•Hoe kan jy weer getrou wees aan jou roeping in Christus?