Sterk hart-beginsels

"Met my hele hart soek ek U; moenie dat ek afdwaal van u gebooie nie" (Psalm 119:10, NLV).

Maryam Kouchaki en ’n span navorsers het in ’n studie in 2018 bevind dat mense wat hulle keuses as morele keuses verstaan, vinniger besluite neem as mense wat in dieselfde omstandighede nie van ’n soortgelyke morele kompas gebruik maak nie. Wanneer mense ’n keuse moet maak wat geanker is in hulle morele waardesisteem, oorweeg hulle gewoonlik nie enige ander opsies wat hiermee bots nie. Immorele opsies is nie vir hulle ’n alternatief nie.

In geloofsterme bevestig hierdie studie dat morele beginsels wat in ons harte geanker is, ons lewens eindeloos vergemaklik en vereenvoudig. Mense wat God se waarhede diep in hulle harte ingemessel het en Hom met hulle hele hart soek (Psalm 119:10), hoef byvoorbeeld nie te dink of skelm afloerdery van pornografie reg of verkeerd is nie. Hulle weet dit is verkeerd. Mense wat weet leuens en diefstal is verkeerd, dink nooit daaraan om dit te doen of te pleeg nie.

Sterk beginsels vereenvoudig ons keuses. Dit bring etiese eenvoud in ons lewens. Tog beteken dit nie ons geloof moet ons laat ophou dink nie. Geestelike volwassenheid in die Here gaan oor ’n geloof wat ons harte, ons verstand en die res van ons liggame aanraak. Dit laat ons ook eenvoudiger leef. Dit maak dat ons harte altyd in die Here se hand is. Of anders gestel, dit maak dat sy hart in ons binneste klop.