Hier Is Ek, Here

Oordenking

BEGIN MET ’N BESLUIT


Matteus het namens die Romeine belasting ingevorder. Hoe meer hy kon invorder, hoe groter was sy kommissie. Dus het hy skatryk geword deur sy eie volksgenote af te pers en te verarm. Daarom het die mense tollenaars so gehaat.


Nogtans staan Jesus op ’n dag by Matteus en sê vir hom: “Volg My!” Jesus gee nie om wie Matteus is of was nie – Hy sien net ’n mens vol behoefte en potensiaal. Jesus se reguit uitnodiging tref Matteus diep in sy hart. Hy besef dat rykdom en sukses hom nie gelukkig gemaak het nie. Dan trek hy eenvoudig ’n streep onder sy ou lewe, staan op en begin Jesus volg. Dit word die wonderlikste, sinvolste en opwindendste jare van sy lewe.


Jesus staan vandag ook by jou – ja, regtig – en sê vir jou: “Volg My!” Volg jy? Is jy seker? Volgelingskap begin met ’n kwaliteitsbesluit vir Jesus. Elkeen van ons moet dáár begin.


Here Jesus, ek hoor u stem in my hart en ek wíl U volg. Dáárvan is ek baie seker! Help my om u volgeling te wees. Amen.