Verkry Goddelike WysheidVoorbeeld

Wat is Wysheid?

As jy die definisie van wysheid opsoek, sal jy so iets kry: Kennis van wat waar of reg is, tesame met regverdige oordeel vir optrede. Ons kan die wêreldse kennis in pag hê, maar as ons nie weet hoe om dit toe te pas nie, het ons geen wysheid nie. Ons kan meer kennis as die gemiddelde mens hê, maar as ons nie weet hoe om dit sinvol te gebruik nie, is ons dwaas. 

Die belangrikste wat ons eerstens van wysheid moet weet, is dat dit van God afkomstig is. Ons lees in Psalm 111:10 NLV: "Eerbied vir die Here is die begin van wysheid" en verder "Dié wat sy voorskrifte navolg, het goeie insig."  

Dit maak tog sin, nie waar nie? Ouers verwag tog dat hul kinders hulle sal gehoorsaam. Hoekom? Omdat hulle vooruit kan sien, maar kinders nie. Indien kinders hul ouers gehoorsaam, sal hulle mettertyd "goeie insig kry" en leer dat hul ouers se raad uiteindelik ten goede was. Dit is presies so met ons hemelse Vader — Hy sien vooruit wat wag en weet wat vir ons die beste is. 

In Jakobus 3:13-18,  word Goddelike wysheid in fyn besonderhede verduidelik:

Indien jy 'n wyse en verstandige mens is, moet jy dit toon deur jou goeie gedrag en dade van nederigheid wat van wysheid getuig. As jy jaloesie en selfsug in jou hart dra, moet jy nie daarmee spog dat jy wysheid het nie, want dan praat jy nie die waarheid nie. Dié soort wysheid kom nie van Bo nie, maar is eerder aards, sinlik en demonies. Dis omdat waar daar ook al jaloesie en selfsug voorkom, jy ook wanorde en allerlei gemene dade sal vind. Daarteenoor is die wysheid van Bo allereers sonder bybedoelings, vol medelye en goeie vrugte, onpartydig, opreg. Hierdie wysheid bring jou in die regte verhouding met God, en jy moet dit gebruik om vrede te maak.

Hierdie gedeelte is vol ryke waarhede vir ons almal. Kom ons deurdink dit. Om Goddelike wysheid uit te leef, beteken dus ons is:

Eerbaar — Ons bewys eer aan almal.

Nederig — Ons probeer nie aandag op onsself vestig nie. 

Onbaatsugtig — Ons dink meer van ander as onsself.

Rein — Ons streef daarna om vlekkelose motiewe te hê.

Vredeliewend — Ons kom ooreen om in respek te verskil. 

Saggeaard — Ons neem die gevoelens van ander in ag voordat ons optree.

Genadig — Ons gee tweede kanse omdat dit aan ons gegee is.

Onpartydig — Ons bewys regverdigheid aan almal wat ons pad kruis. 

Opreg — Ons is eg, eerlik en vol integriteit. 

Deur te leer en te groei as volgelinge van Jesus, sal ons herskep word van ons ou self af na die vrygekoopte mens wat God ons roep om te word. Om saam met God in wysheid toe te neem, sal nie altyd vir die mense om ons sin maak nie. Nietemin, namate ons nuwe insigte van God leer, kan ons dit toepas en diegene om ons beïnvloed. Oor die volgende vier dae van hierdie leesplan, sal ons die hulpmiddels kry wat ons nodig het vir hierdie reis om Goddelike wysheid te bekom.