Hantering Van AngsVoorbeeld

Hoe vind jy vrede en verligting van angs? 

Terwyl hierdie leesplan ten einde loop, is die vraag nog steeds: Hoe vind ons vrede en verligting van angs? Hopelik het jy op hierdie stadium al 'n paar stappe ontdek en onderneem om verby angs te beweeg en vrede te ervaar. Hopelik het jy besef dat jy nie alleen is nie, dat daar hoop is, en dat God wil hê dat jy vrede moet hê. 

Om dinge af te sluit, kyk ons na die mees treffende skrifgedeelte in die mees treffende boek in die geskiedenis. Ja, ek suig dit nie uit my duim uit nie. Doen 'n Google-soektog. 

Daardie boek is die Bybel, en die skrifgedeelte word gevind in Paulus se brief aan die kerk in Filippi. Klaarblyklik was dit 'n boodskap wat mense 2000 jaar gelede nodig gehad het, en dit is 'n boodskap wat ons vandag nodig het. 

Paulus het sy brief aan 'n gemeenskap van vroeë volgelinge van Jesus geskryf wat baie teenkanting ondervind het. Omtrent soos baie van ons deesdae ervaar. Ons word gebombardeer met nuus van die een tragedie na die ander. Ons word keer op keer seergemaak. Ons sien mense vir wie ons lief is wat dag na dag ly. Ons is 'n volk met ernstige teenstand. 

Nie net dit nie, maar hierdie gemeenskap van vroeë volgelinge van Jesus het op 'n manier geleef wat in stryd was met die kultuur van hul tyd. Die kultuur van hul dag, die kultuur van die Romeinse Ryk, het geglo dat krag dit sou regmaak. Die Romeinse Ryk het geglo in die leuse: "vrede deur krag". Jesus se manier was nie om vrede deur krag te vind nie, maar om die ander wang te draai. Die Romeine het barmhartigheid en deernis as swakheid gesien. Jesus se volgelinge sien barmhartigheid en deernis as wysheid. 

Is dit nie soortgelyk aan die kultuur waarvan ons deesdae deel is nie? Ons leef in 'n kultuur wat sê dat die enigste belangrike ding jou geluk is. Kry meer. Meer volgelinge, geld, status en goedkeuring. Jesus se manier sê dat heiligheid meer belangrik is as geluk. Jesus se manier nooi ons uit om meer te gee. Meer liefde, deernis, genade en diens. Ons kultuur sê dat dit alles oor jouself gaan. Jesus se manier sê dat ons ander moet liefhê op dieselfde manier as wat God jou liefgehad het deur sy Seun Jesus. 

Ek glo dat op dieselfde manier as wat Paulus se woorde geskryf was om daardie vroeë volgelinge van Jesus aan te moedig en toe te rus, hierdie woorde jou vandag kan aanmoedig en toerus. 

Wanneer jy hierdie woorde lees, wees rustig. Gebruik soveel tyd as nodig. Vra jouself die volgende vrae: Wat het hierdie woorde vir die kerk in Filippi beteken? Wat beteken hierdie woorde vir my? Hoe kan hierdie woorde my help om vrede en verligting van angs te vind?

Uitdaging: Vier wat God gedoen het. Bid en vra die Here vir hulp. Kies om te fokus op dinge wat goed is.