Gewilde Bybelverse vanaf Remarya 8

Deel

Mer djinah, halauter vell mishto kolenge, kay o Debles kamenna. Glan rah tsiro his o Debles an peskro dji, te dell lo menshen gole, te djivenn le leha khetne.

Me djinau zoreles: Či nay lell o Debleskro kamlepen mendar krik: kek merepen, kek djipen, kek bolepangre, vitar kek čilače zorya. Či, hoy ap mende vella, kanna oun an ko tsiro, hoy vella, či, hoy pral an o bolepen hi oun či, hoy tele an i phoub hi, oun kek vavar, hoy djivella, nay krell, te kamell men o Devel bouder gar. Kova, hoy maro ray, o Yezous Kristo, menge kras, sikrell men, har baro o Debleskro kamlepen hi.

Ninna vell o Debleskro Dourho ap mari rig, kay ham gar zorelo. Te kamah mer te rakras o Debleha oun djinah gar, hoy te mangas lestar, palle rakrell o Debleskro Dourho menge i labentsa, hoy kek nay rakrell vin.

Hoy te penas mer boudeder? O Devel hi ap mari rig! Koon nay krell menge i čilačepen? Kek!

Yaake djal kek nashedo, kay djivell o Yezous Kristeha khetne.

Kolla, kay djivenn yaake, har yon kamenna, kolla merenna. Kolla, kay krenna, hoy o Debleskro Dourho lenge penella, kolla len o Debleskro djipen oun leskri barht.

O Yezous Kristo, kay kamell men o tselo djiyestar, yob krell men zoreles an lauter kova hoy ap mende vella.

Me patsau zoreles, kol douka, hoy an kava tsiro ap mende venna, hi boud boud tikneder har ko baro raylepen, hoy o Devel men della an ko tsiro, hoy vella.

Či nay lell mendar o Yezous Kristeskro kamlepen krik! Kek douka, kek daar. Ninna te lenn le men palla, ninna te hi men či te rhal oun či an-ripaske, ninna te kamenn le men čilačepen te krell, ninna te marenn le men, ko tselo koova nay lell gar o Yezous Kristeskro kamlepen mendar krik.

Oun o Devel, kay djinell, hoy an o menshengro dji hi, djinell ninna, hoy o Debleskro Dourho lestar menge mangella.

Kolla, kay shounenn ap o Debleskro Dourho, kolla hi o Debleskre čave.

Kolla, kay djivenn pengro phouro djipen, djivenn yaake, har yon kamenna. Kolla, kay djivenn o nevo djipen, hoy o Debleskro Dourho len das, kolla kamenn kova te krell, hoy o Debleskro Dourho kamella.

O Devel rikras peskro čaves gar pash peste. Yob das les menge lauterenge an o merepen. Patsenn t'mer gar, te dell lo men khetne leha kova lauter, hoy yob menge penas?

Oun o Debleskro Dourho penell menge an o dji, te ham mer o Debleskre čave. Gar kokres leskre čave ham mer. Mer lah ninna lestar ko tselo lačepen, hoy les menge hi an o bolepen. Kova lah khetne o Yezous Kristeha. Te venn douka ap mende, yaake har van douka ap o Yezous Kristo, palle krell men o Devel ninna baro oun raylo leha.

Koon kamell yaake te djivell, har yob kamella, kova kamell gar o Debles. Yob shounell gar ap kova, hoy o Devel penella. Yob nay krell les vitar gar.

Halauter, hoy o Devel kras, dikell peskro tselo djiyeha ap ko tsiro, kay o Devel halauteren sikrella, koon leskre čave hi.

Mer djinah, halauter, hoy o Devel kras, rovell oun dell gole i doukatar bis kava dives.