Tshela ka Nonofo le Bopelokgale!预览

Modimo o tlile kwa go Wena!

Tsholofetso ya botshelo jo bo sa khutleng ke ka ntlha ya go tla ga Modimo mo go rona go na le gore batho ba leke go batla le go bona Modimo mo lefelong lengwe le le kgakala.

Fa e sa le go tloga kwa tshimologong, Modimo o ratile mongwe le mongwe wa rona ka lorato lo lo sa feleng lo lo se nang selekanyo. Maikaelelo a gagwe kwa tshimologong e ne e le go nna le kamano e e nonofileng le e e tshelang le mongwe le mongwe wa rona. Le fa go ntse jalo, fa Atame le Efa ba ne ba tlola molao wa Modimo kwa tshimong, boleo jwa bone bo ne jwa dira gore go nne le sekgoreletsi fa gare ga rona le Modimo. Re ne ra kgaoganngwa le Ene ka bosakhutleng.

Go na le gore Modimo a re letle go nna re kgaogane le ene, o ne a simolola leano le le itekanetseng la go tsosolosa - le le neng le tlhotlhelediwa ke lorato lwa Gagwe le kutlwelobotlhoko ya Gagwe e e sa feleng mo go rona. Boikaelelo jwa leano la Gagwe ke go tsosolosa ka botlalo le eleng dikarolo tse di gaufi thata tsa kamano ya Gagwe le batho jaaka e ne e ntse pele ga Adame le Efa ba leofa.

Dingwaga tse di fetang 2, 000 tse di fetileng, Modimo o ne a romela Morwawe mo lefatsheng go tla go tlosa sekgoreletsi se se bakilweng ke boleo, le go dira gore batho botlhe ba bone poloko.

"Gonne Modimo o ratile lefatshe mo go kalo, wa ntsha Morwaone yo o tsetsweng a le esi, gore mongwe le mongwe yo o dumelang mo go ene a se ka a nyelela, mme a nne le botshelo jo bo sa khutleng. Gonne Modimo o ne wa se ka wa romela Morwawe mo lefatsheng gore a atlhole lefatshe, mme gore lefatshe le bolokwe ka ene". Johane 3:16-17

Jesu o ne a duela tuelo e e feletseng ya boleo jwa rona ka loso lwa gagwe le tsogo ya gagwe, mme a tlosa sekgoreletsi se se re kgaoganyang le Modimo. Boitshwarelo jono bo ka bonwa ke botlhe ba ba mo amogelang fela jaaka Mmoloki wa bone.

Mme seno e ne e le tshimologo fela. Pele Jesu a wetsa nako ya gagwe mo lefatsheng go ya go kopana le Rraagwe kwa Legodimong, o ne a tlhalosetsa barutwa ba gagwe karolo e nngwe e e botlhokwa ya leano le legolo la Modimo la go busetsa batho mo go Ene ka botlalo:

"Mo ntlong ya ga Rre (Legodimong) go na le manno a le mantsi; fa go ka bo go sa nna jalo, nka bo ke lo boleletse. Ke a tsamaya go ya go lo baakanyetsa lefelo. Mme fa ke tsamaya go ya go lo baakanyetsa lefelo, ke tla gape mme ke tla lo tseela kwa gae kwa go nna, gore kwa ke gone le lona lo nne gone". Johane 14:2-3

Modimo ga a romela Jesu fela go tlosa sekgoreletsi sa boleo, mme ka letsatsi lengwe mo isagweng Jesu o tla boa go tla go tlisa badumedi botlhe ""kwa gae"" go nna le Ene ka bosakhutleng.