Ayọ̀ fún Ìrìnàjò náà: Wíwá Ìrètí ní Àárín ÌdánwòÀpẹrẹ

Ìwé Jákọ́bù sọ fún wa wípé kí a kà á sí ayọ̀ gidi ní ìgbà tí a bá bọ́ sí inú ìdánwò. Ṣùgbọ́n kíni ayọ̀? Báwo ni a sì ṣe leè rí ì nínú àwọn ìdánwò náà?

Láìpẹ́ yìí, mo lo bí i ìwọ̀n oṣù kan tàbí jù bẹ́ẹ̀ lọ láti kà àti láti ṣe ìwádìí nípa ayọ̀, lẹ́yìn gbogbo ìwádìí náà, mo rí ìtumọ̀ tí ó rọrùn yìí:

A máa ń ní ayọ̀ ní ìgbà tí a bá fi ÌRÈTÍ wa sí inú Jésù tí a sì ní ìgbàgbọ́ nínú Rẹ̀.

Ayọ̀ máa ń wá láti inú níní ìgbàgbọ́ àti ìgbẹ́kẹ̀lé nínú Ọlọ́run, ìgbẹ́kẹ̀lé nínú ètò Ọlọ́run fún ìdánwò náà, àti ìgbẹ́kẹ̀lé nínú Ọlọ́run ní ìrìnàjò náà. Kì í ṣe pé kí á kàn gbẹ́kẹ̀ lé E nìkan, ṣùgbọ́n kí á gbà Á gbọ́, kí á sì ní ìgbàgbọ́ pé Ó mọ gbogbo ohun tí ó ń ṣẹlẹ̀, Ó sì ń mú wa la ìrìnàjò náà kọjá fún ète àti ògo rẹ̀.

Ǹjẹ́ o fi ọkàn tán Ọlọ́run nínú ìdánwò rẹ? Ṣé o ní ìgbàgbọ́ nínú Rẹ̀? Jẹ́ olóòótọ́ sí ara rẹ.

Ní ọ̀sọ̀ọ̀sẹ̀, mo máa ń bá ọ̀pọ̀ ènìyàn tí wọ́n ń d'ojú kọ ìdánwò níní ìfẹ̀ẹ́ ẹni tí ó ní ìwà bárakú sọ̀rọ̀. Gbogbo wa ni a máa ń bẹ̀rù ohun kannáà nípa àwọn ènìyàn wa: ìlò àlòjù. Mo gbàgbọ́ pé èyí wà ní ara ìdí tí ọ̀pọ̀lọpọ̀ ìyá, bàbá, àti ọkọ tàbí aya fi gbàgbọ́ pé ìjà tí ẹni tí wọ́n fẹ́ràn ń jà jẹ́ ìjà tí àwọn alára ní láti jà. A ń bẹ̀rù pé wọ́n lè di alárìnkiri kí wọ́n sì kú sí ojú pópó!

Òtítọ́ ibẹ̀ ni wípé, ó ṣeé ṣe kí ẹni tí ó ti sọ oògùn líle di bárakú bọ́ lọ́wọ́ rẹ̀, kí ó di èrò ilé ìwòsàn tàbí kí ó kú. Ṣùgbọ́n bí ó bá tilẹ̀ ṣẹlẹ̀ wípé wọ́n lo oògùn àlòjù, a gbọ́dọ̀ ní ìgbàgbọ́ nínú ètò Ọlọ́run. A gbọ́dọ̀ gbẹ́kẹ̀lé E. Nítorí pé nínú ìgbẹ́kẹ̀lé náà ni ayọ̀ wà.