Ayọ̀ fún Ìrìnàjò náà: Wíwá Ìrètí ní Àárín ÌdánwòÀpẹrẹ

Ní ìgbà tí àwọn ọmọ mi ṣì wà ní màjèsín, mo fi àwòrán ibi tí ìdílé wa ti ń rín lọ ní ipa ọ̀nà kan nínú ọgbà-ìtura sí orí ìkànnì ìbánidọ́rẹ̀. Àwòrán náà ní ìfìfẹ́hàn tó bí i 117 àti àwọn àsọyé bii:

• Àwòrán ìdílé aláyọ̀ tí ó gba'yì.
• Àwòrán yìí yẹ kí ó wà nínú fọ́rán ìpolówó ọjà kan ní ibì kan
• Mo fẹ́ràn rẹ̀!
• Ìdílé tí o rẹwà d'ọ́ba!

Ṣúgbọ́n àwòrán náà ń ṣe àfihàn ìdílé "tí ó ń díbọ́n" pé gbogbo ǹǹkan wà ní àlááfíà. Ìbá ṣe pé o wòó pẹ̀lú ìwòye mi ni, ìwọ ìbá rí:

• Bàbá tí ó jẹ́ pé ó ṣeéṣe kí ó ti mu ọtí yó.
• Àwọ́n arẹwà ọmọ àti aláìṣẹ̀ tí wọn kò mọ ohun tí ó ń lọ, tí ó jẹ́ pé wọ́n ní ẹ̀tọ́ sí àwọn òbí ọlọ́pọlọ pípé ṣúgbọ́n tí ó jẹ́ pé bàbá wọn kò bìkítà fún ìgbésí ayé wọn.
• Ìyá tí ó jẹ́ pé ó ń jẹ oró nínú ìrora àti ìbínú, tí ó kàn ń fi tipátipá rẹ́rìín músẹ́, tí ó ń díbọ́n bí i ìdílé pípé, díbọ́n bí i ẹni tí ó ní ìdùnnú. Ìyá kan tí ó jẹ́ pé ó ń ronú bóyá ìgbésí ayé òun tilẹ̀ lè dára rárá, tí kò lè dáàbá àti wo ọkọ rẹ̀ l'ójú, tí ó ń pòǹgbẹ kíkankíkan pé kí ìgbésí ayé òun dára sí i ṣùgbọ́n tí kò ní ìrètí pé ó lè rí bẹ́ẹ̀.
• Ìdílé tí ó wà nínú ìjì líle tí à ń pè ní ìwà bárakú.

Ní àìpẹ́ yìí, mo tún fi àwòrán ìdílé wa bí a ti rí ní ìsinsìnyí. Ó ní ìfìfẹ́hàn bí i 150 àti àwọn àsọyé bí i:

• Ẹbí tí ó rẹwà
• Mo fẹ́ràn ẹbí yìí gan an ni.
• Àwòrán ńlá ti ìdílé tí ó wu'yì púpọ̀
• Àwòràn tí ó gba'yì

Ní àsìkò yìí, àwòrán yìí ṣe àfihàn ìdílé tí wọ́n ti wà ní—tí wọn yíó sì tún máa wà ní—ìrìnàjò ìmúláradá. Mo wòó mo sì rí:

• Bàbá tí ó bìkítà fún àwọn ìgbésí ayé ọmọ rẹ̀, tí ó ń la ètò ìmúláradá kọjá, ẹnití ó ṣe àyẹ̀wò pẹ̀lú onígbọ̀wọ́ rẹ̀ ní ìṣẹ́jú díẹ̀ ṣáájú kí ó tó ya àwòrán yìí.
• Àwọn arẹwà ọmọ tí wọ́n rí àwọn òbí wọn ọlọ́pọlọ pípé tí wọ́n ń lépa ìmúláradá nípasẹ̀ àwọn ìpàdé, ìgbàmọ̀ràn, àti ètò onígbọ̀nwọ́.
• Ìyá tí ó ni agbára, tí kò níílò láti díbọ́n ṣùgbọ́n tí ó lè sọ ní òtítọ́ ohun tí òun ń là kọjá.
• Ọkọ àti aya tí wọ́n ti ṣe iṣe kára láti ṣe àgbékalẹ̀ ìgbẹ́kẹ̀lé àti ìgbéyàwó tí ó ní agbára lónìí jú ìgbà tí ìwà bárakú ń j'ọba lórí wọn lọ.
• Ìdílé tí wọ́n nífẹ̀ẹ́ ara wọn, tí wọ́n sì ń ṣe àtììlẹ́yìn fún ara wọn, tí wọ́n kò tijú láti sọ wípé ǹǹkan kò ì tíì gún régé tó nítorí pé wọ́n ń rìn ìrìnàjò ìmúpadàbọ̀sípò
• Ìdílé tí ó tí ṣe àwárí àlááfíà, ìrètí, àti ayọ̀.

Ìdìlé rẹ lè dàbíi ti àkọ́kọ́… tí ó ń tiraka láti ṣe àwàrí àlááfíà, ìrètí, àti ayọ̀. Tàbí bóyà ìdílé rẹ dàbí i ti ẹlẹ́ẹ̀kejì… ìdílé tí ó tí ṣe àwárí àlááfíà, ìrètí, àti ayọ̀ tí wọ́n sì tẹ̀síwájú nínú ìrìnàjò wọn.

Láìbìkítà irú “àwòrán” tí ó bá ọ mu jùlọ, Ọlọ́run wà nínú àwọn méjéèèjì.

Ọlọ́run wà ní ibẹ̀ nínú kòtò àti gegele. Ọlọ́run wà nínú àwọn ìṣẹ́gun àti àjálú. Ọlọ́run wà pẹ̀lú ẹbí mi ní ìgbà tí a ń díbọ́n, tí à ń tiraka láti wà láàyè, Ọlọ́run ṣì wà ní ibẹ̀ pẹ̀lú wa ní ìsinsìnyí bí a ṣe ń kéde oore-ọ̀fẹ́ Rẹ̀ nípasẹ̀ ìlera àti àìlágbára wa.

Bí Ọlọ́run bá wà nínú GBOGBO ipòkípò, a lè gba AYỌ̀ láàyè nítòótọ́ nínú ìrìnàjò náà nítorí pé AYỌ̀ wa wà pẹ̀lú Rẹ̀.