Matiyu, echî 7

O kâ bhíbhi ntem

(Luk 6.37-38,41-42)

1“O kâ bhíbhi ntem, Obhasi fə́ne á bhó bhibhi wâ. 2Echî aŋ? Obhasi a kí bhibhi wâ ekpak nji ó bhibha atem. Ekpak o gaê o káre ntem, nâ noŋ Obhasi a kí gaé fə́ne a káre wâ.#Mak 4.24. 3Nan kən o kí kep ńtép nnyi a ri ka eyə̂t í ntem, ńga nnyi a ri wâ ka eyə̂t a ri nkoghe? 4O kí yim nan ó sə́ré ntem se a tóŋé eyə̂t, ó yíghi yê ńtép nji nkoghe a ri ka ejâ eyə̂t? 5Ane áfúbhí! Yighî ên kpá nkoghe nnyi a ri ên ka amə̂t kən ó yén ên mbá nono ó yíghi ńtép nnyi a ri ka amə̂t atem.

6“O kâ kə̂n iyîm Obhasi ó káre mbâ ane mba á ká fon ebhú na yê. Ó karé, ó ro məŋé, á kí yim wâ ejûm noŋ kpe njô nnyi o karê nnyen ejûm kən a kpíghi a yûm wâ. O kâ kô nchot Obhasi ó sə́ré ane mba á yíri yê. Ó səre, ó ro məŋé, á kô ńnyə́ne á chêm ka akát noŋ akûk.”

Obhasi a kí karé onono mbâ ane mba á bhə́bhe

(Luk 11.9-13)

7“Bhə̂p, tîk o fôn. Nôt, tîk o tî. Sûm itə̂m, tîk á rə́bhe wâ. 8Ka kpe énê nnyo á bhəp, á kí karé yê; á not, a kí ti; á sum fə́ne itə̂m, á kí rəbhé yê. 9Nnyón nne ka ekam ejə́né nnyo mmon owe a kí bhəp yê édî, a kô a ri ntáé a káre yê? 10Nnyón nne nnyo mmon owe a kí bhəp yê nsí, a kô a ri nnyô a káre yê? 11Ájoé ên, ka ane abhí, ó riŋi ên ekpak o kí karé ên iyîm ino mbâ abhon abhə́né, ó kere ên mân sê Ńsé owəné nnyo a ri ka ósô á bhó karé onono mbi ó chíŋi obhô mbâ ane mba á bhə́bhe yê a?

12“Nâ yim ên na atem-ane ekpak o kí wom ábho á yîm na ên. Ḿfa nâ echî ebhín í Mosis na okpígha-ejûm akará-otîp Obhasi.”#Luk 6.31.

Mbá a ri ébháe, nnyi oseŋe na nnyi ekpin

(Luk 13.24)

13“Deê ó chíŋ ên ka mbá nnyi a chébhe ochép, ka chíŋ ka mbá nnyi a faŋê ofaŋ, ka ane á ti mba á kóra sê á chíŋ ka ńnyə́ne. Ejen é bhó yuŋi ka mbá nnyi faŋám nnyí, kən á jâk ka oseŋe. 14Nnyi a chébhe ochép, ejen é yuŋi é chiŋ. Ane á ká ti mba á chíŋa ka ńnyə́ne. Ńnyi nâ á jak ka ekpin.”

O kí məŋé étí ka nkap eye

(Luk 6.43-44)

15“Kô ên ebhú na akará-otîp Obhasi mba áfúbhí. Á bha mbâ eyəné, ó yen se anyen-ane kən ka etím á bhip á chiŋi ochíŋ. 16O kí məŋé ábho ka oyima-ejûm ábho. Nne á bhó bhoŋ ńchít ka étí ajoŋe. Nne á bhó bhoŋ mbaŋ ka íríghí egóm. 17Nnyen étí é kábha nkap nnyi no. Kən étí ebhí é kábha nkap nnyi bhí. 18Nnyen étí é bhó kap nkap nnyi bhí, étí ebhí fə́ne nkap nnyi no, é bhó kap. 19Kpe njə́n étí mân nji é ká kap nnyen i nkap, á kí gbut á túp ka erəmta-ngûn.#Mat 3.10; Luk 3.9. 20É toŋe mân sê o kí məŋé ên akará-otîp mba áfúbhí ka oyima-ejûm ábho.”#Mat 12.33.

Mfoné-mfoné ntóbhá Jisos a ri énê?

(Luk 13.24-27)

21“É ká joé sê ó nok o bhîŋ ə̂m, ‘Ntûfâm, Ntûfâm,’ o kí gye otúi Obhasi ebhú jə́t. Kən ó yén otúi mbí, o ri ó yîm ekpak ejûm nji Ńsé omé ka ósô a wóme. 22Ofú ábhi ó si, ane etî-etî tîk á chôt mbâ amé sê, ‘Ntûfâm! Ntûfâm! E kô mbiŋ eya e kpî ane otîp Obhasi, e kô mbiŋ eya e yíghi ojê etî-etî ka ḿbə́ŋé ane mba ojê ó kára oseŋe, e yîm njok ntûm okpógha-biji.’ 23Kən mme, tîk m fê ábho bəre, ‘Ń ka nok oməŋé ên, duî ên ə̂m ka ochî, ayimá-obhí iyîm ane!’ ”#Nkôn 6.9.

Nne nnyo á fon aron, a kí top nchot amé

(Luk 6.46-49)

24“Nne mân nnyo á yuk achot amámé mmá, a yîm ka ekpak nji a yúghi, nne ányo a ri noŋ nne nnyo a fonê aron, a kí gbe njû, a jî gbê ka eránám. 25Mbúta a bhə̂t, aya a gyê a móbhe njû nnyí, mfêp a nôk, kən njû á ka gbo, ka á gbée ka eránám.

26“Kən nne nnyo á yuk achot mmá chénchén á ka yim ka ekpak nji a yúghi, nne ányo a ri noŋ énə́mé nne nnyo a kí gbe njû, a jî gbê ka ésébhe. 27Mbúta a bhə̂t, aya a gyê a móbhe njû nnyí, mfêp a nôk. Njû nnyí a gbô bhuúp.”

Okpígha-ejûm í Jisos ó kpo ane biji

28Nji Jisos a jeghê achot mmá fép echoróm, biji í kpo ane mbá na okpígha-ejûm obhê. 29Echî aŋ? Á ka kpí noŋ atóŋá-ebhín ábho, a kpíi na onyen-ane.#Mak 1.22; Luk 4.32.

Đang chọn:

Matiyu, echî 7: ETUNT

Tô màu

Chia sẻ

So sánh

Sao chép