Matiyu, echî 28
28
Jisos Krayis a chə́bhe njəm ka ekpin
(Mak 16.1-10; Luk 24.1-12; Jon 20.1-9)
1Nji ofú oyoá-biji ane Jus ó chiŋi, ndaŋa-mbá ofú ka ogəm na ofú-ofú, Meri Madarin na Meri nnyo ngá á jak ka oyəm í Jisos, á jí kép.
2Nji á síi ágo, nsi a nyíŋi ekpatə́m, ka énjel Ńtâ Obhasi a bhə̂t a bhák nnyi ósô. A chóe ntáé nnyí a yíghi ka nnyo-mbá oyəm, a kúmi ka ńnyə́ne. 3Ó yen énjel nnyó se nyaŋanya, ḿfô eye a bhárá kpóŋ. 4Ane mba á kíi nná á bhábhé oyəm, efup é gyê ábho á kə̂t, ó yen se á kpóe okpó.
5Énjel nnyó a sə́re ane-akáé mbá se, “Ka fûp ên, ḿ məŋe bəre ó woma ên Jisos nnyo á kúmi ka ego. 6Yê kpó cháŋ mfá. Obhasi a yîm yê a nyə́me ka ekʉ̂ ka ekpak nji yê a sə́re ên. Bhá yén ên eji nji a nuŋ. 7Choŋ ên ábhiî-ábhíi, choŋ osə́ré ên atóbhá abhê sê yê a nyə́me ka ekʉ̂, a râŋ ên mbá nnyi Gariri. Tîk o kpúghi ên yê ágo. Kak ên nji n sə́re ên ka echî.”
8Ane-akáé mbá á mághe mân oyəm mbí ábhiî-ábhíi na efup, kən na ekpatə́m ogyebhá-ḿbə́ŋé. Á bhéne á jí sə́ré atóbhá abhê ekpak é fábhe.
9Á kpó to á yén, Jisos a bhâ kpúghi ábho ka mbá, a sə́re ábho se, “Deê Obhasi a jóe na ên.” Ane-akáé mbá á gbô áfo ka nsi, á fî akát amê, á káre yê ejík.
10Jisos a sə́re ábho se, “Ka fûp ên, choŋ osə́ré ên atem-abhon-í-nnyen abhə́ré sê á jî nnyi Gariri, tîk á kpúghi ə̂m ágo.”
Abhábhá-oyə̂m á bhâ sə́re nji ábho á yéne
11Nji ane-akáé mbá á jíi, etʉ̂ ane mba á kíi nná sê á bhábhé oyəm í Jisos á mághe á jak ka eték, á jî sə́re ane-echî akará-agore Obhasi chénchén ejûm nji ábho á yéne. 12Nji á sə́re ábho, ane-echî mbá á chə́me achî na ane-akúí eték, á fôn ekubhi. Á káre ane mba á bhábhe nná oyəm mbí njok i ntí. 13Á sə́re ábho sê, “Sə́re ên ane sê ane mba á tóbha Jisos nâ á bháe na atʉ́, ebhú ên o kí yae, á bhâ jʉ̂ biji Jisos. 14Ntûfâm eték á yuk, kən a kére ekpak etat na ên, tîk e gyími ên ka njəm, kpe ejûm tîk á bhó yim ên.” 15Ane mbá á kâm fə́ne á bhâ yîm ka ekpak nji ábho á kóe ntí sê á yîm. Ta é si égyé, ane Jus á nyə́ne á səra á kamá sê atóbhá Jisos á jʉ́i biji ibhê ojʉ ka oyəm.
Jisos a fâp ágbán abhê ka ochî
(Mak 16.14-18; Luk 24.36-49; Jon 20.19-23; Etûm 1.6-8)
16Ágbán í Jisos ófó na yót á jak ka egúí etat ka Gariri, eji nji Jisos a sə́re se á kpúghí yê.#Mat 26.32; Mak 14.28. 17Nji á yéne yê, á gbô yê ka akát, á káre yê ejík. Kən etʉ̂ ábho á nyə́ne á ka kam. 18Jisos a tên biji á kpúghi ábho a sə́re ábho se, “Á kare ə̂m chénchén ikom ka ósô na ka nsi. 19Choŋ ên mân ka nték i ngun chénchén, yim ên ane á tóp ə̂m. Fûk ên ábho ayép ka mbiŋ i Ńsé na Mmon na nnyi Obhasi Ebhare Ntʉgantʉ.#Etûm 1.8. 20Kpî ên ábho á yîm chénchén nji n sə́re ên. Məŋê ên, ên áfoné, sê n kí joé na ên chénchén ebhú ta ngun a mân.”
Đang chọn:
Matiyu, echî 28: ETUNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Ejagham New Testament © Bible Society of Nigeria and Bible Society of Cameroon, 1996.
