Matiyu, echî 26

Á bhop ekubhi sê á yúi Jisos

(Mak 14.1-2; Luk 22.1-2; Jon 11.45-53)

1Nji Jisos a jeghê ekpíím achot mmá chénchén, a sə́re atóbhá abhê se, 2“Ó məŋe ên sê erom í Ntə̂m Osʉ́ŋ é kət mfín ébháe. Nâ ebhú nji á kí fi Mmon-i-ntem-nne á káre sê á kúm ka ego.”#Ane 12.1-27.

3Ane-echî akará-agore Obhasi na ane-akúí eték á chə́me achî ka ókʉ́rí ntûfâm akará-agore Obhasi á kamá se Kayifas. 4Nji á chə́me, á chôt á kâm sê á fî Jisos ka ebhə̂t, á yúí. 5Kən á bhâ kére nyamḿ sê, “Ée, tîk é bhó yim ejûm njí ka ebhú erom, ane á bhá túp nchot.”

Nne-nkáé yót a rʉ́ri Jisos mbít

(Mak 14.3-9; Jon 12.1-8)

6Ka ebhú áji, Jisos a ri ka eték í Betani, ka njû Simun nnyo mmaŋa-efunum. 7Nne-nkáé yót a gyê na akʉ́ etat ka otʉ arabásta é sʉ́i. Akʉ́ mmá á kpóe ntí kpe-eji, á fóne énoê egyʉ. Nji a yéne Jisos a kun a dík édî, a yʉ́ri yê akʉ́ mmá ka echî.#Luk 7.37-38.

8Kən nji atóbhá Jisos á yéne ejûm njí, é yâm ábho é kpô. Á bhə̂p mân sê, “Bhaghé énə́mé o bhíbhá ejûm nná? 9Akʉ́ mmá á rî mma kə́n á kó á gúri ka ekpatə́m í ntí mmi á kí karé akpák.”

10Kən Jisos a mə́ŋe ejûm nji ábho á kéra, a bhə̂p ábho se, “Ó kará ên nne-nkáé nnyó ńtə́mé jen? A yîm ekpatə́m ejûm a káre ə̂m. 11Akpák tîk á jóe mfá na ên chénchén ebhú, mme tîk ḿ bó joé.#Otira 15.11. 12Nne-nkáé nnyó a rʉ́ri ə̂m áno mbít ka akʉ́ mma a yʉrî ə̂m nná ka biji. 13Deê ń sə́ré ên bəre kpe njə́n eji ka ngun ndə́m nji á kí səre otîp ogyebhá-ḿbə́ŋé Obhasi, á kí səre nchot nnyí ka etirím nne-nkáé nnyó.”

Juda a kâm Jisos egurúm

(Mak 14.10-11; Luk 22.3-6)

14Ḿgbán i Jisos yót ka ágbán abhê ófó na ábháe, a kamá se Juda Iskariyot, a yə̂p a jak mbâ ane-echî akará-agore Obhasi. 15A bhə̂p ábho se, “Tîk o káre ên ə̂m jen ájoé ń karé ên Jisos?” Ane mbá á fân abhon iyîm esam njəm ófó nâ ntí mmi á káre Juda.#Sak 11.12. 16Éróghé ka ebhú áji, Juda a róghe mân ewómóm énoê ebhú nji yê a kí gurí Jisos.

Jisos a kí tʉrí biji á dí erom í Ntə̂m Osʉ́ŋ

(Mak 14.12-21; Luk 22.7-13,21-23; Jon 13.21-30)

17Ndaŋa-mbá ofú mbi Erom Édî Ábhiî-Ábhiî Eyámám ó si. Ágbán í Jisos á bhâ bhə̂p yê sê, “O wóme se é dí ejə́ré erom í Ntə̂m Osʉ́ŋ fan?”

18Jisos a tíbhi ábho se, “Choŋ ên ka eték, tîk o kpúghi ên nne-ndûm yót. Sə́re ên yê sê, ‘Ńsé owəné se ebhú ejê é si, yê a kí wom a dí ejê erom í Ntə̂m Osʉ́ŋ ka njû eya na ágbán abhê.’ ”

19Ágbán mbá á jak fə́ne á jî yîm noŋ Jisos a tíbhi. Á jî yîm édî Ntə̂m Osʉ́ŋ njí, á tʉ́ri á kî. 20Egu é kpó to é sí, Jisos na ágbán abhê ófó na ábháe, á kúmi á dí édî.

21Nji á dîk, Jisos a sə́re ábho se, “Deê ń sə́ré ên bəre nne owəné yót tîk a gúri ə̂m.”

22Nsae a súi óbhə́ŋé ágbán abhê kpe-eji nji á yúghi ntʉ́ghi nchot nnyí. Á róghe mân ebhə́bhə́m yê yóré-yóré sê, “Ntûfâm, ń kere bəre mme asík?”

23Kən Jisos a táme ábho se, “Nne nnyo a kí gurí ə̂m áno a kí di okpere édî bhə́t na mme.#Nkôn 41.10. 24Mmon-i-ntem-nne tîk a kpô ka ekpak nji á séŋe, kən tîk é bhîp é chîŋ na nne nchane nnyo a kí gurí yê. Kə́n é nôp é chîŋ á kâ jî ntʉ́ghi nne ányo ojí bhúghí-bhúghí.” 25Juda nnyo ngurá-gúrá a bhə̂p fə́ne Jisos se, “Ńsé, ó bhó kere se mme nâ ń gurá wâ?”

Kən Jisos a táme se, “We ḿfoné nâ o chorê áji.”

Ntə̂m édî egu Ntûfâm

(Mak 14.22-26; Luk 22.14-20; 1 Korin 11.23-25)

26Nji á kûn á kí di édî njí, Jisos a kə̂n édî njí a fî. A káre ekûp mbâ Obhasi, a kíri ńjə́ne a káre mbâ ágbán abhê, a sə́re ábho se, “Kô dî ên. Ḿfa nâ biji ibhámé.”

27A yûŋ fə́ne nkôp na aməm ka etím, a káre ekûp mbâ Obhasi. A káre mân mbâ ágbán abhê, a chôt se, “Kô ên gwô, sîk ên atem. 28Ḿfa nâ agyʉ́ŋ amámé mma á tóŋe ńgyímí nnyi Obhasi a fonê na ane ngun. Agyʉ́ŋ amámé á kí gbo ka nsi kən Obhasi a rî nsôn a sû obhí ane etî-etî.#Ane 24.8; Jer 31.31-34. 29Deê ń sə́ré ên bəre tîk ń do kpó gwo aməm mmá kpát ta ofú n kí gwo mma fê na ên ka otúi Ńsé omé.”

30Á kôn ekôn, á mághe fə́ne á jak nnyi Egui Orif.

Jisos se Pita tîk a táŋe yê

(Mak 14.27-31; Luk 22.31-34; Jon 13.36-38)

31Jisos a sə́re mân ágbán abhê se, “Ka atʉ́ mma égyé, ên chénchén tîk o bê ə̂m, ka á séŋe sê, ‘Obhasi tîk a yúi mbábha-obhúi, tîk ekam obhúi é chât.’#Sak 13.7. 32Kən ḿ kpo, Obhasi a yîm ə̂m n chə́bhe njəm ka ekpin, n kí raŋ ên mbá nnyi Gariri.”#Mat 28.16.

33Kən Pita a táme yê se, “Kpe atem á bée wâ chénchén, mme ḿ bó be wâ bhúghí-bhúghí.”

34Jisos se, “Deê ń sə́ré wâ bəre ka atʉ́ mmá, kən ndûm nkok a bhâ kûk, we áji o kí taŋé se ó ka riŋí ə̂m ntə̂m-ntə̂m ésá.”

35Pita se, “Kpe é fábhe sê á yúí ə̂m na we, ḿ bó taŋé bəre ń ka riŋí wâ.”

Ágbán mba ngá chénchén á chôt ejûm njí jə́t.

Jisos a jî góre Obhasi ka Gesemani

(Mak 14.32-42; Luk 22.39-46)

36Jisos a kô ágbán abhê a jâk ka eji etat nji á bhíŋa sê Gesemani. Nji á síi ágo, a sə́re ábho se, “Kumî ên mfá, mme ń jí góre Obhasi ebhat nji ńgô.”

37A kô Pita na abhon í Sebedi ábháe mbá á jak. Ekpatə́m onoghá-ḿbə́ŋé na nsae a súi Jisos ka biji.

38A sə́re baPita se, “Nsae nnyi a ri ə̂m ka biji a fâŋ a chîŋ, kpe eyúúm tîk a yúi ə̂m. Kumî ên mfá na mme, é bhábhé.”

39A mághe mân ábho áfo, a tə̂n ochî. A gbô a bhúi ochî ka nsi a kí goré Obhasi se, “Ńsé, ájoé kə́n é jên, yim oseŋe mbí ó fúní ə̂m. Kən deê é dʉ̂ ka okorá-ḿbə́ŋé obhâ, ekpak nji mme n wóme asík.” 40A rúi ngyím a jak a jî yên ágbán abhê mbá ásá á kí yae.

A bhə̂p Pita se, “Jen kən ên ta ane ásá ó ka bhik ên ejoóm ka ibhábhé kpe ka áwa mát na mme? 41Ka yáé ên! Gorê ên Obhasi sê ó fôn ên osoná-ḿbə́ŋé ka oseŋe mbi ó kə́ bha! Ḿ məŋe bəre ḿbə́ŋé a korá, kən amə̂t á kí rap.”

42Jisos a kpô maghé ábho ka osúí ntə̂m ébháe a jî góre Obhasi se, “Ńsé, ájoé oseŋe mbí ó woma se ta ń yén, kən nchot a man, chénchén a ri okorá-ḿbə́ŋé obhâ.” 43A kpô chəbhé njəm ka osúí ntə̂m ébháe, a bhâ kpúghi ágbán abhê ka eyô, ka eyô é tuŋ ábho kpe-eji. 44Jisos a kpô chəbhé njəm ka osúí ntə̂m ésá a jî kpô goré Obhasi ekpak njí jə́t. 45A chə́bhe njəm a bhâ kpúghi ágbán abhê ka eyô.

A bhə̂p ábho se, “O nyə́ne o yáá ên eyô, o yoá ên biji a? Ńgyê, ebhú nchane é si, á guri Mmon-i-ntem-nne mbâ ane abhí. 46Duî ên ngyím é jî. Ńgyê, nne nnyo a gurî ə̂m a kə́ bha.”

Á fi Jisos

(Mak 14.43-50; Luk 22.47-53; Jon 18.3-12)

47Nji Jisos a nyə́ne a chorá, ḿgbán yót ka ágbán abhê ófó na ábháe a kamá se Juda a kíri. A bháe na njok ane ka ndə́p mba á fíi ntəme na akpûn. A ri ane-echî akará-agore Obhasi na ane-akúí eték nâ á túmi ábho. 48Juda a káre ekam ane njí eriŋ se, “Nne nnyo n kí tamé ngaŋ nâ nnyo ó woma ên. Fiî ên yê choŋ.”

49Nji Juda a bháe, a jak ngyím mbâ Jisos a chôt se, “Ńsé, n kí kup wâ.” A táme fə́ne Jisos ngaŋ.

50Kən Jisos a sə́re yê se, “Ntem, nji o bháe oyim, yim ńjə́ne.” Ka ngyím ányi, ane mbá á chîŋ fə́ne ka eji Jisos a gyím, á fî joók. 51Nji á fíi yê, nne yót nnyo a ri na yê a yə̂p akparanja amê a gbût otûŋ í nsʉ́ŋ nnyo ntûfâm akará-agore Obhasi.

52Kən Jisos a sə́re nne nnyó se, “Chəbhê njəm fê akparanja amâ ka mbâk, ka kpe énê nnyo a kí kən akparanja ka kpe bhaghé nchot, a kí kpo ekʉ̂ akparanja. 53Məŋê se ájoé ń səre Ńsé omé mfá-mfá bəre a bhá nyaŋe ə̂m, a kí tum nkam a chíŋi ófó na ébháe nnyi baénjel abhê á bhâ nôk ka njəm amé. 54Kən ḿ kpo yim ekpak njí, é kí yim nan kən ekpak nji Obhasi a chorê ka nwet eye é jóe ka echî.”

55A bhə̂p mân ane mba á bháe yê owúbhí se, “O bháe ên áno mme ofi na ntəme na akpûn noŋ ó tobha ên nnyágha-ejʉ̂ a? Chénchén ofú, ń kumi ka ókʉ́rí achot Obhasi m kpík ên achot, kən ó ka fi ên ə̂m jen?#Luk 19.47; 21.37. 56Kən deê ń sə́ré ên bəre achot mmá á fábha áno ka eyimím se nchot nnyi akará-otîp Obhasi a fáp ka ekpak á séŋe.”

Nchot nnyí a kpô fáp nná, atóbhá Jisos á bê fép.

Á ko Jisos á bha ka ochî atáŋá-eték

(Mak 14.53-65; Luk 22.54-55,63-71; Jon 18.13-14,19-24)

57Ane mba á fíi Jisos á kô yê á bhak ka ókʉ́rí Kayifas, nnyo a ri ntûfâm akará-agore Obhasi. Atóŋá-ebhín na ane-akúí eték á chə́me áfo. 58Pita a tóbhá ábho nyáŋé-nyáŋé ta a gyê ka ókʉ́rí ntûfâm nnyó. A gyê éré njí a jî kúmi na abhábhá-ókʉ́rí a yén nji-nji á kí yim na Jisos.

59Ane-echî akará-agore Obhasi mbá na echəme Atáŋá-eték ndə́m á nôk sê á wóm kpe nchot amoe nnyi á kí kum Jisos. 60Kən kpe noŋ ábho etî-etî á fábhe á sə́re áfúbhí sê Jisos a yîm njí, a yîm ńjî, ane mbá á ká yen kpe ejûm nji kə́n á fî Jisos.

Ane ábháe á fâp mân á sə́re sê, 61“E yúghi nne nnyó a sə́re se yê kə́n a bhíbhi ókʉ́rí achot Obhasi a chə́bhe njəm a gbê ḿbə́ne ka mfín ésá.”#Jon 2.19.

62Ntûfâm akará-agore Obhasi a rúi ngyím a bhə̂p mân Jisos se, “Nji ane mbá á sə́ra nná sê ó yim, ó ka fon kpe ejûm echoróm a?”

63Kən Jisos kpe ejûm á ka támé.

Ntûfâm nnyó a kpô chot se, “N kí bhəp wâ ka mbiŋ i mfoné-mfoné Obhasi, chimî ka ochî obhê, ájoé we Krayis, nne nnyo Obhasi a túmi se a yim ngun á sém a? We Mmon Obhasi a?”

64Jisos a táme se, “Nn̂, é rî ka ekpak o chorê. Kən deê mme ń sə́ré ên chénchén bəre éróghé ka égyé, o kí yen ên Mmon-i-ntem-nne a kun ka ekumi ejík, mkpe obhô-orûm Obhasi nnyo a fonê ikom chénchén. Tîk o yên ên fə́ne noŋ á bhəra a bhák ka átʉ́k í ngurobhú.”#Dan 7.13.

65Nji ntûfâm akará-agore Obhasi a yúghi nchot nnyí, é yâm yê é kpô ta a fî nkʉ̂ eye yê ḿfoné a wáre. A kûk se, “Nne nnyó a yîm ekpatə́m obhí a kpê na Obhasi! Echî e kí kpo wom atî-isê mba tat a ri jen? Ka ochî obhə́ré mfá, kpe énê a yûk achot abhí mma á fábha yê ka nnyo. 66Ó kere ên mân sê jen?”

Á gyʉ́i sê, “A gbô, a ri a kpó.”#Mbín 24.16.

67Á róghe Jisos oson ka ochî echóóm, á fî yê á tə̂m. Mba á súma yê osúm#Asa 50.6. 68sê, “We nnyo o ri Krayis, nne nnyo Obhasi a túmi se ó bhá yîm êt é sém, tak kpá nne nnyo a súmi wâ.”

Pita se yê á ka məŋé Jisos

(Mak 14.66-72; Luk 22.56-62; Jon 18.15-18,25-27)

69Nji Pita a kun nná ka ókʉ́rí mbí, ḿgbán i ntûfâm akará-agore Obhasi yót nnyo nne-nkáé, a bhâ chôt na yê se, “We eróŋ ó tobha Jisos nnyo nne Gariri.”

70Pita a tên ka ochî ábho chénchén se, “Ń ka məŋé kpe ejûm nji ó chorá áno.”

71Nji a téne áno, a rúi ngyím a jî gyími ka nnyo-mbá ókʉ́rí mbí. Kən mmon i nkáé nnyo tat a kpô yén yê a sə́re ane mba á rî áfo se, “Nne nnyó a ri na Jisos nnyo nne Nasaret ebhú áji.”

72Pita a kpô ten ta a gwô otí se, “Ń ka məŋé nne ányo.”

73É kpo kət mkpât ebhú, ane mba á rî áfo á bhâ sə́re Pita sê, “Nji táŋám mfá cháŋ, we a ri nne ábho, ka erə́bhe-nchot ejâ é toŋe jáé.”

74Kən Pita a chími se, “Deê Obhasi a kpəré ə̂m nnyen ekpərə́m ájoé ń səra áfúbhí. Ń səre ên bəre ń ka məŋé nne ányo.”

Ka nkúbhi ebhú áji, ndûm nkok a kûk. 75Pita fə́ne a bhâ tît nchot nnyi Jisos a sə́re yê se, “Kən nkok a bhá kuk, we, Pita, tîk o táŋe ntə̂m-ntə̂m ésá se ó ka məŋé ə̂m.”

Nji Pita a tirî nchot nnyí, a rúi ngyím a fábhá ka eyâ-eték a gárá na ekʉ̂, a jak.

Đang chọn:

Matiyu, echî 26: ETUNT

Tô màu

Chia sẻ

So sánh

Sao chép