Matiyu, echî 22
22
Egan nji á fíi erom ebháé
(Luk 14.15-24)
1Jisos a kpô túp egan etat se, 2“Otúi Obhasi ó rî noŋ ntûfâm yót nnyo a yaghê ane se á bhá erom ebháé mmon owe. 3Ntûfâm nnyó a bhâ yíghi ágbán abhê a tûm se á jî bhîŋ ane mba yê a yaghê erom se á bhá, ebhú é si. Kən nji á jíi á jî bhîŋ ábho, nne nnyo a wóme ebháám cháŋ. 4A kpô túm ágbán mba tat se á jí sə́ré ane mbá se, ebhú é si, á yui ofoŋ, á yam chénchén iyîm á ki, erom é si. 5Kən ane mbá kpe nne ábho nnyo a kpô fon ebhú na erom njí cháŋ. Kpe énê a chə́bhe a kérá a ri amê afoghe. Yót a yə̂p a jak yê ebhin, nnyo tat a jak ka njû ogəm eye. 6Etʉ̂ mba tat á yóŋe á yama a ri ḿbə́ŋé na ágbán mbá. Á fî ábho, á tə̂m etʉ̂, á yúi etʉ̂. 7Kən ḿbə́ŋé a bhâ yâm ntûfâm nnyó kpe-eji, a tûm ane-enok abhê á jî yúi ane mba á yúi nná ágbán abhê, á ríghi nték ábho.
8“A bhâ bhîŋ ágbán abhê a tûm se, ‘Ebhú erom ejámé é si, kən ane mba n yaghê á ká bhik ebháám erom njí. 9Nâ choŋ obhiŋ ên mân ane, kpe á rî ka akpe obhâ, bhiŋ ên kpe énê nnyo o yéne ên se a bhá erom.’ 10Ágbán mbá á jak á jî kpáe ane ka mkpak ka mkpak, ane ano oo, mba bhí oo, á kô á bhak, njû ebháé a súi kpe esogha-mmî.
11“Nji ane á gyée njû á sui, ntûfâm nnyó a gyê se yê a yén chénchén ane mba á bháe. A jî yên nne nnyo á ka kak éfô ebháé.
12“A bhə̂p nne nnyó se, ‘Ntem, é yími nan kən we o gyê mfá, nkʉ̂ ebháé ó ka fon?’
“Nne nnyó á ka támé kpe nchot. 13Ntûfâm nnyó a káre ikom se ágbán abhê á fî nne nnyó á bhóp akát na abhô, á túp ka éré, a kə́t ágo ka ejírim. Tîk a kə̂t a rʉ́rá ekpatə́m ekʉ̂, a dík akek.”#Mat 8.12; 25.30; Luk 13.28.
14Jisos a jéghe mân nchot eye na mmon egan se, “Tîk á bhîŋ ane etî-etî, kən mba á kí saŋ á bhó ti.”
Ebhə̂p í ntí-echî ekarám
(Mak 12.13-17; Luk 20.20-26)
15Ane echəme Farasi á jak á jî kúbhi sê á bhá gáe Jisos na bibhə̂p, a gbo. 16Á tûm etʉ̂ ane mba á tóbha ábho na mba á tóbha Erot á jî bhə̂p Jisos sê, “Ńsé, é məŋe sê, we áfúbhí ó bhó chot, ó chorá ka echî ekpak ejûm nji Obhasi á woma mbâ ane ngun, ó bhó kep nne ka ochî. Ńgyímí nne, ó bhó koŋ. 17Kən sə́re êt mân ejûm nji o kére. Nâ-ngá é rî nono sê é káre ntí-echî mbâ Ntûfâm i Rom, kən é ká nop?”
18Kən Jisos a mə́ŋe ńtimî mbí ábho. A sə́re ábho se, “Ane áfúbhí! Ó gaá ên kpá énê? 19Bhá tóŋé ên ə̂m ntí mmi ó kok ên áno o kará ka ntí-echî.” Ane mbá á jî kô fə́ne á bhak.
20Nji á tóŋe yê á bhə̂p ábho se, “Efóŋé énê na mbiŋ énê a ri áno ka ntí mmí?”
21Á táme sê, “Ntûfâm i Rom.”
22A sə́re mân ábho se, “Karê ên mbâ Ntûfâm i Rom iyîm í Ntûfâm i Rom, o káre ên mbâ Obhasi iyîm Obhasi.”
É mân ane mbá biji kpe-eji ka ekpak nji Jisos a táme ábho ebhə̂p njí. Á mághe á jak.
Á bhə̂p Jisos ebhə̂p ka nchot echəbhə́m njəm ka ekpin
(Mak 12.18-27; Luk 20.27-40)
23Ka ofú ábhi bhə́t, etʉ̂ ane echəme Sadusi, á bhak á bhá bhə́p Jisos ebhə̂p. Ane mbá nâ á ká kam sê nne á kpo, tîk a nyə́me ka ekʉ̂.#Etûm 23.8. 24Á bhâ bhə̂p Jisos sê, “Ńsé, Mosis a chorê se nne á ko nkáé kən a kpô, abhon á ka maghé, deê mmon-i-nnyen i ndûm a kó nkáé nnyó á jí abhon mba mmon-i-nnyen owe.#Otira 25.5. 25Kən ka ebhú éməné, abhon-í-nnyen á rî anígisá ka eték njí. Nnyo ndaŋa-mbá a bhâ kô nkáé, kən a bhâ kpô, mmon á ka jí. Enyeré ejê é bhâ kô nkáé nnyó. 26Yê fə́ne a bhâ kpô, mmon á ka maghé. Osúí ásá a bhâ kpô fə́ne, mmon á ká fon na nnyo nne-nkáé nnyó. Áno-áno, ta abhon-í-nnyen mbá anígisá á kpô, nne nnyo a maghê mmon cháŋ. 27Nne-nkáé nnyó a bhâ jéghe fə́ne okpó. 28Ka ofú mân mbi á sə́ra nná sê ane tîk á nyə́me ka ekʉ̂, nne-nkáé nnyó a kí joé nkáé énê, ka chénchén abhon-í-nnyen mbá á joe arûm abhê?”
29Kən Jisos a táme ábho se, “Íkíkéré ifə́né cháŋ ka mbá. Nan? Nne owəné kpe yót nnyo a məŋê achot mma á séŋe ka nwet Obhasi cháŋ. Ó ka məŋé ên fə́ne ikom mfi Obhasi a fonê. 30Echî aŋ? Ebhú ane á nyə́me ka ekʉ̂, á kí joé noŋ baénjel ka ósô, nchot ebháé á ro kpó chot. 31Ka nchot nnyi nne a kpó a chəbhé njəm ka ekpin, ó ka yúk ên tîk nchot nnyi Obhasi a chorê se 32yê a ri Obhasi Abraham, Obhasi Isak na Obhasi Jakop. Nâ é toŋe sê Obhasi á ka joé Obhasi ekʉ̂, kən a ri Obhasi ekpin.”#Ane 3.6.
33Ntʉ́ghi okpígha-ejûm mbí ó kpô ane biji kpe-eji.
Bhaghé ebhín nâ é chíŋi atem bibhín?
(Mak 12.28-34; Luk 10.25-28)
34Ebhú ane echəme Farasi á yúghi sê Jisos a chíŋi ane echəme Sadusi mba á bháe yê ogaé, á chə̂m ekam á bhak mbâ eye. 35Nne yót ka ekam njí, ntóŋa-ebhín, ka mbá ogaa-ane, a bhə̂p Jisos se, 36“Ńsé, bhaghé ebhín nâ é fáŋe é chíŋi atem bibhín?”#Luk 10.25-28.
37Jisos a táme se, “Kot Ńtâ Obhasi owa na ḿbə́ŋé eya chénchén, na ńtʉgântʉ eya chénchén, na íkíkéré ifâ chénchén.#Otira 6.5. 38Nâ ndaŋa-mbá ebhín nji é fáŋe é chîŋ ochíŋ. 39Enyeré ebhín nji é rî fə́ne noŋ nji ndaŋa-mbá é rî sê, deê ó kôt ntem-nne ka ekpak nji o korê biji ibhâ.#Mbín 19.18. 40Chénchén ebhín í Mosis, na okpígha-ejûm akará-otîp Obhasi í dʉ̂ ka bibhín mbí íbháe.”
Nne nnyo Obhasi a túmi a ri mmon énê?
(Mak 12.35-37; Luk 20.41-44)
41Ane echəme Farasi á kpó chəmé, Jisos a bhə̂p ábho se, 42“Krayis, nne nnyo Obhasi a túmi nná se a bhá yim ngun á sém, ó kere ên sê a ri eyábhé-mmon énê?”
Á táme yê sê, “A ri eyábhé-mmon í Debhit.”
43A kpô bhə́p mân ábho se, “Ájoé nne nnyó a ri mmon i Debhit, jen mân Obhasi Ebhare Ntʉgantʉ a karê Debhit íkíkéré se a bhiŋ nne nnyó se ntûfâm? Debhit a chorê ebhú áji se,
44‘Ńtâ Obhasi a sə́re Ntûfâm omé se,
kumî ə̂m mfá mkpe obhô-orûm
ta n yîm ane-ebhan abhâ á jóe ka óséré obhê.’#Nkôn 110.1.
45Debhit a kí bhiŋ Krayis se Ntûfâm. Krayis a kí kpo yim nan yê a joê mmon i Debhit?”
46Kpe nne ka ekam áji nnyo a fonê kpe ejûm a kí tame Jisos cháŋ. Éróghé ta ka ofú ábhi, nne nnyo a kpô gaé a bhə̂p yê ebhə̂p cháŋ.
Đang chọn:
Matiyu, echî 22: ETUNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Ejagham New Testament © Bible Society of Nigeria and Bible Society of Cameroon, 1996.
