Matiyu, echî 18
18
Énê a ri ntûfâm ka otúi Obhasi?
(Mak 9.33-37; Luk 9.46-48)
1Ka ebhú áji, atóbhá Jisos á bhâ bhə̂p yê sê, “Énê a faŋê a chíŋi ntem ka otúi Obhasi?”#Luk 22.24.
2Jisos a bhîŋ mmonche a gyími ábho ka ochî. 3A sə́re mân ábho se, “Deê ń sə́ré ên bəre nne nnyo á ka yóŋé ḿbə́ŋé eye, a joé jáé noŋ nnyi mmonche, á bhó yen otúi Obhasi bhúghí-bhúghí.#Mak 10.15; Luk 18.17. 4Məŋê ên mân sê nne nnyo a faŋê a chíŋi ntem ka otúi Obhasi a ri yê nnyo á ko biji se kpe ejûm yê á ka fáp noŋ mmonche ntʉ́ghi nnyó. 5Kpe énê nnyo á fi ntʉ́ghi mmon nnyó a kâk ka biji ka mbiŋ amé, a fiî ə̂m áno.”
Nchot obhí eyimím
(Mak 9.42-48; Luk 17.1-2)
6“Kpe énê nnyo á choe mmonche ntʉ́ghi nnyó a yíghi ḿbə́ŋé nnyi a kíi na mme, é nôp é chîŋ á kô ekpatə́m í ntáé isú á bhôp ntʉ́ghi nne ányo ka ntuŋ, á bhî ka aya. 7É bhip é chiŋi ochíŋ na ngun nnyí nji iyîm í rî mbi í kí yim nne a yighí ḿbə́ŋé na Obhasi. Iyîm mbí í rî ka efábhám, kən tîk é bhîp é chîŋ na ntʉ́ghi nne ányo nnyo a kí yim ḿbə́ne í fáp.
8“Ájoé mân kpe a ri obhô obhâ kpe ekát nâ í kí kak wâ ka obhí, gbût bhum. É nop é chiŋ sê nne a gyé ka ekpin nji eyô biji ejê jə́t cháŋ, na nji a gyé ka erəmta-ngûn oseŋe ka ótúm-ótúm na ayô biji ekan-ékân.#Mat 5.30. 9Ájoé eyə̂t ejâ é kí kak wâ ka obhí, kpaghê ńjə́ne bhum. É nop é chiŋ sê ó gyé ka ekpin na eyə̂t jə́t na nji ó fôn ḿmáne ábháe chénchén, ó gyé ka erəmta-ngûn.”#Mat 5.29.
Egan í njo-mbúi nnyi a táne
(Luk 15.3-7)
10Jisos se, “Nne a kâ kêp kpe mmon yót mfá se kpe ejûm á ka fáp. Deê ń sə́ré ên bəre ka otúi Obhasi, baénjel mba Obhasi a kíi se á bhábhé abhon mbá nâ á kúma á kpira na Ńsé omé ka ósô. [ 11Mmon-i-ntem-nne a bháe ka nsi nnyí a bhá yim ane mba á táne, á chə́bhe njəm ka nnyen-i-mbá.]#Luk 19.10.
12“Kére ên kpá nchot nnyí. É kó sê nne owəné yót a fôn nsam i mbúi érôn, kən mbúi yə́t a tân. Ó kere ên sê nne nnyó a kí yim nan? A ri a maghé mbi ngá ka eji édî a jí wom nnyi a táne áno. 13Deê ń sə́ré ên bəre ebhú nne nnyó á wom kpát ta a yên, a kí fon ogyebhá-ḿbə́ŋé ka obhô mbúi nnyí a chíŋi mbi ngá mbi ó rî ka njû kpe ejûm é ká yim ábho. 14Ka ekpak njí fə́ne nâ Ńsé owəré ka ósô á ka wóm se kpe mmon nnyó yót a tán.”
Ntem á yim wâ obhí, o kí yim nan?
15Jisos se, “Ájoé ntem a yîm wâ obhí, choŋ mbâ eye, yim yê a məŋé ejûm ebhí nji yê a yimî wâ. Ka yîm se ngun ndə́m á mə́ŋe, deê é kə́t na ên ábháe. Ájoé nji o sə́re yê, a yûk, məŋê se ó chəbhe njəm ó ko ekone ó bha ka étíŋanti ejə́né.#Luk 17.3. 16Kən ájoé á ka yúk, bhiŋ kpe ntem yót, kpe ábháe, choŋ ên mbâ eye, a gyímí wâ noŋ ntî-isê. Kən nchot a joé mfoné nchot, deê atî-isê á jóe á sí ábháe, á sí ásá.#Otira 19.15. 17Ájoé ó jî chôt ên na ntem nnyó kən á ka yóŋé, sə́re mân nchot nnyí ka echəme atóbhá abhámé. Nji á ka kpó yuk fə́ne mfá, nâ kêp ên yê ńgô chichi noŋ nne nnyo á ka bhik ejoóm ka echəme ejə́né. Kêp ên yê fə́ne noŋ nyima-obhí.
18“Deê ń sə́ré ên bəre kpe jen nji ó səre ên ka nsi nnyi sê nne a kâ yîm áno, nâ noŋ á kí ko fə́ne ka ósô. Nji ó kam ên sê nne a yim áno, nâ noŋ á kí ko ka ósô.#Mat 16.19; Jon 20.23.
19“Deê ń sə́ré ên m kpê bəre kpe bhaghé ebhú nji ane ábháe mba á tóbha Obhasi á kumí ka eji á kâm sê á góre Obhasi a yim ejûm a karé ábho, Ńsé omé ka ósô a kí yim ńjə́ne a karé ábho. 20Kpe bhaghé eji nji ane á kumí á sî ábháe na ásá, ka mbiŋ amé, mme n di áfo na ábho.”
Ḿgbán nnyo nsôn á bhó fon na ntem
21Pita a bhâ bhə̂p Jisos se, “Ntûfâm, ntə̂m ébhík nâ ntem a kí yim ə̂m obhí kən n dik yê nsôn? Ntə̂m enígisá a?”
22Kən Jisos a táme yê se, “Deê ń sə́ré wâ bəre ntə̂m enígisá asík. O kí ri ntem nsôn ntə̂m nsam ésá njəm ófó, ntə̂m-ntə̂m enígisá.#Luk 17.3-4. 23Echî aŋ? Otúi Obhasi ó rî áno noŋ egan í ntûfâm yót nnyo a timî se yê a jeghé nchot arə́m mma ágbán abhê á fíi yê. 24A róghe ábho ebhiŋím, a bhə́bhá. Ka ebhú áji, á kô ḿgbán yót á gyê nnyo a fiî yê ntí ka otâk, ka otâk. 25Nji ḿgbán nnyó á ka fon ntí mmí ḿ bík, ntûfâm nnyó a sə́re se á gúri ḿgbán nnyó na nkáé na abhon noŋ asʉ́ŋ. Se á gúri fə́ne iyîm ibhê chénchén, á fé yê ntí imê. 26Kən ḿgbán nnyó a gbô ńsé ka akát, a góre yê se, ‘Ńsé, ń gore wâ, karê ə̂m mô ebhú, tîk n gôm arə́m amâ chénchén.’ 27Nsôn a yîm ńsé owe nnyó kpe-eji, a sə́re yê se a kpéré a kə́t na arə́m áma.
28“Nji ḿgbán nnyó a maghê a jak, a jî kpúghi ntem-ḿgbán nnyo a fiî yê mô mkpât arə́m. A fî ntem nnyó ka ntuŋ se a gom arə́m amê ka ngyím ányi.
29“Kən ntem nnyó a gbô ḿgbán nnyó ka akát a góre yê se, ‘Ń gore, karê ə̂m mkpât ebhú, tîk n gôm arə́m amâ.’
30“Kən ḿgbán nnyó á ka kam, a kô ntem nnyó a jak ka esup, á kûm yê sê ta a gôm arə́m mmá á mân, kən a fábhá. 31Ágbán mba ngá á kpó yen ejûm njí, nsôn a súi óbhə́ŋé ábho kpe-eji. Á jâk á jî sə́re ntûfâm nnyó ejûm nji ḿgbán owe ányo a yimî.
32“Ntûfâm nnyó a bhîŋ ḿgbán nnyó a sə́re yê se, ‘We a ri mfoné-mfoné nne mbí. Ń di wâ nsôn ka ekpatə́m arə́m mma o fiî ə̂m, ka o gorê ə̂m se ń dî wâ nsôn. 33O fonê kə́n ka eriím atem nsôn ka arə́m mma á díi wâ, noŋ mme n diî wâ nsôn eróŋ.’ 34É yâm ntûfâm nnyó é kpô. A kâk ḿgbán nnyó ka ókúmí á kpə́re yê se ta a gôm arə́m amê chénchén kən a fábhá eróŋ.”
35Jisos mân se, “Nâ noŋ Ńsé omé ka ósô a kí yim na ên ájoé ó bhó ri ên atem nsôn na ḿbə́ŋé fép ka obhí mbi á yími ên.”
Đang chọn:
Matiyu, echî 18: ETUNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Ejagham New Testament © Bible Society of Nigeria and Bible Society of Cameroon, 1996.
