ZYAŊ 11

Yeesus à ghèmzii Lazaari

1Ŋwaàdɛŋ ɗii lɛ Lazaari, yɛɛ roròɓkà; à ɓaghà ŋwaànɛ a Bɛtanii, ɓi kìlɔ̀ŋ ki ɓɛ-Marii ɓɛɛ̀ Maata à geni. 2Marii ànɛn yɛɛ sisìŋìghà Kan tìrààre, à ki tɔ̀si nyi mɛ̀kòò ri tyòŋ tii; nni geni Marii à baŋì yɛɛ roròɓkà lɔɔ lɛ Lazaari. 3Rìgeni ɗi ɓɛ̀yiɓ ɗiǹ, ɗi romgà mum lɛ a kali Yeesus lɛ: Kan, mum wɔɔ̀ ànɛ u keesàg, à yin cem. 4Yɛ̀ɛ Yeesus à wokà fɔlɔɔ, nni à kpaaghà lɛ: Fìroɓ fìn fi yin nyi ɓiì wowoli, fi ri ɓisuu rikem ɗi Bɛ̀ll, lɛ Man à Bɛ̀ll a teɗ rìkem ɓi fìroɓ fìn.

5Yeesus à keesìghà lɛ, rì Maata rì geni à giɓ, rì Lazaari girig. 6Yɛ̀ɛ à wokà lɛ Lazaari à yin cem, à laatìghà mɛ̀ru mɛɓɛɛ̀ ɓi jàŋ inɛ à ɓaghà. 7Ajɛ̀m ìnɛn nnɛ à kalìghà ɓɛ̀yilàg ɓii lɛ: Ti sugtiina a Zyude. 8Ɓɛ̀yilàg ɓɛ kpaa nyi lɛ: Raɓì, ki ka finɛn ɓi yɛ̀ɛ Ɓɛ̀yudɛ̀n ɓɛ m̀mɛɛ̀ rogi wɔ gɔ̀g, wɔ̀ɔ̀ ki kɔ̀ɔ̀di lɛ u sugti wɔɔ? 9Yeesus à ɓàg ɓɔ lɛ: Mɛ̀ɛ nti ŋwos a rìlàg ɓɛ̀hawò ǹtɛ̀ɗ rì ɓiɓɛɛ̀? I mum a kɛ̀ɛ̀kɛɛ ri ŋwos, à yin lɛ à ɓàgtɛ̀n, ɓisuulɛ a seesee kitɛɛtɛn ki ɓi ziinɛ. 10Wɔ̀lɛ i mum a kɛ̀ɛ̀kɛɛ ri ìru, à rì lɛ à ɓàgtɛ̀n ɓisuulɛ à yin ɗi kìtɛɛtɛn ɓi nyimiɗ. 11Yɛ̀ɛ à tòòghrɛ̀ngà fɔlɔɔ, nni à kpaaghà ɓɔ lɛ: Reŋkàŋ wìs Lazaari àa nlali, kìɓan kifog ǹɗì ɓiì kɛ̀ɛ nyi kìghèmzii. 12Ɓɛ̀yilàg ɓii ɓɛ kpaa lɛ: Kan i ki ri lɛ àa nlali di à ɓiì ɓaà lɛ syeesyee. 13Rìwu ɗi Lazaari ɗyɛɛ̀ɗi à kpaaghà, wɔ̀lɛ ɓɔɔ fekì nya lɛ fìlo fi zɛy fyɛɛ̀fi à kpaa. 14Fɔɔnnɛ Yeesus à kpaaghà ɓɔ lɛ tɛntɛ̀ɛ̀n lɛ: Lazaari à rì kìloŋ. 15Nni kìnyàà ki ri mɛ̀ kìronɛn ɓi nɗem ɓisu win lɛ, mɛ̀ɛ ǹ-yin wɔɔ, fɔlɔɔ yɛɛ ɓiì kìi lɛ ɓi gherɛn. Wɔ̀lɛ ti kɛ̀ɛna jàŋ inɛ à rì. 16Fɔɔnnɛ Tomas ànɛ ɓɛ nɗegì lɛ, Didim#11:16 Didim: Ɗii ɗi lɛ Tomas nsoò lɛ Didim ɗiri azi lɛ man à rìfas., à kpaaghà ɓɛ̀yilàg ɓɛmbog lɛ: Ti kɛ̀ɛna girig, ti wu nɗaŋ ɗi nyi.

17Yɛ̀ɛ Yeesus à kpagà wɔɔ, à tanɛ̀n di Lazaari à ti ɓi zɔ̀ŋ mɛ̀ru mɛnin. 18Yɛ̀ɛ Bɛtanii à ɓaghà jàŋbog ɗì Yorisalɛm nunùg ɓɛ̀kilòmɛɛ̀tɛ̀rɛ̀ ɓɛraa, 19Ɓɛ̀yudɛ̀n lɛɛ̀gwey ɓɛ yughày yɛ̀ɛ ɓɛ̀-Maata ɓɛɛ̀ Marii, lɛ ɓɛɛ fɔɔ̀si ɓɔ mɛ̀rem ɓi rìwu ɗi gèni wàà.

20Yɛ̀ɛ Maata à wokà lɛ Yeesus à tiì, nni à kɛ̀ngà nyi kìɓoŋì ɓi bee, Marii nyii rɔɓkà lɔŋ ki kɔ̀kɔrii ɓi nàà. 21Fɔɔnnɛ Maata à kpaaghà Yeesus lɛ: Kan, i wɔ̀ɔ nɗì fɛ, di gèni wɛ̀m àa yin lɛ à wu. 22Kìɓan kifog, ǹ-yii lɛ nsoò ɓigomìnɛ, com kìcèm ki ù rì ɓiì tɔɔ̀gh Bɛ̀ll, à rì wɔ̀ kɔ ɓiì faà. 23Yeesus à kpaa Maata lɛ: Goni à ɓiì ghèmɓɛɛ. 24Maata à ɓàg nyi lɛ: Ǹ-yii lɛ à ɓiì ghèmɓɛɛ ɓi cààmɛ̀n ki ɓìloŋ ɓi ri ɓiì ghèmɓɛɛ, ɓi ŋwos a siitòn. 25Yeesus à kpaa nyi lɛ: Mɛ̀ yɛɛ ri rìghèmɓɛ̀n ɗi ɓiloŋ, rì cɛɓ; ŋwaànɛ à gherɛɛ mɛ̀, à ɓiì ɓaà rì cɛɓ nsoò àa wìì. 26Fɔɔnnɛ mum ǹcèm ànɛ a ghɛghɛ̀ɓ à ki gherɛn mɛ, àa wu ɓi; ù gherɛɛ nya kìɓan kiǹ? 27Maata à ɓàg lɛ: Ɛ̀ɛ̀ Kan! ǹgherɛɛ lɛ wɔ̀ yɛɛ ri Kiris, Man à Bɛ̀ll ànɛ à ghɛ̀ɛ̀sɛ̀ngà kì yùu ɓi ziinɛ.

28Yɛ̀ɛ Maata à kpaaghà fɔlɔɔ, nni à kɛ̀ngà kì reŋii geni à giɓ anɛ lɛ Marii, à kɔ̀ŋɗɛ̀n nyi a dwìɗ lɛ: Ǹɗèsàg à rì fɛ, a ki regi wɔ. 29Lɔŋ yɛ̀ɛ Marii à wokà fɔlɔɔ, à ghàs kì pɛ̀sɛɛ, à kɛ̀n yɛ̀ɛ Yeesus. 30Lɛ Yeesus à ɓaghà di à ka ɗiŋi ɓi ɓi kìlɔ̀ŋ, à ɓaghà di à kaka jàŋ inɛ Maata à tulɛ̀ngà rì nyi. 31Ɓɛ̀yudɛ̀n ɓɛ ɓɛ ɓaghà ɓi naa rì Marii ɓɛ fɔɔfɔ̀ɔ̀sì nyi nɗem, ɓɛ ghɛngà lɔŋ di à mɛ pɛ̀sɛn aɗyoo lɛ fòos, à kpaŋ ɓi ɗyɔ̀m; fɔɔnnɛ ɓɛ nɔɔ̀tìghà nyi, ɓɛ fekì lɛ à kɛ̀ɛ kì rèni a zɔ̀ŋ.

32Yɛ̀ɛ Marii à kpagà jàŋ inɛ Yeesus à ɓaghà, à ghɛn Yeesus, à kpì nyi a mɛ̀kòò, à kpaa nyi lɛ: Kan i wɔ̀ɔ nɗì fɛ, di geni wɛ̀m àa ŋwii ɓi. 33Yɛ̀ɛ Yeesus à ghɛngà di Marii a rènɗèn, Ɓɛ̀yudɛ̀n ɓɛ ɓɛ ɓaghày ǹɗaŋ ri nyi ɓɛ renɗèn girig, nni nyìinyìg ì ɓangà nyi lɛɛ̀gwey, ǹɗem wu nyɛŋɗɛ̀n nyi ɓiɗùm, 34à tɔg lɛ: Fe nnɛ ɓìi mɓòmi nyi? Ɓɛ ɓaàg nyi lɛ: Kan yuiy u ghɛǹ.

35Nni Yeesus à rèngà. 36Ɓɛ̀yudɛ̀n ɓɛ kpaa min lɛ: Ghɛɛna yɛ̀ɛ àa nti à keesàg nyi. 37Gàɓ ìdɛŋ ìnɛ ɓi ɓɔ ì kpaa lɛ: Nyi ànɛ à ŋwàɗkà ɗyaŋɗyàŋ mis, àa yin lɛ à kì lɛ Lazaari kɛ̀ɛ wu?

38Fɔɔnnɛ ǹɗem wu Yeesus wu nyɛŋɗɛ̀ngà tì ɓi ɗùm, à kɛ̀n a zɔ̀ŋ. Zɔ̀ŋ ìncèm ì ɓaghà ǹtuɓɛn ɓi gɔ̀g ɓɛ simì gɔ̀g ìdɛŋ a ŋwɔm. 39Nni Yeesus à kpaaghà lɛ: Pisiina gɔ̀g ìnɛ ɓi ŋwɔm wu zɔ̀ŋ. Maata, a geni Lazaari ànɛ à wughà, à kpaa Yeesus lɛ: Kan, à ti ɓiì nùnnumi; lɛ mɛ̀ru mɛnin gɛɛ̀nɛ yɛ̀ɛ ɓɛ mɓòmi nyi. 40Yeesus à ɓàg nyi lɛ: Màa kpaa wɔ̀ lɛ i ù gherɛɛ ù ɓiì ghɛɛ rìgwey ɗi Bɛ̀ll! 41Nni ɓɛ pisìghà gɔ̀g ìnɛn, Yeesus à ɓegsì mis aɗyoo, à kpaa lɛ: Tààta ǹtògsaagh wɔ̀ ɓisuulɛ, wàa ɓàagh bɔ̀ŋzɛ̀n yɛ̀m. 42Ɓi ɓɛg wɛ̀m, ǹ-yii lɛ ù ti ù ɓàkì bɔ̀ŋzɛ̀n yɛm̀ ɓyààmɛ̀n ɓìcèm, kìɓan kifog ǹkpaa fɔlɔɔ ɓisuu ɓumɓɛ ɓɛ ri fɛ, lɛ di ɓɛɛ gherɛn lɛ wɔ̀ yɛɛ romgày mɛ̀. 43Yɛ̀ɛ à kpaaghà fɔlɔɔ, nni à pɛ̀sìghà jɛ̀ɛ̀ aɗyoo rì ìtèɗ à kpaa lɛ: Lazaari kpaŋay. 44Fɔɔnnɛ kìloŋ ki kpagày, ɓyàg rì mɛ̀kòò ɓì kàgakɛn ri ɓɛ̀ɓanɗas, ìsu wù kàŋɛn ɗi sànjà. Yeesus à kpaa ɓɔ lɛ: Fùmiina nyi, ɓi caɗ nyi a kɛǹ.

Sànèdìrɛŋ à reni lɛ ɓɛ ghɛɛ̀sɛɛ kì wolì Yeesus

(Mt. 26:1-5; Mk. 14:1-2; Lk. 22:1-2)

45Kìgwey ki ɓi Ɓɛ̀yudɛ̀n ɓɛ ɓɛ yuyùghà yɛ̀ɛ Marii, ɓɛ ghɛn kìɓan ki Yeesus à kìghà kiǹ, ɓɛ gherɛ̀ngà nyi. 46Wɔ̀lɛ gàɓ ìdɛŋ ìnɛ ɓi ɓɔ ì kɛ̀ngà kì ghɛɛ̀ Ɓɛ̀fàrìzyɛŋ, ì kpaa ɓɔ kìɓan ki Yeesus à kìghà.

47Fɔlɔɔ nnɛ ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ taŋzɛ̀ngà Sànèdìrɛŋ ɓɛ kpaa lɛ: Ti ki la? Lɛ ŋwaànɛ a kìki dàm lɛɛ̀gwey. 48I tì càri nyi lɛ a kiki fɔlɔɔ, ɓum ɓɛ̀cèm ɓɛ ri ɓiì gherɛɛ nyi, à kpaŋ yɛ̀ɛ Ɓɛ̀ròmɛŋ ɓɛ ɓiì yùu, ɓɛ yogsì lɛ rì naa yìs i Bɛ̀ll, rì kìlɔ̀ŋ kis. 49Nni mum bog ànɛ ɓi ntaŋzɛn lɛ Kayif, ànɛ à ɓaghà ǹlàmì-ɓɛ̀pìrɛɛtìrɛ̀ ɓɛgwey ɓi bèg ìnɛn, à kpaaghà ɓɔ lɛ: Ɓì yii ɓi lɔ̀ŋ com. 50Ɓì ghɛɛ ɓi lɛ ki ri mìni kìrɔɔ lɛ mum bog a wu ɓisuu kilɔ̀ŋ di fɔlɔɔ nnɛ kìlɔ̀ŋ kìcèm kɛ̀ kɛɛ̀ ɗyaŋ? 51À kpaaghà ɓi fɔlɔɔ ɓi ɗyomzɛ̀n ɗii ɗi nyimiɗ, wɔ̀lɛ yɛ̀ɛ nnyɛɛ ɓaghà ǹlàmì-ɓɛ̀pìrɛɛtìrɛ̀ ɓi bèg ìnɛ̀n nnɛ à kalìghà kìɓan ki di ki kakay, lɛ Yeesus à ghɛ̀ɛ̀sɛɛ kì wiì ɓisuu kilɔ̀ŋ ki Ɓɛ̀yudɛ̀n. 52Àa lɔŋ kìlɔ̀ŋ kiǹ kɔ rì kɔ, à ghɛ̀ɛ̀sɛɛ girig kì wiì lɛ a taŋzɛn ɓɔn ɓɛ Bɛ̀ll ɓɛ̀cèm, ɓɛ ɓɛ ri ɓɛ̀sààtɛn, ɓɛɛ ɓa kìbyɔg kìfog.

53À tumɛ̀n ŋwos anɛ̀n innɛ ɓɛ rengà lɛ ɓɛɛ wey Yeesus. 54Fɔɔnnɛ Yeesus à casɛ̀ngà kɛ̀ɛ rèsɛn ti lɛ tɛntɛ̀ɛ̀n ɓi nyìinyìm à Ɓɛ̀yudɛ̀n. À pɛ̀sɛ̀ngà foo, à kɛ̀n ɓi kòdò àdɛŋ ànɛ à ɓaghà jàŋbog rì ìreɓ, ɓi bàn ìnɛ lɛ Efirayim, à kɔ̀rì wɔɔ ri ɓɛ̀yilàg ɓii.

55Paskà à Ɓɛ̀yudɛ̀n à ɓaghà di à ti jàŋbog; ɓum lɛɛ̀gwey ɓɛ ɓi jɛ̀m yi ɓilɔ̀ŋ ɓɛ ɓɔkày a Yorisalɛm di Paskà à kakay ɓisuu zòghɛ̀n. 56Fɔɔnnɛ ɓɛ kaakààghà Yeesus, ɓɛ tɔɔ̀tɔ̀ɔ̀ghrɛ̀n wɔɔ ɓɔ rì ɓɔ ɓi naà-Bɛ̀ll lɛ: Mìnii ghɛɛ lɛ à rì lɛ à yù tìcàɓ gìn, àa yù ɓi? 57Foo ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ reɓsìghà lɛ, ŋwaànɛ à yii jàŋ inɛ Yeesus à rì, a ɓag ɓɔ gɔɔ, ɓɛɛ kɛǹ nyi kìɓanì.

Đang chọn:

ZYAŊ 11: BAFNT

Tô màu

Sao chép

So sánh

Chia sẻ