KALATE METATAʼA 19
19
Sodom a Gômor
(Hé 13:2; Met 18; Eze 16:49-50; Mm 19)
1Beéngele bebaé be nga kui Sodom mamengôʼé. Lot a mbe a too e mbé akaʼa ya tison. Eyoñe Lot a nga yene be, a nga kôlô si na a ke tôbane be, ve kute meboñ asu e buti si. 2Wôna a nga jô na: A bemonti, kôñelaʼane nné, ma yeʼelane mia, asu ya nyiin e ndaa mbo ésaé wônan a lôt alu été; sôbane mebo; mia ye kôlô si ndibe tyé a mia ye kee dulu denan ôsu. Be nga yalane na: Momo, bia ye ke lôt alu vôme nyô. 3Ve Lot a nga dañe yemete be a kui na be nga bulane mvus asu ya nyiine nda jé. A nga kôme beta ndian asu dap a bo na be yame belet é ne mvusan, a be nga di.
4Be ngenane teke bômbô si, e nde bôte ya tison, befame ya Sodom, be nga bômane nda , ataté bisoé bendôman a kui minnôm mi bôt, bôte ya bekartié bese. 5Be nga loone Lot a jô nye na: E befam ba te nyiine be wo alu di be ne vé? Boʼo be na be kui atan a zu be bia bi yeme be. 6Lot a nga kui atan a ke be be, anyiine ya nda a dibe mbé mvuse jé. 7Nye na: A bobejañ, ma yeʼelane mia, te boon abé ! 8Mi lôô, ma yeʼelane mia: me bili bengon bebaé be ngenane te yeme fam; ma yeʼelane mia, ma ye zuu mia be atan, a mia ye bo be jame mia ye yene mvaé. Ve da, te boone befame bana jam amu ba te zu éjijine ya nda jam. 9Be na: Kôlôʼô! Be beta fe jô na: Nyôna a nga zu étam ane ntabe , a a kômbô bo ntyiʼi mejô! Yeme na: Bia ye ndamane wo alôte be. Wôna éyoñ be yemeteya Lot a njet ése, be nga subu ôsu na be buʼu mbé . 10Beéngele be nga same wo, be nga bo Lot a nyiin e fefele jap e nda été a be nga dibe mbé . 11Be nga kute dim e be bôte be mbe anyiine nda , ataté nyô a dañe tyôtyoé a kui nyô a dañ anen, avale ya na be nga jalé bebiene zesé njuʼu ya yene mbé .
12Bôt be nga jô Lot na: Za ô ngenan ô bili va? Beyôme ngon, bobefam a bobebinga, a jôm ése é ne énjôé e tison été, kuliʼi be atane vôme nyô. 13Amu bia zu tyame vôme nyô, amu asu Nti, e jame ba ve bôte be too été bijô é ne anen. Nti a te lôme bia na bi tyame tison. 14Lot a nga kui atan asu ya kobô beyôme bengone bé be nga luʼu bengo bé a jô be na: Kôlaʼane si, kôlaʼane vôme nyô, amu Nti a zu jiane tison. Ve, e mise beyôme bengone bé, be nga yen ane nge a bo fianga.
15Eyoñe tyé é nga lendé, beéngele be nga yemete Lot na: Kôlôʼô si, nyoñe minga wôé a bengo bôé be ne va, mi za wu nsamba a tison ja bo abé . 16Ve a nga ke a bo minsitik; e nde befam bete be nga bi nye wo, nye, minga wé a bengo bé bebaé, amu Nti a nga kômbô nyii nye; be nga kuli nye atan a liʼi nye e tison atan. 17Eyoñe be maneya kuli be atane ya mevôm me mbe bebé valé, wua a nga jô Lot na: Tubuk, amu ényiñe jôé; te fombô mvuse jôé a te tebe e njeʼese ôse; mateʼe mfaʼa ya nkôl, ô zaa wu. 18Lot a nga jô be na: Aa! Momo, ma yeʼelane wo a Nti! 19Ma yeʼelane wo; mbo ésaé wôé a yeneya mvame jôé a ô litiya anene ya mvame jôé mfaʼa wom, éyoñ wo baʼale ényiñe jam; ve ma me se nguleya tup e mfaʼa ya nkôl, te na bidim bia fombô ma: ma ye wu! 20Ma yeʼelane wo, tame yene tison é ne ôbe bebé na me ke sobô été a é ne tyôtyoé. Ngoʼé nge me ne nguleya tup a kui valé. Ye é nji bo tyôtyoé? A na me ke ôsu a nyiñ! 21A nga jô Lot na: Tame yen, amu ésemé me bili wo éyoñe ji, ma ye bo te buʼulane tison wo jô je. 22Avô! Tubuk a kui wé, amu ma ye bo te nguleya bo jam akekui ô kuiya tison éte. Ajô te be nga loone tison éte na: Sôar. 23Jôp e mbe e tôʼô éyoñe Lot a nga nyiin e Sôar.
24Eyoñe te Nti a nga bo na sufre a nduan, bi soʼo be Nti, bi noñ e Sodom a Gômor. 25A nga bulekane bitisone bite, njeʼese ôse, bôte bese be too bitison a bibébéa ya si. 26Minga Lot a nga fombô mvus a veñesan akoʼo nku.
27Abraham a nga kune kôlô si na a ke e vôme a nga tele asu Nti. 28A nga fombô mfaʼa ya Sodom a Gômor, a si ése ya njeʼese, a a nga yen ôtita ô kôlôʼô si ô betek ane ôtita mbeʼe nduan. 29Eyoñe Zambe a nga jiane bitisone ya njeʼese, Zambe a nga simesane Abraham a vaa Lot e mbuʼulan été, éyoñ a nga buʼulane bitisone Lot a nga tabe.
Bengone be Lot, tine Bemôabit a Beamônit
(Met 38:11-30; Rm 3:8; 1 Ko 15:33; Sof 2:9)
30Lot a nga bet a kôlô Sôar asu ya ke tabe baa bengo béé bebaé, amu a mbe a koo woñe ya tabe Sôar. A nga tabe e mbas akoʼo été. 31Ane ntôl ô nga jô ébatane na: Esaa wongan a ntoo nnôm, a fam éziñ é nji bo si bi too nyô na é zu be bia, ane mboone mam yʼabialé ô né. 32Zaʼak, a e mboʼok na ésaa wongan a nyu woon a mbômbaʼane nye, nalé bia ye ve ésaa wongan mvoñe bôt. 33Be nga nyuu ésaa wobe woon alu te; a ntôl ô nga ke bômbô baa ésaa; Lot a nga bo te yeme nye toʼo éyoñ a nga bômbô si, toʼo éyoñ a nga kôlô si. 34Môs ôvok, ntôl ô nga jô ébatane na: Me nga bômbô a ésaa wom alu yʼangôʼé; mbetaʼa bo na a nyu woon alu di, a kele bômbô a nye, nalé bia ye ve ésaa wongan mvoñe bôt. 35Be nga nyuu ésaa wobe woon alu te, a ébatan é nga kôlô si a ke bômbô fefele jé; a nji yeme nye toʼo éyoñ a nga bômbô si, toʼo éyoñ a nga kôlô si. 36Ane bengone be Lot bebaé be nga bo mebum a ésaa wop. 37Ntôl ô nga biaé monafam a nga yôlé na: Môab; ésaa Bemôabite le mbe be ngenan a kui môse ya den. 38Ebatan é nga biaé fe monafam e nye a nga yôlé na: Bén-Ami: Esaa Beamônit nye le, be ngenan a kui môse wu.
Đang chọn:
KALATE METATAʼA 19: BULU09
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© LʼAlliance Biblique du Cameroun, 2009