Kenese 21
21
‘Ua Fānau mai Isaako
1‘Ua asiasi le ALI‘I ‘iā Sara e pei ‘ona ia fetalai mai, ‘ua faia fo‘i e le ALI‘I ‘iā Sara e pei ‘ona ia fetalai mai. 2‘Ua tō fo‘i Sara, ‘ua fānau e ia se atali‘i mo Aperaamo, ‘ina o toeaina o ia, i ona lava po sa fetalai mai ai le Atua ‘iā te ia.#Epe 11.11 3‘Ua fa‘aigoa fo‘i e Aperaamo lona atali‘i na fānau ai ‘iā te ia, o lē na fānau mai e Sara ‘iā te ia, o Isaako. 4‘Ua peritomeina fo‘i e Aperaamo lona atali‘i o Isaako i lona aso valu, pei ‘ona poloa‘i mai o le Atua ‘iā te ia.#Kene 17.12; Galu 7.8 5O le selau o tausaga o Aperaamo na fānau ai lona atali‘i o Isaako. 6‘Ua fai ane fo‘i Sara, “‘Ua fa‘a‘ata‘ataina a‘u#21.6 fa‘a‘ata‘ataina a‘u: O le uiga o le igoa o Isaako i le gagana Eperu “na ‘ata o ia” (va‘ai 17.17-19) e le Atua, o i latou uma o ē fa‘alogo mai latou te taufai‘ata fa‘atasi ma a‘u.” 7‘Ua fa‘apea fo‘i o ia, “Na fai atu ‘ea se tasi ‘iā Aperaamo o le a fa‘asusu se tama e Sara? Auā ‘ua ‘ou fānaua lona atali‘i ‘ina ‘ua toeaina o ia.”
8‘Ua tupu le tama, ‘ua te‘a fo‘i ma le susu; ‘ua faia fo‘i e Aperaamo le tausamiga tele i le aso na te‘a ai Isaako ma le susu.
‘Ua Tulia o Akara ma Isamaeli
9‘Ua va‘ai fo‘i Sara i le tama a Akara le Aikupito na fānauina e ia ‘iā Aperaamo, o lo‘o tauemu ia.#21.9 o lo‘o tauemu o ia: O nisi fa‘aliliuga; o Isamaeli o lo‘o tauemu ‘iā Isaako le tama a Sara. 10‘Ona fai atu lea o ia ‘iā Aperaamo, “‘Inā tuli ‘ese ia o lenā fafine pologa ma lana tama; auā e lē tofia fa‘atasi le tama a lenā fafine pologa ma la‘u tama o Isaako.”#Kala 4.29-30 11‘Ua tigā lava Aperaamo i lenei mea ‘ona o lona atali‘i. 12A ‘ua fetalai mai le Atua ‘iā Aperaamo, “‘Aua ‘e te tigā ‘ona o le tama, ‘atoa ma lou fafine pologa; o mea uma ‘ua fai atu ai Sara ‘iā te oe ‘ia e usiusita‘i i ai lana ‘upu, auā e vala‘auina lau fānau ‘iā Isaako.#21.12 auā e vala‘auina lau fānau ‘iā Isaako: po o e ala mai ‘iā Isaako o augatupulaga uma e faitauina. #Roma 9.7; Epe 11.18 13O le tama fo‘i a le fafine pologa ‘ou te fai o ia ma tupuga o se nu‘u auā o lau fānau ia.”
14‘Ona ala tula‘i lea o Aperaamo i le taeao, ‘ua tago i mea e ‘ai ma le fagu pa‘u vai ma avatu ‘iā Akara ma fa‘ae‘e ai i lona fuataua,#21.14 fuataua: po o tau‘au. ‘ua tu‘u atu fo‘i le tama, ‘ua ‘au‘eseina o ia; ‘ona alu lea o ia, ma fesēa‘i i le vao o Peresepa. 15‘Ua uma fo‘i le vai i le fagu pa‘u, ‘ona tu‘u atu ai lea e ia le tama i lalo ifo o le tasi la‘au itiiti. 16A ‘ua alu atu o ia, ‘ua nofo mamao mai, e pei o le mea e pa‘ū atu i ai le u pe a fana atu; auā ‘ua fa‘apea ane o ia, “‘Ia ‘aua ne‘i ‘ou va‘ai i le oti o le tama.” ‘Ua ia nofo mai fo‘i ma tagi leo tele lava.
17‘Ua fa‘afofogaina fo‘i e le Atua le leo o le tama; ‘ona vala‘au mai ai lea o le agelu a le Atua ‘iā Akara mai le lagi, ‘ua fa‘apea mai ‘iā te ia, “Akara e, ‘ua fa‘apefea ‘ea oe? ‘Aua ‘e te fefe, auā ‘ua fa‘afofogaina e le Atua le leo o le tama i le mea o i ai o ia. 18‘Inā tula‘i ia ma tago i le tama ma talitali a‘e ‘iā te ia i ou lima, auā ‘ou te fai o ia ma tupuga o le nu‘u tele.” 19‘Ua fa‘apupulaina e le Atua ona mata, ‘ona iloa ai lea o ia o le vai‘eli; ‘ona alu lea o ia, ‘ua utu ai le fagu pa‘u i le vai ma fa‘ainu ai le tama. 20Sa i ai le Atua i le tama; ‘ua tupu fo‘i o ia, ‘ua ia mau fo‘i i le vao ma ‘ua ‘avea ma tagata fanafana u. 21Sa mau fo‘i o ia i le vao o Parana; ‘ua ‘aumai fo‘i e lona tinā se avā ma ia mai le nu‘u o Aikupito.
O le Feagaiga a Aperaamo ma Apimeleko
22O ona po ia na fai mai ai Apimeleko ma Fikolu, o le ali‘i e pule i ana ‘au, ‘iā Aperaamo, ‘ua fa‘apea mai, “‘Ua ‘iā te oe le Atua i mea uma ‘e te faia.#Kene 26.26 23O lenei, ‘ia e tautō mai ‘i‘inei ‘iā te a‘u i le Atua, ‘e te lē pepelo mai ‘iā te a‘u, po o lo‘u atali‘i, po o le atali‘i o lo‘u atali‘i; a ‘ia pei o lo‘u alofa atu ‘iā te oe, ‘ia e fa‘apea mai fo‘i ‘iā te a‘u, ‘atoa ma le nu‘u ‘ua e āumau ai.”
24‘Ona tali atu lea o Aperaamo, “‘Ou te tautō lava.”
25‘Ua a‘oa‘i atu fo‘i Aperaamo ‘iā Apimeleko ‘ona o le vai‘eli, na fao e ‘au‘auna a Apimeleko. 26‘Ona fa‘apea mai lea o Apimeleko, “‘Ou te lē iloa po o ai ‘ua na faia lenā mea; na lē ta‘u mai fo‘i ‘iā te a‘u, o a‘u nei fo‘i, ‘ou te fa‘ato‘ā fa‘alogo i ai i le asō.” 27‘Ona ‘ave lea e Aperaamo o mamoe ma povi ma foa‘i atu ma Apimeleko; ‘ona la osia lea o la la feagaiga. 28‘Ua vavae ‘ese e Aperaamo o tama‘i mamoe fafine e fitu. 29‘Ona fai mai lea o Apimeleko ‘iā Aperaamo, “E fa‘apefea na tama‘i mamoe fafine e fitu ‘ua e vavae ‘ese?”
30‘Ona tali atu lea o Aperaamo, “‘Ia e ‘ave ma oe o na tama‘i mamoe fafine e fitu, e fai ma fa‘ailoga ‘iā te a‘u, na a‘u ‘elia lenei vai.” 31O le mea lea ‘Ua fa‘aigoa ai e ia o lea mea o Peresepa,#21.31 Peresepa: mai le gagana Eperu “vai‘eli o le tautoga.” auā na la tautō ai.
32‘Ua la osia fo‘i la la feagaiga i Peresepa; ‘ona tula‘i lea o Apimeleko ma Fikolu, le pule i ana ‘au, ma la toe fo‘i atu i le nu‘u o Filisitia. 33‘Ua totō fo‘i e Aperaamo le ulu la‘au i Peresepa ma ‘ua vala‘au atu i lea mea i le suafa o le ALI‘I, o le Atua e fa‘avavau.#Kene 4.26; 12.8; Isai 40.28 34E tele fo‘i aso sa āumau ai Aperaamo i le nu‘u o Filisitia.
Đang chọn:
Kenese 21: RSCB
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Revised Samoan Catholic Bible © Bible Society of the South Pacific, 2010.