Mks. 3
3
1“Pai yamaikia nekaata. Winia jintiarun iwiarat tusan Winia chichampru etserniun akupeajai. Tura Ni Je̱e̱n Uuntka átum e̱a̱rmena nuka aya aneachma tarutrámtatrume. Átum wakeramu aentsja̱i̱ chícham najanamu Yusa suntari̱ winiawai” tawai Ashí Akupin Uunt Yus. 2“Tura Ni tátin tsawant jeamtaisha ¿yaki katsuntratⁱ kame Ni winiakuisha yaki paṉkai̱sha wajasatⁱ? Warí Niṉkia ji jiru unuikiar tsatsamtai̱ya̱ núniniaiti. Núnisaṉ nijiakmau ainia nuna japuṉkri̱ tí kakaram wapikian wárik jiinia tímianuiti. 3Kame Niṉkia kuít jirun unuik tsatsamá péṉker awajniua núnis pujustatui. Túmak Riwí shuarnasha imiatkincha awajsártatui. Warí kurin kuít jiruja̱i̱ unuik tsatsamá aya kúrik tura aya kuít jiruk awajna tímiatrus ajasár nekasa nuja̱i̱ métek Uunt Yusan súsartatui. 4Tuma asamtai Jutanmaya̱ tura Jerusaréṉnumia̱ suíniamuncha yaunchu enentáimtimia tímiatrusaṉ yamaisha Uunt Yuska shiir enentáimtustatui. 5Nuya̱ṉka atumíin jean sumamtikiattajrume. Túrakun wawekratniunka núnisaṉ tsanirmancha tura anaṉkartuattsa Yussha irui nekas umiktatjai tiniu ainia nunasha núnisnak takarin áinian nuyá̱ waje̱ncha áitkiasnak mitiaikian waitkia ainia nunasha nu arantcha iraran yajauch awajin ainia nunasha Wíniaka ashamprutsuk nuna túrawaru ásarmatai Wisha nekasaiti tusan wárik makuraran ashí sumamtikiawartatjai” tawai Ashí Akupin Uunt Yus.
Yusan kasarainia
6“¡Wikia Uunt Yus asan yapajchaitjiai! ¡Maa tuma asamtai átumka Jakupa uchiri̱yá amukchamuitrume! 7Túrasha atumí uuntri̱ yaunchu pujuarmia tímianaiya̱ṉ Wi akupkámu umiktin chichamka umitsuk Wini̱ya̱ṉka kanakniuitrume. Winí̱ waketkitiarum túrawakrumni̱ṉkia Wisha waketruktiatjarme” tawai Ashí Akupin Uunt Yus. “Túrasha ‘¿itiurak aminí̱sha waketkitiajⁱ?’ tárume. 8¿Kame aents Yusan kasarkamniakait? Túrasha átumka kasartiniaitrume. Túrutayatrum iisha ‘¿warí kasarkaitiajⁱ?’ tárume. Enta tiásnumia̱ chikichik akankarum Winia súrichu asarum kasartiniaitrume. 9Tuma asarum átumka yajauch yumiṉji̱a̱i̱ yumiṉkramuitrume. Warí ashí Israer shuartirmeka kasartiniaitrume. 10Wats tiásnumia̱ chikichik akankámu Yusa Je̱e̱n kuit ikiutai̱niam ashí itiatárum tura Winia Je̱a̱ruí̱sha yurumak atí. Túrakrum nekaprusa iiskua kame Wikia nayaimpinmaya̱ yumiṉkian taramkar naṉkaamas takustinian akuptúkchatjarmeash” tawai Ashí Akupin Uunt Yus. 11“Nú arantcha nu tura asakrumin nuṉkaya̱ arakan tura uwa ajanam araamsha nerechu awajsa̱i̱ tusan emesmaun tsaṉkatkashtatjai” tawai Ashí Akupin Uunt Yus. 12“Tura tí peṉker wakerú ajamai nuṉka asamtai ashí nuṉkanmaya̱ aents chichartamainiak Yus shiir awajsamu núṉkaiti turamiartatui” tawai Ashí Akupin Uunt Yus.
Yajauch shuar tura péṉker shuar
13Tura Uunt Yus chichaak “Átum wárik kajertukrum Winia yajauch chichartukuitrume túrutayatrumek ‘¿Iisha Amincha warintia chicharkaitiajⁱ?’ túrutrume. 14Nu arantcha ‘Yus takarsatniusha ántraiti. Ni akupkámu chicham umíakur Ashí Akupin Uunt Yus íimmianum wáitiakrisha ¿warí péṉkerak wainkiattajⁱ? 15Kame naṉkamantu enentáimtumainia nu shíiraiti taji tura Yusan anaṉkainiaksha nuna péṉker pujusár yajauchin túrawarsha asutniatsuk pujuiniawai’ tíniuitrume” tawai Uunt Yus.
16Nuyá̱ Uunt Yusan ashamin armia nu aṉkant aṉkant ni ai̱ji̱a̱i̱ áujmatainian Uunt Yus wainiak anturkarmiayi. Tura Uunt Yusan ashamainiak Ni naari̱ shiir awajainia nu tuke enentáimtusma kajinmatkichmin armi tusa Nisha íimiai̱ṉ papinium áarmiayi. 17Tura Ashí Akupin Uunt Yus chichaak “Wi sumamtikiattajna nu tsawantinkia apa ni uchirí̱ umiriam waitnenta nútiksanak winia ti shiir kuítrua núnis awajsamu ásarmatai waitnentrartatjai.” 18Nuiṉkia átum péṉkeran túrin tura yajauchin túrincha núnisaṉ Yúsnan takarin tura Yúsnan takarcha ainia nuja̱i̱ akaneamu atakka paant nekaattarme.
Đang chọn:
Mks. 3: jiv
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
©2009 Avant Ministries in cooperation with Wycliffe Bible Translators, Inc. All rights reserved.