ᐃᐱᓯᒥᐅᓄᑦ 3
3
ᐸᐅᓗᓯᐅᑉ ᐱᓇᓱᓯᐊᕐᓂᖓ ᔫᑎᐅᖏᑦᑐᓄᑦ
1ᑕᒪᓐᓇ ᐱᓪᓗᒍ, ᐅᕙᖓ ᐸᐅᓗᓯ, ᙭ᔅᑑᓯ ᔩᓱᓯᐅᑉ ᑎᒍᔭᐅᓯᒪᕕᖕᒦᑎᑕᖓ ᐃᓕᑦᓯ ᔫᑎᐅᖏᑦᑐᓯ ᐱᑦᔪᑎᒋᓪᓗᓯ, 2ᖁᓚᕐᓇᓐᖏᓚᖅ ᑐᓴᐅᒪᓕᕋᑦᓯ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᑎᓕᔭᐅᑦᔪᑎᖃᕋᒪ ᐃᓕᑦᓯ ᐱᑦᔪᑎᒋᓪᓗᓯ. 3ᓇᓗᓇᓚᐅᕐᑐᒥᒃ ᖃᐅᔨᑎᑕᐅᓯᒪᒐᒪ ᓇᓗᓁᕐᓯᕕᐅᓂᒃᑯᑦ, ᑕᒪᓐᓇ ᓁᑦᑐᒥᒃ ᑎᑎᕋᐅᓯᕆᓚᐅᕐᐸᕋ ᐃᓕᑦᓯᓐᓄᑦ. 4#ᑯᓘᓯ 1:26,27.ᑖᒃᑯᐊ ᐅᖃᓕᒫᕈᑦᓯᐅᒃ, ᑐᑭᓯᔪᓐᓇᕐᐳᓯ ᖃᐅᔨᑎᑕᐅᓯᒪᓂᓐᓂᒃ ᙭ᔅᑑᓯᐅᑉ ᓇᓗᓇᕐᓂᖓᓂᒃ. 5ᓯᕗᓕᕕᓂᑦᑎᓐᓄᑦ ᑕᒪᓐᓇ ᓇᓗᓇᕐᑎᑕᐅᓚᐅᕐᑐᖅ ᑐᑭᓯᔭᐅᓂᖅ ᐊᔪᕐᓇᕐᑎᑕᐅᓚᐅᕐᐳᖅ ᐃᓅᑎᓪᓗᒋᑦ, ᒫᓐᓇᓕ ᓇᓗᓇᕈᓐᓃᕐᑎᑕᐅᕗᖅ ᐊᐴᓯᑕᓕᖁᑎᖏᓐᓄᑦ ᐃᑦᔪᕐᓁᑦᑐᓄᑦ ᓇᓚᐅᑦᑍᔪᓄᓪᓗ ᐊᓂᕐᓂᒃᑯᑦ. 6ᑕᒪᓐᓇ ᓇᓗᓇᕈᑎᖃᓚᐅᕐᐳᖅ ᔪᑎᐅᓐᖏᑦᑐᑦ ᑭᖑᕐᖑᑦᔨᔪᓐᓇᕐᓯᑎᑕᐅᓚᐅᕐᒪᑕ ᐃᓚᒋᔭᐅᓕᕐᓗᑎᒃ ᑎᒥᒧᑦ ᐊᑕᐅᓯᕐᒧᑦ, ᐱᖃᑕᐅᓕᕐᓗᑎᒃᓗ ᐊᖏᕈᑕᐅᓯᒪᔪᒥᒃ ᙭ᔅᑑᓯ ᔩᓱᓯᒃᑯᑦ ᐅᖃᐅᓯᕐᑎᒍᑦ ᑐᓴᕈᒥᓇᕐᑐᑎᒍᑦ.
7ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᓪᓚᖁᓪᓗᖓ ᑎᓕᔭᐅᓯᒪᕗᖓ ᐱᔨᑦᓯᕐᑎᐅᖁᓪᓗᖓ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ; ᑐᓂᕐᕈᓯᐊᕐᑎᓚᐅᕐᒪᖓ ᐱᔪᓐᓇᕐᓂᖓᑕ ᐱᓇᓱᐊᕐᓂᖓᒍᑦ. 8ᐅᕙᖓ ᒎᑎᐅᑉ ᐃᓄᖁᑎᓕᒫᖏᓐᓂᑦ ᒥᑭᓐᓂᕐᐸᐅᒐᓗᐊᕐᑐᖓ, ᒎᑎᐅᑉ ᑐᓂᓯᕕᒋᓚᐅᕐᐹᖓ ᐱᑦᓯᐊᕐᓂᕐᒥ ᐱᔪᓐᓇᕐᑎᑦᓯᓂᕐᒥᒍᑦ; ᔫᑎᐅᖏᑦᑐᓄᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᓪᓚᖁᓪᓗᖓ ᙭ᔅᑑᓯᐅᑉ ᐊᒥᒐᕐᓯᖏᓐᓂᖓᓂᒃ ᑭᒡᓕᖃᖏᑦᑐᒥᒃ, 9ᐃᓄᓕᒫᑦ ᑐᑭᓯᑎᓐᓇᓱᐊᕐᓗᒋᑦ ᓇᓗᓇᓚᐅᕐᑑᑉ ᖃᐅᔨᔭᐅᓕᕈᓐᓇᕐᓂᖓᓂᒃ, ᑕᒪᓐᓇ ᑍᑦᓱᒪᓂᐊᓗᖕᓂᑦ ᒎᑎᐅᑉ ᐃᔨᕐᓯᒪᓚᐅᕐᐹ, ᑕᒤᓐᓂᒃ ᐱᓐᖑᕐᑎᑦᓯᓚᐅᕐᑑᑉ. 10ᒫᓐᓇᐅᓕᕐᑐᒃᑯᑦ ᐅᒃᐱᕐᑑᖃᑎᒌᑎᒍᑦ, ᒎᑎᐅᑉ ᓱᓇᑐᐃᓐᓇᓕᒫᑎᒍᑦ ᓯᓚᑐᓂᕐᔪᐊᖓ ᖃᐅᔨᔭᐅᔪᓐᓇᕐᓯᖁᓪᓗᒍ ᐊᐅᓚᑦᑎᔨᐅᕙᒃᑐᓄᑦ ᐱᔪᓐᓇᕐᓂᖃᕐᑐᓄᓪᓗ ᕿᓚᖕᒥᐅᓄᑦ. 11ᒎᑎ ᐃᓱᖃᖏᑦᑐᒥᑦ ᐱᓇᓱᐊᕈᒪᓯᒪᔭᒥᓂᒃ ᓈᒪᒃᓯᑎᑦᓯᓚᐅᕐᐳᖅ ᙭ᔅᑑᓯ ᔩᓱᓯᒃᑯᑦ ᐊᑕᓂᑦᑎᒍᑦ. 12ᑖᑦᓱᒨᓇ ᐅᒃᐱᕐᓂᑯᑦ ᓯᕘᕋᖏᓪᓗᑕ ᐃᓕᕋᓱᓐᖏᓪᓗᑕᓗ ᐊᖅᑯᑎᒃᓴᖃᕐᐳᒍᑦ ᒎᑎᐅᑉ ᓇᔪᕐᑕᖓᓄᐊᕈᓐᓇᓕᕐᐳᒍᑦ ᖁᓚᕈᑎᖃᖏᓪᓗᑕ. 13ᑍᒤᒻᒪᑦ ᓴᐱᓕᑐᐃᓐᓇᖁᖏᒃᑲᓗᐊᕐᐸᑦᓯ ᐊᒃᓱᕈᕐᓇᕐᑐᒃᑰᕐᑎᑕᐅᓂᓐᓄᑦ ᐱᑦᔪᑎᒋᓪᓗᓯ, ᑕᒪᓐᓇ ᓂᕐᑐᕐᓇᐅᑎᒃᓴᑦᓯᓐᓄᑦ ᑍᒤᓕᖓᖕᒪᑦ.
᙭ᔅᑑᓯᐅᑉ ᓇᒡᓕᖕᓂᖓ
14ᑕᒪᓐᓇ ᐱᑦᔪᑎᒋᓪᓗᒍ ᐊᑖᑕᐅᑉ ᓵᖓᓂ ᓰᖅᑯᕐᐳᖓ, 15ᐃᒡᓗᒥᐅᖃᑎᒌᓂ ᐃᓚᒌᒃᑐᓂᒃ ᑍᔭᐅᔪᓕᒫᑦ ᕿᓚᖕᒦᑦᑐᑦ ᓄᓇᒦᑦᑐᓪᓗ ᐊᑎᖃᕐᕕᒋᔭᖓᓐᓄᑦ. 16ᑖᑦᓱᒧᖓ ᑐᓂᓯᕕᐅᖁᓪᓗᓯ ᐱᔪᓐᓇᕐᓂᕐᒥᒃ, ᐱᓐᓇᕐᓇᕐᓂᕐᔪᐊᖓᑕ ᐊᒥᒐᖏᓐᓂᖓᓄᑦ ᓴᓐᖏᔫᑎᑕᐅᖁᓪᓗᓯ ᐊᓂᕐᓂᖓᒍᑦ ᐃᓗᑦᓯᒍᑦ, 17ᑐᒃᓯᐊᕐᐳᖓᓗ ᐅᒃᐱᕐᓂᑯᑦ ᙭ᔅᑑᓯ ᐃᓂᖃᖁᓪᓗᒍ ᐆᒻᒪᑎᑦᓯᓐᓂ; ᑖᑦᓱᒪᓂ ᐊᒫᖃᓕᖁᓪᓗᓯ ᑐᓐᖓᕕᖃᓕᖁᓪᓗᓯᓗ ᓇᒡᓕᖕᓂᕐᒥ, 18ᐃᑦᔪᕐᓁᑎᑕᐅᓯᒪᔪᓪᓗ ᐊᑕᐅᑦᓯᒃᑯᑦ ᑐᑭᓯᔪᓐᓇᖁᓪᓗᓯ ᙭ᔅᑑᓯᐅᑉ ᓇᒡᓕᖕᓂᖓᑕ ᓯᓕᖕᓂᖓᓂᒃ ᑕᑭᓂᖓᓂᒃ ᐳᕐᑐᓂᖓᓂᒃ ᐃᑎᓂᖓᓂᒡᓗ. 19ᖃᐅᔨᖁᓪᓗᓯᓗ ᙭ᔅᑑᓯᐅᑉ ᓇᒡᓕᖕᓂᖓᓂᒃ ᖃᐅᔨᔭᐅᔪᓐᓇᕐᑐᑦ ᐅᖓᑖᓃᑦᑐᒥᒃ, ᐃᓗᒻᒥᕐᑕᐅᖁᓪᓗᓯᓗ ᒎᑎᐅᓂᖓᑕ ᐃᓕᖅᑯᓯᓕᒫᖓᓂᒃ.
20ᑖᑦᓱᒪᓕ ᐱᔪᓐᓇᕐᓂᕐᒥᒍᑦ ᐅᕙᑦᑎᓐᓂ ᐱᓇᓱᐊᕐᑑᑉ ᐱᓇᓱᐊᕐᕕᒋᔪᓐᓇᕐᐹᑎᒍᑦ ᐱᔪᒪᔪᓐᓇᕐᑕᑦᑕ ᐃᓱᒪᒋᔪᓐᓇᕐᑕᑦᑕᓗ ᐅᖓᑖᓃᑦᑐᓂᒃ, 21ᑖᓐᓇ ᓂᕐᑐᕐᑕᐅᓕ ᐅᒃᐱᕐᑑᖃᑎᒌᓂ ᙭ᔅᑑᓯ ᔩᓱᓯᒥᓗ ᑭᖑᕚᕇᓕᒫᓄᑦ, ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒥᓐ.
Đang chọn:
ᐃᐱᓯᒥᐅᓄᑦ 3: EAIB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Eastern Arctic Inuktitut Bible © Canadian Bible Society, 2012, 2021-2023.