Luuka 20
20
Oburhegesi bwa Yeesu ngahe burhengeere?
Matayo 21.23-27; Mariko 11.27-33
1Lusiku luguma, oku Yeesu ali ayigiriza abantu omu Nju ya Nnamahanga n'okubala oMwanzi Mwinja, ho n'aho abakulu b'abadaahwa n'abigiriza b'amarhegeko, haguma n'abashamuka b'aBayaahudi baahulukira. 2Baava baamubaza ntya: «Orhubwire oku burhegesi bwa nde oli waajira ebi bintu. Nde ye waguhaaga obu burhegesi?» 3Yeesu abashubiza ntya: «Naani, nababaza echibazo chiguma, munshubize: 4‹Obubatiizo bwa Yohaana ka bwarhengeraga empingu changwa emw'abantu?›» 5Babwirana ntya bonyine oku bonyine: «Rhukaderha okw'empingu, arhubaza gichi charhumaga rhurhamuyemeera. 6Kandi rhugashubiza oku emw'abantu, olubaga looshi lwarhuyirhiisa amabaale, kwenge lwali luyemereere oku Yohaana aliiri muleebi.» 7Ntyo ku bamushubiize oku barhenji ngahe bwarhengeraga. 8Yeesu aja ababwira ntya: «Ko n'oko naani, ntababwira oku burhegesi bwa nde njira ebi bintu.»
Omugani gw'abahinzi babi
Matayo 21.33-46; Mariko 12.1-12
9Kandi Yeesu ashuba kubachiira guno mugani: «Haliiri muntu muguma wahingaga eshwa ly'emizabiibu, aliyadiisa abahinzi n'okubalama siku zinene. 10Egihe ch'ogushaluula chabeere chagera ho, arhuma omuja waage emwa bala bahinzi mpu bamuheerezage amaage malehe m'eshwa. Aliko abo bahinzi bashuurha oyo muja n'okumugalula maboko moomu. 11Nyina eshwa ashuba gurhuma owindi muja. Naye bamushuurha, bamudukanga, banamugalula maboko moomu. 12Ashuba gurhuma omuja wa gasharhu. Bamukoromesa, banamukabula embuga. 13Nyina eshwa aderha ntya: ‹Gurhe naaja naajira? Naaja narhuma mugala waani muzigirwa, nkabaga yeewe bamukenga.› 14Aliko balaala bahinzi babeere bamulangiira, babwirana ntya: ‹Tala, oyuula yi waaba nyina agashambala! Rhumuyirhe, y'agashambala kaba keerhu.› 15Bamukuula omu shwa, banamuyirha.» Yeesu aja abaza abantu ntya: «Nyina eshwa gurhe nj'ajira aboola bahinzi? 16Nj'agaluka, nj'anayirha aboola bahinzi, nj'anaheereza abandi eshwa.»
Abantu babeere bayunva ntyo, baaderha ntya: «Ebiri ntya birhahira bikaba!» 17Aliko Yeesu abaloleereza, aderha ntya: «Echi chinwa chiyandikirwe gurhe chiderhere?
Ebaale ab'okuyumbaka balahiraga,
lyo lyahindukire ly'engenzi, ly'okuyumbakira ko.#20.17 Osome Nanga 118.22.
18Ngasi muntu nji wakumbagala kw'eryo baale nj'avunagulika; n'eyi nji lyarhogera ko nji lyamuhomboola.»
19Ho n'aho, abigiriza b'amarhegeko n'abakulu b'abadaahwa bashonda ogushweka Yeesu, bulaala bali bayinji oku bo baderherwe mw'ogu mugani. Aliko bayuubaha abantu.
Echibazo ch'ogufurha ekooli lya Kayizaari
Matayo 22.15-22; Mariko 12.13-17
20Abo bakulu b'aBayaahudi barhondera guhenguuza Yeesu. Baamurhumira abantu b'okumuneeka, baliiri kubonekana nka bali b'okuli yi bamufarhira omu nderho, n'okulengera eyo njira bagale kumuhaana omu maboko m'omurhegesi w'egihugo. 21Aba bantu baabaza Yeesu ntya: «Mwigiriza, rhuyinji oku oderha n'okuyigiriza bwinja; orhajira kaboolo, aliko oyigiriza enjira ya Nnamahanga gukulikirana n'okuli. 22Orhubwirage leero, k'amarhegeko meerhu mayemereere changwa malahiire gufurha ekooli emwa Kayizaari?» 23Aliko Yeesu amenya obulyaalya bwabo, ababaza ntya: 24«Munyereke egicheri chiguma ch'edinaari. Giheekere eshusho n'eziino lya nde?» Baashubiza ntya: «Biri bya Kayizaari.» 25Yeesu aja ababwira ntya: «Mugende mwaheereza Kayizaari ebiri byaage, na Nnamahanga naye ebiri byaage.» 26Bafundwa kumufarhira oku chiguma omu binwa byaage embere z'olubaga. Basoomererwa egishubizo chaage, baava baasira.
Echibazo ch'ogufuuka kw'abafu
Matayo 22.23-33; Mariko 12.18-27
27Buzinda bw'aho, aBasadukaayo baguma baaja emwa Yeesu. aBasadukaayo bo barhayemeeraga obufuuke bw'abafu. Bayinja kubaza Yeesu ntya: 28«Mwigiriza, tala oku Muusa arhuyandikiire ntya: ‹Nk'omulume aligwerhe omukazi, aliko agafa buzira mwana, mwene waabo anarhoola oyo mukazi n'okuburhira nyagufa abaana.›#20.28 Osome Murhondero 38.8; Rhegeko 25.5-6. 29Leero haliiri bazaana mushanvu ba nda nguma. Omwambere ashaba n'ogufa buzira mwana. 30Owakabiri naye ayingira ola mukazi, naye afa buzira mwana. 31N'owagasharhu naye ko n'oko. Byaaba ntyo oku booshi mushanvu, baafa buzira kuleka abaana. 32Aha buzinda, ola mukazi naye afa. 33Leero amango m'ogufuuka, oyo mukazi nj'aba wa nde? Bulaala aliiri mukaabo booshi oku bali mushanvu!»
34Yeesu abashubiza ntya: «Mu lino gulu, abalume n'abakazi yi bashabana. 35Aliko abaganjirwe kulama mw'elyo gulu lyayinja n'ogufuuka gurhenga omu bafu nji barhaashaba changwa gushabwa. 36Barhaakanafa, bulaala bali kuguma na bamalahika, bali bagala ba Nnamahanga kwenge bafuukire. 37Muusa ayerekeene bwinjabwinja oku abafu nji bafuuka. Omu mandiko maage aderhere elugulu w'egishaka chagulumiraga. Yeewe aderhere oku Nnaweerhu ali ‹Nnamahanga wa Abrahaamu, Nnamahanga wa Isaka na Nnamahanga wa Yakobo.›»#20.37 Osome Lubunguluko 3.2-6. 38Yeesu ashuba kuderha ntya: «Nnamahanga arhali w'abafu, aliko w'abalamire; kwenge oku yeewe booshi balamire.»
39 Abigiriza baguma b'amarhegeko bashubiza ntya: «Mwigiriza, waderhere bwinja.» 40Barhagishubiraga chiro kubaza liguma.
Kirisitu na Daawudi
Matayo 22.41-46; Mariko 12.35-37
41Yeesu abaza abantu baliiri ahoola ntya: «Gurhe abantu bakaderha mpu Kirisitu ali mugala wa Daawudi? 42Daawudi yenyine aderhere ntya omu gitaabu ch'eNanga:
‹Nnaweerhu Nnamahanga abwirire Nnaweerhu ntya:
“Yikale ekulyo kwani,
43guhika amango nji naajira bashombanyi baawe ndabarhiro yaawe.”›#20.43 Osome Nanga 110.1.
44Leero akonva Daawudi amuyirikire Nnaweerhu, gurhe akaja aba mugala waage?»
Yeesu abwira abigirizwa baage bachilange n'abigiriza b'amarhegeko
Matayo 23.1,5-7,14; Mariko 12.37-40
45Abantu booshi babeere bali bayunviriza Yeesu, abwira abigirizwa baage ntya: 46«Muchilange oku bigiriza b'amarhegeko. Basiima guchilambagiza n'efulema zileehere, n'okulamuswa n'obukenge ah'abantu banene bali, okuyikala oku ntebe z'embere omu masinagoogi n'omu madinye. 47Bananyaga abashumbakazi ebintu byaabo byooshi. N'omu guchisiisa, banajira amasaala maleehere. Abo bantu, nji baahanwa bweneene.»
Đang chọn:
Luuka 20: HAV
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
