Bijiro 2
2
Abigirizwa bayunjuzwa Muuka-Mutagatiifu
1Olusiku lw'ePendekosite lwabeere lwahika, abigirizwa booshi babaaga babuganeene hantu haguma. 2Ho n'aho bayunva olwamo gurhengera empingu luli nka lw'empuusi ekalihire, enali yahuusahuusa. Olo lwamo lwayunviikana omu nju yooshi baliyikeere mo. 3Haabonekana n'ebiri nka birimi by'omuliro, byachigaba; byanaja oku ngasi muguma wabo. 4Abo bigirizwa booshi bayunjuzwa Muuka-Mutagatiifu, banarhondera kuderha omu zindi ndimi, gukulikirana n'oku Muuka-Mutagatiifu abahaaga obuhashe b'okuderha.
5Mw'amo mango, eYerusaleema haliiri aBayaahudi baguma bakengaga Nnamahanga, bahulukiraga omu bihugo byooshi by'egulu. 6Oloola lwamo lwabeere lwayunviikana, abantu banene bachiigusha, basoomerwa bweneene bulaala ngasi muguma aliiri abayunva baaderha omu lulimi lwage lw'akaburhano. 7Booshi basoomerwa, banayuumirwa, baalema baabazana ntya: «Abaala bantu bali baderha, ka booshi barhali Bagalilaaya? 8Gurhe ngasi muguma weerhu y'abayunva omu lulimi lwage lw'akaburhano? 9Omu rhwewe hali abarhengeere omu gihugo ch'aBapariti, ech'aBameedi na ech'aBaelaamu. Hali abalama omu gihugo ch'eMezopotamiya, ech'eYudeeya na ech'eGapadokiya, ech'ePonto na ech'eAziya, 10ech'eFurigiya na ech'ePamfiliya, ech'eMiisiri n'oluhande lwa ech'eLibiya luli hoofu n'egishagala ch'eKureene. Kandi omu rhwewe hali abahiisi b'ogurhengera eRooma, 11hali aBayaahudi n'abandi bayemeeraga edini ly'ekiyaahudi, aBakereeti n'aBaharaabu. Aliko rhweshi rhuli rhwabayunva baaderha omu ndimi zeerhu ebijiro by'obuhashe Nnamahanga ajirire!» 12Booshi baali basomeerwe bweneene n'okuyuumirwa, baabazana ntya: «Bichi ebiila biderhere?» 13Aliko baguma omu bo bashekera abigirizwa n'okuderha ntya: «Barhamiriire edivaayi y'omuhyo!»
Enyigirizo za Petero
14Petero aja ayimanga haguma na zila ntumwa ekumi na nguma, aderha ntya n'omulenge munene: «Mwe bantu b'eYudeeya nenyu mweshi mwe mulamire eYerusaleema, munyunvirize, munamenye bwinja ebi binwa nashonda kubabwira! 15Abaala bantu barharhamiriire nk'oku mukengereere, kwenge zichiri saa esharhu z'eseezi. 16Aliko ebiila bi Nnamahanga aderhaga kugerera omuleebi Yoweeri mpu:
17‹Omu siku zizinda,
nji nayandaaza oMuuka gwani oku bantu booshi;
bagala benyu n'abanyere benyu nji baleeba,
emisole yenyu nji yabonekerwa,
n'abashaaja benyu nji baloorha.
18Neechi, mw'ezo siku, abaja baani, abalume n'abakazi,
nji nabayandaaza k'oMuuka gwani, nji banaleeba.
19Nji najira ebigiriginjo gurhengera elugulu omu mpingu
n'ebimenyeeso eshiishi omu gulu,
nji haaba eshagama, omuliro n'oluhomo l'omuusi.
20Ezuuba nji lyahindulwa mwizimya
n'omwezi nji gwahindulwa shagama,
embere olusiku lwa Nnaweerhu luyinje,
olo lusiku lunene, kandi l'obukuuze.
21Mw'amo mango, ngasi yeeshi nji wahema oburhabaale oku ziino lya Nnaweerhu nj'achungulwa.›#2.17-21 Osome Yoweeri 3.1-5changwa 2.28-32 omu Bibuliya z'ezindi ndimi.
22«Mwe bantu b'eIsraheeli, muyunve ebi binwa! Nnamahanga abayeerekere bwinjabwinja oku Yeesu w'eNazareeti ali muntu arhumaga embere zenyu kugerera ebijiro by'obuhashe, ebigiriginjo n'ebimenyeeso. Nnamahanga ajiraga ebyo booshi ahagarhi kenyu kugerera Yeesu, nk'oku mubiyinji mwenyine. 23Oyu Yeesu ahirwaga omu maboko menyu, nk'oku Nnamahanga ashondaga, na nka okw'amenyaga yenyine gurhengera miira. Nenyu mwamuyirhire omu kumubamba oku musalaaba, kugerera abantu babi. 24Aliko, Nnamahanga nj'amufuulire omu kumulikuula omu malumwa m'olufu, bulaala birhakagalikeene ashwekwe na lo. 25Kwenge Daawudi aderhere ntya elugulu wa Yeesu:
‹Naliiri nabona Nnaweerhu embere zaani ngasi mango,
bulaala ali ekulyo kwani yi ntashaganywa.
26Cho girhumire omurhima gwani gusiimire
n'olulimi lwani lushagalukire;
kandi omubiri gwani nago nji gwahuumukira omu bulangaalire,
27kwenge orhakandekeerera kubeera ekuzimu;
orhakanaleka oMutagatiifu waawe abola.
28Wanyeerekere enjira z'akalamo,
nji wanyunjuza obushagaluke embere zaawe.›#2.25-28 Osome Nanga 16.8-11.»
29Petero ashuba kuderha ntya: «Beene beerhu, bihemere mbabwire bwinjabwinja ebilolere shookuluza weerhu Daawudi: afiire, ahambwa n'eshinda yaage echiba eno mwerhu kugera zeene. 30N'obuula aliiri muleebi, aliyinji oku Nnamahanga amulahizizaga endahiro oku nj'ayikaza muguma omu baburhwa baage oku ntebe yaage y'obwami.#2.30 Osome Nanga 132.11; 2 Samweri 7.12-16. 31Daawudi alibwene embere obufuuke bwa Kirisitu, anabuderha ko ntya:
‹Arhalekeererwaga kubeera ekuzimu,
n'omubiri gwage gurhabolaga.›
32Nnamahanga afuulire oyo Yeesu, rhweshi rhunali bahamiiriza boboola bufuuke. 33Abeere azamuulwa ekulyo kwa Nnamahanga, Eshe amuha Muuka-Mutagatiifu walilaganyizwe. Naye arhuyandaazize ye, nk'okuula muli mwabona, munali mwayunva. 34Kwenge arhali Daawudi wazamuukiraga empingu, aliko yeewe yenyine aderhere ntya:
‹Nnaweerhu Nnamahanga abwirire Nnaweerhu ntya:
“Yikala ekulyo kwani,
35guhika amango nji naajira abanzi baawe ndabarhiro yaawe.”›#2.34-35 Osome Nanga 110.1.
36Leero, bihemere olubaga looshi lw'eIsraheeli lumenye bwinja oku ola Yeesu mwabambaga oku musalaaba, Nnamahanga amujirire kuba Nnaweerhu na Kirisitu!»
Bantu hoofu bihumbi bisharhu bachunguka
37Enyuma z'okuyunva ebyoola binwa, abantu baababazwa bweneene omu mirhima yaabo n'okuva baabaza Petero n'ezindi ntumwa ntya: «Beene beerhu, gurhe rhujirage?» 38Petero abashubiza ntya: «Muleke ebyaaha byenyu, na ngasi muguma omu mwabo abatiizwe oku ziino lya Yeesu Kirisitu yi mubabalirwa ebyaaha byenyu. Na ntyo, mwanayankiirira Muuka-Mutagatiifu nka luhembo. 39Kwenge echilagaane cha Nnamahanga chiri chenyu, ch'abaana benyu n'abantu booshi balamire hale; k'okuderha oku chiri ch'abantu booshi Nnaweerhu Nnamahanga nj'ahamagala.» 40Petero ashuba kubabwira ebindi binwa binene by'okubayinginga n'okubayunviisa. Alema aderha ntya: «Mugichungule gurhenga mw'echi gisisi ch'ebyaaha!» 41Abayankiiriraga ebinwa byaage babatiizwa. Oloola lusiku, hoofu bantu bihumbi bisharhu bayongeereka omu chigusho ch'abemeezi.
Akalamo k'abemeezi
42Abemeezi bagendekera gukulikira enyigirizo z'entumwa, kulama echinyabuguma, kugabaana omugati haguma#2.42 Okugabaana omugati haguma: Hali amango eyi byaliiri biryo by'okuyibuka ogufa n'ogufuuka kwa Yeesu. n'ogusaliira. 43Ebigiriginjo n'ebimenyeeso binene byaliiri kujirika n'entumwa oku bulyo ngasi muguma alema ayunva obuuba. 44Abemeezi booshi baliiri haguma n'ogushangiira byooshi baligwerhe. 45Baliiri baguza amashwa maabo n'ebintu byaabo, n'efuranga zarhengaga mo baliiri bazigabana gukulikirana n'obulagiirire bwa ngasi muguma. 46Ngasi lusiku, omu bunviikane, baliiri baaja omu Nju ya Nnamahanga. Baliiri bagabaana omugati n'ogusangira ebiryo byaabo omu nju zaabo n'obushagaluke haguma n'omurhima mwinja. 47Baliiri bakuuza Nnamahanga n'abantu booshi bali basiimire bo. Na ngasi lusiku, Nnaweerhu aliiri ayongeera abachungwirwe oku chigusho ch'abemeezi.
Đang chọn:
Bijiro 2: HAV
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
