लुका 3
3
बप्तिस्मा देल्हार युहन्नाले पर्चार कर्ल
(मत्ति ३:१-१२; मर्कुस १:१-८; युहन्ना १:१९-२८)
1रोमि माहारजा तिबेरिअसले राज कर्ल पन्द्र बरिस पुग्ल जुमा पन्तियस पिलातस यहुदिया पर्देसक सासक छले। उजुमा हेरोद गालिल पर्देसक सासक छले आ ओक्र भाइ फिलिप चाहिं इतुरिया आ तराखोनितिस पर्देसक सासक छले। अनि लुसानियास चाहिं अबिलेने पर्देसक सासक छले। 2उजुमा सभेस बर्कि पुजारिसब हन्नास आ कैयाफा छले। ओहे जुमा पर्मेसोरक बचन जकरियाक बेटा युहन्नालग उजाड ठावम एले। 3ओहेस युहन्नाले यर्दन नदिक आस्पासक ठावम जाइक मानुकसिका एना कहिक पर्चार कर लग्ले, “आप्न-आप्न पापका सुइकार कर् आ बप्तिस्मा ले अनि पर्मेसोरले तोर्सिक पापका छेमा करि देतो।” 4एनामे यसैया अगमबक्ताले#3:4 अगमबक्ता कहल पर्मेसोरक् बात् कहलाहार् स्यो युहन्नाक बारेम धर्मसास्तरम निख्ल पुरा भेले,
“एक जनाले उजाड ठावम कस्याइक एनामे कहछो,
‘प्रभु आइलाहार पैरा तयार कर्,
आ ओक्र पैरासब सोझ बना।#यसैया ४०:३-५
5अनि सभे खद्रासब पुर्,
आ सभे डँरा आ पाहारसब सम्म बना,
तेर्ह्व पैरासब सोझ आ अप्ठ्यारो पैरासब सजिलो बना।
6तब सभे मानुकस्या पर्मेसोरले पठाइल मुक्तिका देख्तो।’”
7अनि थुप्रे मानुकसब युहन्नालग बप्तिस्मा लिअ लागि एले तर युहन्नाले ओकर्सिका एनामे कहल्के, “ए बिख भेल साँपक जक्या मान्खक सन्तानसब, तोर्सिका पर्मेसोरक सजाएस भाग कोन चेताबनि देल्को?#मत्ति १२:३४; २३:३३ 8तोर्स्या साँच्चेक पापका छोरिक पर्मेसोरभर घुम्ल स्या त ओहे अन्सार अस्लि कामसब कर्। तर ‘हमर्स्या त अब्राहामक सन्तान स्यो’ ओहेस बच्बो कहिक नाइ सोच् किरकि पर्मेसोरले त यि पाखनसिस पनि अब्राहामक लागि सन्तान बनाब सक्तो।#युहन्ना ८:३३ 9अखन्य कुल्होर गाछिक जरम परिसक्ल छो।#मत्ति ३:१०; ७:१९ ओहेस अस्लि फर नाइ फर्लाहार सभे गाछ्सब काटिक आगिम फेकाइतो।”
10तब मानुकस्या युहन्नाका पुछल्के, “आब् हमर्स्या कथि कर्बो त?”
11युहन्नाले ओकर्सिका कहल्के, “जक्रसङ दुइगो कप्रा छो, ओइले कप्रा नाइ भेल्हारका एगो दिउस। एनाहिमे जक्रसङ खाइलाहार चिज छो, ओहोले नाइ भेल्हारका दिउस।”
12अनि कर् उठाइलाहारसब पनि बप्तिस्मा लिअ एले आ युहन्नाका पुछल्के, “हे गुरु हमर्स्या कथि कर्बो?”#लुका ७:२९
13युहन्नाले ओकर्सिका कहल्के, “सरकारले कहलस बेसि कर् नाइ उठा।”
14तब सिपाहिस्या पनि पुछल्के, “हमर्स्या चाहिं कथि करुम?” युहन्नाले ओकर्सिका कहल्के, “कक्राहु झुठा दोस लगाइक आ कर्-कापम पारिक कक्रोसङ ढेवा नाइ ले तर आप्ने तलबम चित बुझा।”
15मानुकस्या मुक्ति देल्हार खिरिस्टक आस कर्ल कारनस ओकर्स्या युहन्नाक बारेम, “कि एहे खिरिस्ट स्यो?” कहिक आप्न मनम सोच्ति छले। 16ओहेस युहन्नाले सभेका कहल्के, “हम त तोर्सिका पानिस बप्तिस्मा देस्यो। तर एक जना हम्रस सक्तिसालि आब्ति छो, जक्र जुत्ताक टुना खुजाल्लाहार लायकक हम नाइ स्यो। ओइले तोर्सिका पबित्र आत्मा आ आगिस बप्तिस्मा देतो। 17फट्कलाहार सुपा ओक्रे हाथम छो। ओइले आप्न अनका खर्यानम फट्किक बखारिम राख्तो तर भुसा चाहिं नाइ मुझ्लाहार आगिम डर्हाइ देतो।”
18एनाहिमे युहन्नाले आरो थुप्रे बातसब कहिक मानुकसिका खुसिक खबर सुनाइल्के। 19तर रजा हेरोदले आप्न भाइक बहु हेरोदियासका आप्न बहु बनाइल कारनस युहन्नाले ओक्रा हप्काइल्के आ ओक्र आरो थुप्रे पापसब पनि देखाइ देल्के।#मत्ति १४:३-४; मर्कुस ६:१७-१८ 20ओहेस हेरोदले युहन्नाका जेलम बन करि देल्के आ आरो एगो बर्कि पाप करल्के।
येसुले बप्तिस्मा लेल
(मत्ति ३:१३-१७; मर्कुस १:९-११)
21एक दिन् ओइलग भेल सभे मानुकस्या बप्तिस्मा लइसकल्के त येसुले पनि बप्तिस्मा लइक पर्थना कर्ति छले, ओहे जुमा सोर्ग खुजल्ले।
22अनि पबित्र आत्मा ढुकुरक रुपम आइक येसुक उप्रिम बेठ्ले आ सोर्गस एगो अबाज एले, “तुइं हम्र दुलार बेटा स्या, तोरसङ हम एक्दम खुसि स्यो।”
येसुक बंसाबलि
(मत्ति १:१-१७)
23येसुले आप्न सेबाकाइ सुरु कर्त खुमा येसुक उमेर तिस बरिस पुग्ल छले। मानुकस्या येसुका योसेफक बेटा स्यो कहिक सम्झेक। योसेफ एलिक बेटा छले। 24अनि एलि मत्तातसक बेटा, मत्तातस लेबिक बेटा, लेबि मेल्किक बेटा, मेल्कि यान्नाक बेटा, यान्ना योसेफक बेटा, 25योसेफ मत्ताथियासक बेटा, मत्ताथियास आमोसक बेटा, आमोस नहुमक बेटा, नहुम इसलिक बेटा, इसलि नग्गैक बेटा, 26नग्गै माथक बेटा, माथ मत्ताथियासक बेटा, मत्ताथियास सेमैनक बेटा, सेमैन योसेखक बेटा, योसेख योदाक बेटा, 27योदा योआनक बेटा, योआन रेसाक बेटा, रेसा यरुबाबेलक बेटा, यरुबाबेल साल्तिएलक बेटा, साल्तिएल नेरिक बेटा, 28नेरि मल्किक बेटा, मल्कि अदिक बेटा, अदि कोसामक बेटा, कोसाम एल्मादमक बेटा, एल्मादम एरक बेटा, 29एर यहसुक बेटा, यहसु एलिएजरक बेटा, एलिएजर योरिमक बेटा, योरिम मत्तातक बेटा, मत्तात लेबिक बेटा, 30लेबि सिमियोनक बेटा, सिमियोन यहुदाक बेटा, यहुदा योसेफक बेटा, योसेफ योनानक बेटा, योनान एल्याकिमक बेटा, 31एल्याकिम मलेआक बेटा, मलेआ मिन्नाक बेटा, मिन्ना मत्ताथाक बेटा, मत्ताथा नातानक बेटा, नातान दाउदक बेटा, 32दाउद यिसैक बेटा, यिसै ओबेदक बेटा, ओबेद बोअजक बेटा, बोअज सल्मोनक बेटा, सल्मोन नहसोनक बेटा, 33नहसोन अम्मिनादाबक बेटा, अम्मिनादाब आरामक बेटा, आराम हेस्रोनक बेटा, हेस्रोन फारेसक बेटा, फारेस यहुदाक बेटा, 34यहुदा याकुबक बेटा, याकुब इस्हाकक बेटा, इस्हाक अब्राहामक बेटा, अब्राहाम तेरहक बेटा, तेरह नाहोरक बेटा, 35नाहोर सरुगक बेटा, सरुग रउक बेटा, रउ पेलेगक बेटा, पेलेग एबेरक बेटा, एबेर सेलहक बेटा, 36सेलह केनानक बेटा, केनान अर्पछदक बेटा, अर्पछद सेमक बेटा, सेम नोआक बेटा, नोआ लेमेखक बेटा, 37लेमेख मतुसेलहक बेटा, मतुसेलह हनोकक बेटा, हनोक येरेदक बेटा, येरेद महलालेलक बेटा, महलालेल केनानक बेटा, 38केनान एनोसक बेटा, एनोस सेतक बेटा, सेत आदमक बेटा अनि आदम चाहिं पर्मेसोरक बेटा छले।
Đang chọn:
लुका 3: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
