लुका 19
19
जक्कैक घरम येसु
1येसु यरिहो सहरम ढुकिक पैराइ-पैरा जाइति छले। 2ओइ सहरम एक जना जक्कै कहलाहार धनिक मानुक छले। उ कर् उठाइलाहार्सिक हाकिम छले। 3ओइले येसु कोन स्यो कहिक देख खोजेक तर मानुकसिक थुप्रे भिर भेल कारनस ओइले देख नाइ सकल्के किरकि उ बन्ठा छले। 4ओहेस उ येसुका देख लागि दोगिक अगा गेले आ एगो नेभाराक गाछम चहर्ले किरकि येसु ओहे पैराबाक जाइति छले। 5जब येसु जक्कै चहर्ल गाछक लगम पुग्ले त गाछक उप्रिभर ताकिक एनामे कहल्के, “ए जक्कै, तुइं झप्सिन तर् या! किरकि आजु हम्रा तोर घरम रह पर्लाहार छो।”
6ओहेस उ चट्दबर गाछस उतर्ले आ खुसि भइक येसुका आप्न घरम लगाइक स्वागत करल्के। 7येसु ओक्रसङ गेल देखिक मानुकस्या एना कहिक गन-गनाब लग्ले, “यि त पापि मान्खक घरम पो मेज्बान बन गेलो त।”
8तर जक्कै ठेर्याइले आ प्रभुका कहल्के, “हे प्रभु, हम आप्न सम्पतिक अधा गरिबसिका बाँटि देबो आ कक्राहु हम ठकिक ढेवा लेल रहबो त जतेक रहतो, ओक्र चार दोब्बर फिर्ता करि देबो।”
9तब येसुले ओक्रा कहल्के, “आजु पर्मेसोरले जक्कै आ ओक्र परिबारका मुक्ति देल छो किरकि एहो अब्राहामक सन्तान स्यो। 10किरकि मानुकक बेटा हराइलसिका खोज आ मुक्ति दिअ आइल स्यो।”#मत्ति १८:११
दस जना नोकरक उखान
(मत्ति २५:१४-३०)
11जब मानुकस्या येसुले कहल बात सुन्ति छले त उजुमा येसु यरुसलेम सहरक लगेम छले। तर मानुकस्या येसु यरुसलेम पुग्ति बितिन पर्मेसोरक राज्ये एतो कहिक सोच्त छले। ओहेस येसुले ओकर्सिका एगो उखान कहल्के, 12“एक जना धनिक मानुकले बर्कि दुरिक देसम जाइक आप्न देसक रजा बनिक आइलाहार बिचार करल्के। 13अनि जाइस अगा ओइले आप्न दस जना नोकरसिका बलाइक ओकर्सिका एकुन्गो सोनक डलर दैक एनामे कहल्के, ‘हम ओइभरस घुमिक नाइ आइल तलिक तोर्स्या अइस बेपार कर्।’ 14तर ओक्रा आप्न देसक मानुकस्या मन नाइ पराबेक। ओहेस उ गइसक्ले त ओक्र पछा-पछा मानुकस्या एगो समुह बनाइक यि खबर दैक पठाइल्के, ‘यि मानुकले हमर्सिक उप्रिम सासन कर्ल हमर्स्या नाइ चाहास्यो।’
15“तर उ धनिक मानुक आप्न देसक रजा बनिएक एले। अनि जकर्सिका बेपार कर लागि सोनक डलर देल छले, ओकर्सिका बलाइक बेपार करिक कतेक कमाइल कहिक पुछल्के। 16ओहेस सुरुम आइलाहार नोकरले कहल्के, ‘मालिक, तोर देल एगो डलरस हम आरो दसगो डलर कमाइल स्यो।’ 17तब रजाले ओक्रा कहल्के, ‘च्याबास हम्र अस्लि नोकर, तुइं एत्का कन्कि बातम पनि इमान्दार भेल, ओहेस आब् तुइं हम्र दसगो सहरक हाकिम बन्ब।’ 18तब दस्रो नोकरले आइक कहल्के, ‘मालिक, तोर देल एगो डलरस हम आरो पाँचगो डलर कमाइल स्यो।’ 19रजाले ओक्रा कहल्के, ‘तुहुँ हम्र पाँचगो सहरक हाकिम बन्ब।’ 20ओक्र पछास दस्रो नोकरले आइक कहल्के, ‘मालिक, तोर देल सोनक डलर यि एत छो। एक्रा हम एक्दम अस्लिमे कप्राम बाह्निक राख्ल छल्यो। 21किरकि तुइं कठोर मानुक स्या, ओहेस हम्रा तोर देखि डर लग्लो। तुइं जुन चिज राख्ल नाइ स्या, उ लेछ आ जे रोप्ल नाइ स्या, उ काट्छ।’ 22तब रजाले ओक्रा कहल्के, ‘ए बैमान नोकर, हम तोरे कहल बातक अन्सारस तोर फैसला कर्बो। हम जुन चिज राख्ल नाइ स्यो, उ लेस्यो आ जे रोप्ल नाइ स्यो, उ काट्स्यो कहिक तोरा थाहे छलो, 23त तुइं हम्र ढेवा किर बैंकम नाइ राख्ल? कम से कम हम आइक आप्न ढेवा सहित ओक्र बियाज पनि त पाइते।’ 24तब रजाले आप्नलग ठेर्याइलाहार्सिका एनामे कहल्के, ‘ओक्रलगस उ डलर ले आ जक्रा दसगो डलर छो ओक्रा धि।’ 25तर नोकरस्या रजाका कहल्के, ‘मालिक, ओक्रसङ त दसगो डलर छिति छो त।’ 26अनि रजाले कहल्के, ‘हम तोर्सिका कह स्यो, जक्रसङ छो, ओक्रा आरो देतो आ जक्रसङ नाइ छो, ओक्रसङ भेलो चिज पनि छिनाइल जेतो।#मत्ति १३:१२; मर्कुस ४:२५; लुका ८:१८ 27तर हम ओकर्सिक रजा बन्ल मन नाइ पराइलाहार हम्र दुस्मनसिका एत आन् आ हम्रे अगाम मार्।’”#मत्ति २५:१४-३०
यरुसलेमम येसुका स्वागत कर्ल
(मत्ति २१:१-११; मर्कुस ११:१-११; युहन्ना १२:१२-१९)
28जब येसुले उखान कहि सकल्के त सभेस अगा-अगा यरुसलेमभर जाइ लग्ले। 29अनि बेथफागे आ बेथानिया गाँ लगक जैतुन पाहारम पुग्ले त येसुले आप्न दुइ जना चेलासिका एना कहिक पठाइल्के, 30“तोर्स्या उ अगल्का बला गाँमम जो। ओइ गाँमम तोर्स्या ढुक्ति बितिन कह्याहु न कुन्हुँ नाइ चहर्ल एगो गधाक बच्चाका जोरिक राख्ल पाइब। ओक्रा खुजालिक एत आन्। 31कुन्हुँले तोर्सिका ‘एक्रा किर खुजाल्छ?’ कहिक पुछ्तो त, ‘प्रभुका यि चाहिल छो’ कहिक कह्य।”
32अनि उ दुइ जना चेला ओत पुग्ले त साँच्चेक येसुले कहले जक्या गधाक बच्चाका जोर्ल देखल्के। 33अनि ओकर्स्या गधाक बच्चाका खुजाल लग्ले त गधाक मालिकले ओकर्सिका पुछल्के, “तोर्स्या किर एक्रा खुजाल्छ हाँ?”
34ओकर्स्या उत्तर देल्के, “प्रभुका यि चाहिल छो।” 35तब ओकर्स्या गधाक बच्चाका खुजालिक येसुलग आनल्के आ ओक्र उप्रिम आप्न होर्ल कप्रासब बिछाइक येसुका ओइम बेठाइल्के। 36येसु गधाम बेठिक जाइत खुमा अरु मानुकस्या पनि आप्न होर्ल कप्रासब पैराम बिछाइ देल्के।
37जब येसु येरुसलेम सहरक लगम भेल जैतुन पाहारक ओरालोम पुग्ले त सभे चेलास्या आप्न आँखिस देख्ल सक्तिसालि कामका सम्झिक लबर्ति बर्कि घार एना कहिक पर्मेसोरक पर्संसा कर लग्ले, 38“परमप्रभुक नामम आइलाहार रजा धन्येक स्यो। सोर्गम सान्ति छो। पर्मेसोरक महिमा हउस।”#भजन ११८:२६
39तर ओइ मान्खक भिरम भेल कुन्हुँ-कुन्हुँ फरिसिस्या चाहिं येसुका एनामे कहल्के, “हे गुरु, तोर चेलासिका चुप करा न।”
40तब येसुले जबाफ देति ओकर्सिका कहल्के, “हम तोर्सिका कह स्यो, एकर्स्या चुप हेतो त यि पाखनस्याहि चिच्याइतो।”
यरुसलेम सहरक लागि येसु कान्ल
41जब येसु यरुसलेम सहरक लगम पुग्ले त येसु सहरका देखिक कान्ले आ एना कहल्के, 42“ए यरुसलेमक मानुकसब, तोर्स्या आजु सान्ति कुन बातस हब्छो कहिक जान्ते त कत्का अस्लि हेते! तर तोर्स्या उ सान्ति देख नाइ सक्ल। 43किरकि आब् तोर्सिक उप्रिम एहेन दुखक दिन् एतो कि तोर्सिक दुस्मनस्या तोर्सिका चारोभरस घेरिक सभे पैराका बन् करि देतो। 44उजुमा तोर्सिक दुस्मनस्या तोर्सिक सहरका भर्काइक माटिम मिलाइ देतो आ तोर्सिका पनि नास करि देतो। अनि एगो पाखनक उप्रि दस्रो पाखन पनि नाइ रहतो किरकि पर्मेसोरले तोर्सिका बचाब आइल समैका तोर्स्या नाइ जान्ल।”
येसुले मन्दिरस बेपारिसिका निकालि देल
(मत्ति २१:१२-१७; मर्कुस ११:१५-१९; युहन्ना २:१३-२२)
45तब येसु मन्दिरम गेले आ बेपार कर्लाहार्सिका एना कहति बाहार निकालल्के, 46“धर्मसास्तरम एनामे निख्ल छो, ‘हम्र घर पर्थना कर्लाहार घर हेतो।’ तर तोर्स्या त एक्रा डाकुसिक रहलाहार घर बानाइल स्या।”#यसैया ५६:७; यर्मिया ७:११
47पछास येसुले सब्दिन मन्दिरम जाइक सिछ्या दिअ लग्ले। तर मुल पुजारि, धर्मगुरु आ नेतास्या चाहिं येसुका मार खोजेक।#लुका २१:३७ 48तर ओकर्स्या मार लागि कथ्यो बाहाना नाइ पाबेक किरकि सभे मानुकस्या येसुक सिछ्या सुन लागि मन पराबेक।
Đang chọn:
लुका 19: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
