लुका 13
13
सजाएस बच लागि पस्चताप कर्
1ओहे जुमा ओइलग धेर्याइल कुन्हुँ-कुन्हुँ मानुकस्या उ गालिल पर्देसक मानुकसिक बारेम येसुका सुनाब लग्ले, जकर्सिका रोमि सासक पिलातसले मार लगाइक ओकर्सिक रकतका बलि चर्हाइल पसुक रकतम मिलाइ देल छले। 2ओकर्सिक बात सुनिक येसुले कहल्के, “तोर्स्या कथि सम्झछ कि उ गालिलक मानुकसब अरु गालिलक मानुकसिस बेसि पापि छलो, ओहेस ओकर्स्या एहेन सजाए पाइल्को? 3हम तोर्सिका कह स्यो, ओना नाइ स्यो तर तोर्स्याहु पस्चताप नाइ कर्ब त ओकर्सिए जक्या मोर्ब। 4ओनाहिमे सिलोआम कहलार ठावम धरहरा धलिक मोर्लाहार उ अठार जना मानुकसब येरुसलेमेभोरि सभेस बेसि पापि छलो कहिक तोर्स्या सम्झछ कि कथि? 5हम तोर्सिका कह स्यो, ओना नाइ स्यो तर तोर्स्याहु पस्चताप नाइ कर्ब त ओनाहिमे मोर्ब।”
फर नाइ फर्लाहार नेभाराक गाछक खिसा
6तब येसुले एगो खिसा कहल्के, “एक जना मानुकले आप्न अङ्गुरक बारिम एगो नेभाराक गाछ रोप्ल छले। अनि उ मानुकले ओइ गाछम फर फर्ल छो कि कहिक ताक एले तर ओइले एकोगो फर नाइ पाइल्के। 7ओहेस ओइले अङ्गुरक बारिम काम कर्लाहार नोकरका कहल्के, ‘हम तिन बरिसस यि गाछम फर खोज आब्स्यो तर एकोगो नाइ पाइल्यो। ओहेस आब् एक्रा काटि धि, किर एक्रा बिना कामेम ठाउँ ओगट धिब।’ 8तर नोकरले कहल्के, ‘मालिक, एक्रा आरो एक बरिस रह धि। हम एक्र चारोभर खोनिक मल घाल्बो, 9अनि अगासाल फर्तो त अस्लिए हेतो तर नाइ फर्तो त हम एक्रा काटि देबो।’”
जिराइलाहार दिनम येसुले अस्लि कर्ल
10एक दिन् येसुले जिराइलाहार दिनम एगो सभाघरम जाइक मानुकसिका सिछ्या देति छले। 11ओइलग अठार बरिसस भुत लगिक कुभ्र निकल्ल एक जना जनि छले। उ जनि कनेक सना पनि सिधा भइक ठेर्याब नाइ सकेक। 12जब येसुले ओक्रा देखल्के त आप्नलग बलाइक एनामे कहल्के, “गे जनि, आब् तुइं यि समस्यास छुट्करा पाइल स्या।” 13तब येसुले ओक्र उप्रिम आप्न हाथ राखल्के त उ चट्दबर सिधा भेले आ पर्मेसोरक पर्संसा कर लग्ले।
14तर येसुले उ जनिका जिराइलाहार दिनम अस्लि कर्ल देखिक सभाघरक हाकिम पिटस खम-खम भइक मानुकसिका एनामे कहल्के, “हप्ताम काम कर्लाहार छ दिन् छो, तोर्स्या उ छ दिनम आइक अस्लि हो तर जिराइलाहार दिनम नाइ।”#प्रस्थान २०:९,१०; ब्यबस्था ५:१३,१४
15ओक्र बात सुनिक येसुले जबाफ देल्के, “ए कप्टिसब, तोर्सिभोरिम कोन जिराइलाहार दिनम आप्न गाइ-बरहध आ गधासिका खुजालिक पानि पियाब नाइ लगाइ छो? 16यि अब्राहामक बेटि त झन अठार बरिसस भुत लगिक कुभ्रि भेल छलो, कथि आजु जिराइलाहार दिन् स्यो कहिक एक्रा अस्लि नाइ कर झन?” 17येसुले कहल बात सुनिक बिरोध कर्लाहार सभेका लाज लग्ले तर अरु मानुकसब चाहिं येसुले कर्ल अचम्मक काम देखिक खुसि भेले।
राइ सागक बिचनक उखान
(मत्ति १३:३१-३३; मर्कुस ४:३०-३२)
18तब येसुले ओकर्सिका कहल्के, “पर्मेसोरक राज्ये कथि जक्या छो? ओक्र तुलना हम कथिसङ करुँ? 19उ त राइ सागक बिचन जक्या स्यो, जक्रा एक जना मानुकले आप्न बारिम छिर्याइछे त जर्मिक एगो गाछ हब्छे। अनि ओक्र डार-बखारम फुदिसब आइक खोँट्रा बनाइछे।”
खमिरक उखान
(मत्ति १३:३३)
20येसुले फेरि कहल्के, “पर्मेसोरक राज्येका हम कथिसङ तुलना करुँ? 21उ त रोटि फुलाइलाहार खमिर जक्या स्यो, जक्रा एगो जनिले तिन पाथि अँटाम घालिक सोन्छे त उ सभे अँटा फुल्छे।”
साँक्र मुह्रा
(मत्ति ७:१३-१४)
22तब येसु गाँ-गाँ आ सहर-सहरम ढुकिक मानुकसिका पर्मेसोरक बचन सिखाइति यरुसलेम जाइ लग्ले। 23जाइत खुमा एक जना मानुकले येसुका पुछल्के, “हे प्रभु, कथि कनेके मानुकले मत्रे मुक्ति पाइतो?”
24येसुले जबाफ देति ओकर्सिका कहल्के, “साँक्र मुह्रास भित्रि ढुक लागि कोसिस कर् किरकि थुप्रे मानुकसब ओइम ढुक लागि कोसिस कर्तो तर नाइ सक्तो। 25जब घरक मालिकले उठिक केबारिका बन् कर्तो त तोर्स्या बाहारम ठेर्याइक एनामे कहति केबारिका ढक्ढकाइब, ‘हे प्रभु, हमर्सिक लागि केबारि खोलि देन।’ तर ओइले तोर्सिका कहतो, ‘तोर्स्या कतस आइल स्या? हम तोर्सिका नाइ चिन्स्यो।’ 26उजुमा तोर्स्या एनामे कहब, ‘हमर्स्या तोरेसङ बेठिक खेल्यो-पिल्यो आ तुइं हमर्सिक गाँ-घरम सिछ्या दिअक।’ 27तर घरक मालिकले फेरि जबाफ देति एनामे कहतो, ‘तोर्स्या कतस आइल स्या? हम तोर्सिका नाइ चिन्स्यो। ए पाप कर्लाहारसब तोर्स्या हम्रलगस गइहाल।’#भजन ६:८ 28अनि जब तोर्स्या अब्राहाम, इस्हाक, याकुब आ सभे अगमबक्तासिका पर्मेसोरक राज्येम देख्ब तर तोर्स्या आप्न चाहिं बाहारम फेकाइल पाइब त उजुमा कान्ति दाँतका कट्कटाइब।#मत्ति २२:१३; २५:३० 29उ दिन् पिर्थिबिक चारोभरस मानुकसब आइक पर्मेसोरक राज्येम भोज खाइ लागि बेठ्तो। 30तर तोर्स्या यि जान् कि अगा भेल्हारसब पछा हेतो आ पछा भेल्हारसब अगा हेतो।”#मत्ति १९:३०; २०:१६; मर्कुस १०:३१
येरुसलेम सहरका सम्झिक येसु दुखि भेल
(मत्ति २३:३७-३९)
31ओहे जुमा कुन्हुँ-कुन्हुँ फरिसिस्या येसुका आइक कहल्के, “तुइं अइलगस निक्लिक जो किरकि हेरोद एन्टिपासले तोरा मार खोज्ति छो।”
32तर येसुले ओकर्सिका कहल्के, “जाइक उ नर्ह्या जक्या चलाक मानुकका एनामे कहि धि, ‘आजु आ कालु हम मानुकसिस भुतसिका भगाइबो आ रोगिसिका अस्लि कर्बो अनि पर्सु चाहिं हम्र काम पुरा हेतो।’ 33तर आजु कालु आ पर्सु चाहिं हम्रा यरुसलेम पुग लागि हिंठ्ति रह पर्तो किरकि कुन्हुँ अगमबक्ताक हत्या यरुसलेमस बाहारम हब नाइ सक्तो।
34“ए यरुसलेम सहरक मानुकसब, तोर्स्या अगमबक्तासिका मार्छ आ जकर्सिका हम तोर्सिलग पठाइ स्यो ओकर्सिका पाखन हान्छ। जेनामे मुर्गाले आप्न बच्चासिका पाँखक तरम घुसारिक राख्छो, ओनाहिमे हम तोर्सिका कतेक बाजि घुसारिक राख खोज्ल्यो तर तोर्स्या नाइ मान्ल। 35ओहेस ए यरुसलेम सहरक मानुकसब पर्मेसोरले तोर्सिका छोरि देल छो। हम तोर्सिका कह स्यो, जखन तलिक तोर्स्या, ‘पर्मेसोरक नामम आइलाहार धन्येक स्यो’ नाइ कहब तखन तलिक हम्रा नाइ देख्ब।”#भजन ११८:२६
Đang chọn:
लुका 13: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
