लुका 10
10
येसुले आरो बहतर जना चेलासिका पठाइल
1ओक्र पछास प्रभु येसुले आरो बहतर जना#10:1 बहतर जना : गिरिक भसाम बहतर जना भेल कारनस अइम पनि ओहे अन्सार छो। चेलासिका छानिक आप्न जाइ खोज्ल गाँ आ सहरम आप्नस अगा दुइ-दुइ जना करिक पठाब जुमा, 2येसुले ओकर्सिका एनामे कहल्के, “खेतम पक्ल बालि त थुप्रे छो तर काट्लाहार मानुकसब चाहिं कनेके छो। ओहेस काट्लाहार मानुकसब पठाइदे कहिक पर्मेसोरका पर्थना कर्।#मत्ति ९:३७-३८ 3आब् तोर्स्या जो। देख्, हम तोर्सिका एगो भेराका नर्ह्यासिक बिचम पठाइले जक्या पठाइति स्यो। 4तोर्स्या आप्न लागि ढेवा, झोला, जुत्ता कथ्यो नाइ बोक आ पैराम कक्राहु गोर नाइ लाग्ह्य।#मत्ति १०:७-१५; मर्कुस ६:८-११; लुका ९:३-५ 5तोर्स्या कक्रो घरम जेब त सुरुम एनामे कह्य, ‘यि घरम सान्ति हब्ति रहुस।’ 6ओइ घरम कुन्हुँ सान्ति मन पराइलाहार रहतो त तोर्सिक सान्ति ओकर्सिसङ रहतो। तर सान्ति मन पराइलाहार मानुक नाइ रहतो त उ सान्ति फेरि तोर्सिएलग घुमिक एतो। 7तोर्स्या जुन घरम अगा रहब, घर नाइ बद्लिक ओहे घरम रह्य। अनि खाइ लागि जे देतो ओहे खाह्य किरकि काम कर्लाहारले जेला पाब पर्तो।#१ कोरन्थि ९:१४; १ तिमोथि ५:१८ 8एनाहिमे तोर्स्या कुन्हुँ सहरम जेब आ ओइलगक मानुकस्या तोर्सिका स्वागत करिक जे कारिक देतो ओहे खाह्य। 9अनि रोगि-बिरामिसिका अस्लि कर्ह्य आ ओइ सहरक मानुकसिका कह्य, ‘पर्मेसोरक राज्ये तोर्सिक लगम आइल छो।’ 10तर जुन सहरक मानुकस्या तोर्सिका स्वागत नाइ कर्तो उ सहरक मुल पैराम जाइक एनामे कह्य,#पेरेरित १३:५१ 11‘हमर्सिक टाङम लग्ल तोर्सिक सहरक धुराका हमर्स्या तोर्सिक बिरोधम झार्स्यो। तैयो तोर्स्या यि जान कि पर्मेसोरक राज्ये तोर्सिक लगम आइसक्ल छो।’ 12हम तोर्सिका कह स्यो, फैसला दिन् उ सहरक मानुकसिस त बरु सदोम सहरक#10:12 सदोम सहरका पापस भोर्ल सहर कहिक चिनेक। उत्पति १९:२४-२८ मानुकसिक दुख सह सक्लाहार हेतो।#उत्पति १९:२४-२८; मत्ति ११:२४; १०:१५
बिस्वास नाइ कर्लाहार सहर
(मत्ति ११:२०-२४)
13“ए खोराजिन आ बेथसेदा सहरक मानुकसब तोर्सिका धिक्कार! किरकि जुन अचम्मक कामसब हम तोर्सिक सहरम कर्ल्यो, उ काम टुरोस आ सिदोन सहरम कर्ल रहते त ओइलगक मानुकस्या अगाहि बोरा पिन्हिंक आ छाउर लगाइक आप्न पापक पस्चताप कर्ते।#यसैया २३:१-१८; इजकिएल २६:१—२८:२६; योएल ३:४-८; आमोस १:९-१०; जकरिया ९:२-४ 14ओहेस सन्सारक फैसलाक दिन् तोर्सिस त बरु टुरोस आ सिदोन सहरक मानुकसिक दुख सह सक्लाहार हेतो। 15अनि ए कफर्नहुमक मानुकसब, कथि तोर्स्या सोर्ग पुग्बो कहिक सोच्छ? नाइ तोर्स्या त बरु नरकम जेब।”#यसैया १४:१३-१५
16तब येसुले चेलासिका कहल्के, “जुन मानुकले तोर्सिक बात सुन्तो ओइले हम्र बात सुन्तो। अनि तोर्सिका इन्कार कर्लाहारले हम्रा इन्कार कर्तो आ हम्रा इन्कार कर्लाहारले चाहिं हम्रा पठाइलाहारका इन्कार कर्तो।”#मत्ति १०:४०; मर्कुस ९:३७; लुका ९:४८
बहतर जना चेलासब घुमिक एल
17ओक्र कन्हेक दिन् पछास येसुले पठाइल बहतर जना चेलासब घुमिक एले अनि खुसि हब्ति येसुका कहल्के, “प्रभु, तोर नामम त भुतसब पनि हमर्सिक अधिनम एलो।”
18तब येसुले ओकर्सिका कहल्के, “हम सैतानका#10:18 सैतान : सभे भुतसिक हाकिमका सैतान कहछे। सोर्गस बिज्लि जक्या खस्त देख्ल्यो। 19हम तोर्सिका साँप आ बिच्छिसिका जाँत्लाहार अनि दुस्मनसिक सभे सक्तिका जित्लाहार अधिकार देल स्यो। ओहेस कथ्योले तोर्सिक हानि कर नाइ सक्तो।#भजन ९१:१३ 20तैयो भुतसब तोर्सिक अधिनम आब्छो कहिक नाइ लबर्। बरु तोर्सिक ना सोर्गम निखाइल छो कहिक लबर।”
येसुले आप्न सोर्गक बापका धन्येबाद देल
(मत्ति ११:२५-२७)
21ओहे जुमा येसु पबित्र आत्मास खुसि भइक एनामे कहल्के, “गे बाप, सोर्ग आ पिर्थिबिक प्रभु, हम तोरा धन्येबाद देस्यो। किरकि तुइं बुद्धिमान आ चलाक मानुकसिस घुसारिक राख्ल बात यि कथ्यो नाइ जान्लाहार मानुकसिका बुझाइ धिल किरकि गे बाप, तोरा एहे कर अस्लि लग्लो।
22“हम्र बापले हम्रा सभे चिजक जिम्मा देल छो। बेटा कोन स्यो कहिक बापले मत्रे चिन्छो आ बाप कोन स्यो कहिक बेटाले मत्रे चिन्छो। अनि बेटाले आप्न इच्छास जकर्सिका बापका चिनाइ देल छो ओकर्स्या मत्रे चिन्छो।”#युहन्ना ३:३५; १०:१५
23तब येसु आप्न चेलासिभर घुम्ले आ ओकर्सिका मत्रे सुटुक्के कहल्के, “यि बात देख पाइलाहार तोर्स्या कत्का धन्ये स्या। 24हम तोर्सिका कह स्यो, कतेक अगमबक्ता आ रजासिका तोर्स्या देख्ल आ सुन्ल बातसब देख आ सुन मन छले तर ओकर्स्या नाइ पाइल्को।”
अस्लि सामरिक खिसा
25एक दिन् एक जना पर्मेसोरक नियमका जान्लाहार धर्मगुरु येसुलग एले आ येसुका आप्न बातम फसाब लागि एना कहिक पुछल्के, “हे गुरु, सब्दिन रहलाहार जिबन पाब लागि हम्रा कथि कर पर्तो?”#मत्ति २२:३५-४०; मर्कुस १२:२८-३४
26येसुले जबाफ देति ओक्रा पुछल्के, “पर्मेसोरक नियमम कथि निख्ल छो? तुइं उ पह्रिक कथि बुझ्ल स्या?”
27ओइले उत्तर देति एनामे कहल्के, “तुइं परमप्रभु आप्न पर्मेसोरका आप्न पुरा मनस, आप्न पुरा परानस, आप्न पुरा सक्तिस आ आप्न पुरा बुद्धिस मयाँ कर् अनि आप्न परोसिका आप्ने जक्या मयाँ कर्।”#लेबि १९:१८; ब्यबस्था ६:५
28येसुले ओक्रा कहल्के, “तुइं ठिके कहल। ओनाहिमे कर् अनि तुइं सब्दिन रहलाहार जिबन पाइब।”#लेबि १८:५
29तर ओइले आप्न धर्मि देखाब लागि येसुका फेरि पुछल्के, “हम्र परोसि चाहिं कोन स्यो त?”
30येसुले ओक्रा जबाफ देति कहल्के, “एक जना मानुक यरुसलेम सहरस यरिहो सहर जाइति छले। जाइत खुमा ओक्रा डाकुस्या पक्रिक ओक्र सभे कथ्यो छिनल्के आ नाङ्टे बनाइक पिट्त-पिट्त अध्मर्व पारिक पैराइम छोरि देल्के। 31सन्जोगस एक जना पुजारि ओहे पैराबाक जाइति छले। जाइत खुमा ओइले उ अध्मर्व मानुकका देखिक दस्रो गरबाक गेले। 32एक घरिया पछास ओहे पैराबाक एक जना मन्दिरम सेबा कर्लाहार लेबि कुलक मानुक जाइति छले। ओहोले अध्मर्व मानुकका देखिक दस्रो गरबाक गेले। 33तर एक जना सामरिया पर्देसक मानुक ओहे पैराबाक जाइत खुमा उ अध्मर्व भेल मानुकलग पुग्ले। अनि उ अध्मर्व भेल मानुकका देखिक ओक्रा थुप्रे मयाँ लग्ले।#२ इतिहास २८:१५ 34ओहेस उ सामरि ओक्रलग गेले आ ओक्र घाबसिम जैतुनक तेल आ अङ्गुरक मध#10:34 तेल आ अङ्गुरक मध दबाइक रुपम घाबसिम लगाबेक। दुखाइल कम कर लागि तेल लगाबेक आ घाका पस्र नाइ दिअ लागि अङ्गुरक मधस सफा करेक। लगाइक पट्टि बाह्नि देल्के। अनि आप्न गधाम बेठाइक एगो धर्मसालाम लगाइल्के आ ओक्र स्याहार-सुसार करल्के। 35दस्रो दिन् उ सामरि ओइलगस जाइ खुमा धर्मसालाक मालिकका चाँनिक दुइगो डलर#10:35 चाँनिक दुइगो डलर दुइ दिनक जेला हबेक। दैक कहल्के, ‘एक्र देख्भाल कर् आ आरो खर्चा लग्तो त हम ओइभरस घुमिक आब्त खुमा तोरा तिरि देबो।’”
36जब खिसा सुनाइ सकल्के त पर्मेसोरक नियम जान्लाहार धर्मगुरुका येसुले पुछल्के, “तोर बिचारम उ तिन जनाभोरि कोन डाकुसिक हाथम पर्ल मान्खक परोसि भेलो?”
37ओइले उत्तर देल्के, “उ अध्मर्व भेल मानुकका मयाँ कर्लाहार।”
तब येसुले ओक्रा कहल्के, “जो तुहुँ ओनाहिमे कर्।”
येसु मरियम आ मार्थाक घरम गेल
38एक दिन् येसु चेलासिसङ जाइत खुमा एगो गाँमम पुग्ले। अनि ओइ गाँमक एगो मार्था कहलाहार जनिले येसुका आप्न घरम स्वागत करल्के।#युहन्ना ११:१ 39ओक्र मरियम कहलाहार एगो बहिन पनि छले। ओइले प्रभु येसुक टाङलग बेठिक येसुले कहल बचन सुन लग्ले। 40तर मार्था अस्करे सेबा-सत्कारक काम कर्त-कर्त लथ्वाइक येसुका आइक कहल्के, “हे प्रभु, तोरा हम्र चिन्ता नाइ छो झन? देख् त एतेरा काम छो तर हम्र बहिनले हम्रा अस्करे छोरि देल छो। एक बाजि हम्र बहिनका सघाब लागि कहि देन।”
41तर येसुले ओक्रा कहल्के, “गे मार्था, तुइं किर थुप्रे बातक बारेम चिन्ता आ फिक्रि कर्छ। 42किरकि मानुकका चाहिलाहार त एकेगो बात छो। ओहे मरियमले रोज्ल छो जुन ओक्रलगस कह्याहु छिनाइल नाइ जेतो।”
Đang chọn:
लुका 10: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
