पेरेरित 26
26
पावलले रजा अग्रिपाक अगाम आप्न बात कहल
1तब रजा अग्रिपाले पावलका कहल्के, “आब् तोरा आप्न पछम बज्लाहार अनुमति छो।” ओहेस पावलले आप्न हाथ पसारिक आप्न पछम एनामे बज लग्ले,
2“हे रजा अग्रिपा, यहुदिस्या हम्र उप्रिम जुन दोस लगाइल छो ओक्र बारेम आजु तोर अगाम आप्न पछम बज्लाहार मौका पाइल कारनस हम एक्दम खुसि स्यो। 3किरकि तोरा यहुदिसिक सभे चाल-चलन आ बाद-बिबाद भेल्हार बातक बारेम अस्लिमे थाहा छो। ओहेस हम तोरा बिन्ति कर्स्यो हम्र बात पुरा सुनि दे।
4“हम आप्न देस आ यरुसलेम सहरम पनि आप्ने यहुदि जातक बिचम हुर्कल स्यो। ओहेस हम्र बानि-बेहोरा केहेन छो कहिक सभे यहुदिसिका थाहा छो। 5किरकि हम अगा फरिसि कहलाहार कट्टर धार्मिक समुहक मानुक छल्यो। ओहे धर्मम कट्टर भइक आप्न जिबन बिताब्योक। यि बात ओकर्स्योका थाहा छो। ओकर्स्या चाहातो त यि बातक गबाहि दिअ सक्तो।#पेरेरित २३:६; फिलिप्पि ३:५ 6पर्मेसोरले हमर्सिक पुर्खासिका जुन बाचा कर्ल छलो हम ओहे बाचाम आस कर्ल कारन आजु हम्रा तोर्सिक अगाम एनामे ठेर्याब पर्ल छो। 7हमर्सिक बार कुलक सभे मानुकस्या ओहे बाचाका पाइलाहार आस करिक दिन-रात पर्मेसोरक सेबा कर्छो। हे रजा अग्रिपा, हमु ओहे आस कर्ल कारनस यहुदिस्या हम्रा दोस लागाइल छो। 8पर्मेसोरले मोर्ल मानुकसिका फेरि जिउँत कर सक्तो कहिक तोर्स्या किर बिस्वास नाइ कर्छ?
9“हबक त हमु अगा नासरतक येसुक बिरोधम थुप्रे बातसब कर पर्तो कहिक सोच्ल छल्यो।#पेरेरित ८:३; २२:४-५ 10ओहेस हम यरुसलेमम ओनाहिमे कर्ल्यो। अनि मुल पुजारिसिलगस अधिकार पाइक थुप्रे बिस्वासिसिका जेलम बन् कर्ल्यो। एत्के मत्रे नाइ, ओकर्सिका मार्त खुमा पनि हम सहमत देल छल्यो। 11हम थुप्रे बाजि सभाघरसिम जाइक येसुका बिस्वास कर छोर कहिक ओकर्सिका सजाए दिअ लगाइल्यो। हम ओकर्सिक बिरोधम पिटस एहेन आगि भेल छल्यो कि दस्रो देसक सहरम पनि जाइक ओकर्सिका सताब्योक।
पावलले आप्न जिबन बदल्लक बारेम कहल
(पेरेरित ९:१-१९; २२:६-१६)
12“ओहे धुनम हम एक बाजि मुल पुजारिसिक मार्फतस अधिकार आ अनुमतिक चिठि पाइक दमस्कस सहर जाइति छल्यो। 13जाइत खुमा, हे रजा अग्रिपा, बर्कि दिन् चहर्ल जुमा सोर्गस सुरुजस पनि धोगर इजोत हम्र आ हम्र सङ्सिक चारोभर चम्कलो। 14अनि हमर्स्या सभे जना जमिनम खस्ल्यो आ हिब्रु भसाम हम एनामे कहल अबाज सुन्ल्यो, ‘साउल, ए साउल, तुइं हम्रा किर सताइ छ? पैनाठिक टुप्पाम लात मार्ब त तोराहि दुखाइतो।’ 15तब हम पुछ्ल्यो, ‘हे प्रभु, तुइं कोन स्या?’ अनि प्रभुले हम्रा कहल्को, ‘हम येसु स्यो, जक्रा तुइं सताइ छ। 16तर आब् तुइं उठ् आ आप्न टाङम ठेर्या। किरकि हम तोरा आप्न सेबक आ हम्र बारेम गबाहि देल्हार बनाब लागि तोरलग देखा पर्ल स्यो। ओहेस तुइं अखन देख्ल यि बातक आ पछास हम तोरा देखाइलाहार सभे बातक गबाह हेब। 17हम तोरा यहुदि आ दस्रो जातक मानुकसिक बिचम पठाइबो तर हम तोरा ओकर्सिक हाथस बचाइबो। 18तुइं ओकर्सिक आँखका खुजालिक अँन्हारस इजोतम आ सैतानक बन्धनस छुटाइक पर्मेसोरभर घुमाइक आन्ब, जक्र कारनस ओकर्स्या आप्न पापक छेमा पाइतो आ हम्रा बिस्वास कर्ल कारनस पबित्र भेल मानुकसिसङ रह पाइतो।’
पावलले आप्न कामक बारेम कहल
19“ओहेस हे रजा अग्रिपा, सोर्गिय दर्सनक आग्याका बिना पालन करिक हम रहि नाइ सक्ल्यो। 20हम सभेस अगा दमस्कसम आ यरुसलेमम अनि यहुदिया पर्देसभोरि रहलाहार सभे यहुदिसिका आ दस्रो जातक मानुकसिका पनि पस्चताप करिक पर्मेसोरभर घुमिक या कहिक पर्चार कर्ल्यो। अनि पस्चताप कर्ल बात आप्न कामस देखाब पर्तो कहिक सिखाइल्यो। #पेरेरित ९:२०,२८,२९ 21एहे कारन यहुदिस्या हम्रा मन्दिरम पक्रिक मार खोज्ल छलो। 22तर आजु तलिक पर्मेसोरले हम्रा सहयोग कर्ल छो। ओहेस हम अइलग ठेर्याइक कन्कि-बर्कि सभे मानुकसिक अगाम गबाहि देति स्यो। हम अगमबक्तास्या आ मोसाले जे-जे बातसब पुरा हेतो कहिक कहल छो ओहे मत्रे पर्चार कर्ल स्यो। 23ओकर्स्या यि कहल छलो कि खिरिस्टले थुप्रे दुख भोगिक मोर्तो। अनि मोरिक फेरि जिउँत भेल्हार सभेस अग्ला भेल कारनस ओइले पर्मेसोरक मुक्तिक इजोत यहुदि आ दस्रो जातक मानुकसिका घोसना कर्तो।”#१ कोरन्थि १५:२०; यसैया ४२:६; ४९:६
24पावलले आप्न बचाउम यि बातसब कहति-कहति फेस्तसले कस्याइक एनामे कहल्के, “ए पावल, तुइं बौलाहि सक्ल स्या। तोर थुप्रे ग्यानले तोरा बौलाहा बनाइल छो।”
25तर पावलले कहल्के, “हे आदरनिय फेस्तस, हम बौलाहिल नाइ स्यो। हम एक्दम ठिक स्यो आ साँच्चेक बात कहति स्यो। 26यि बातक बारेम रजा अग्रिपाका पनि थाहा छो। ओहेस हम ओक्र अगाम बिना डेराइक कहति स्यो। हम्रा पुरा बिस्वास छो कि रजा अग्रिपाका यि घट्नाक बारेम एगो-एगो बातसब थाहा छो किरकि यि घट्ना घरक एगो कोनम घट्ल नाइ स्यो। 27हे रजा अग्रिपा, कथि तुइं अगमबक्तासिका बिस्वास कर्छ? हम्रा थाहा छो कि तुइं बिस्वास कर्छ कहिक।”
28तब रजा अग्रिपाले कहल्के, “कथि तुइं हम्रा एके घरियाम खिरिस्टियन बनाब सक्बो कहिक सोच्छ?”
29तब पावलले एनामे जबाफ देल्के, “एके घरियाम हउस कि थुप्रे घरियाम, तुइं मत्रे नाइ जतेक जनाले आजु हम्र बात सुन्ति छो ओकर्स्या हम्रे जक्या हउस कहिक हम पर्मेसोरसङ पर्थना कर्स्यो। तर हम्र जक्या चाहिं जिजिरस नाइ बन्हाँउस।”
30एत्केम रजा अग्रिपा, बर्कि हाकिम फेस्तस, बर्निकि आ ओकर्सिसङ बेठ्ल सभे जना जुरुक्के उठ्ले। 31अनि निक्लिक जाइत खुमा आपसम एना कहिक बात करल्के, “यि मानुकले त एक्रा मारि पर्लाहार आ जेलम बन् कर पर्लाहार खालक कुन्हुँ गलत काम कर्ल नाइ छो।” 32तब रजा अग्रिपाले फेस्तसका कहल्के, “यि मानुकले रोमि माहारजालग आप्न फैसलाक लागि बिन्ति कर्ल नाइ रहते त एक्रा छोरि देते तैयो हेते।”
Đang chọn:
पेरेरित 26: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
