पेरेरित 20
20
पावल माकेडोनिया आ गिरिस देसम
1जब हुल-दङ्ङा सान्त भेले त पावलले बिस्वासिसिका बलाइक ओकर्सिका हौसला देल्के। अनि ओकर्सिलगस छुटिक माकेडोनिया पर्देस गेले। 2अनि ओइलगक सभे ठावम जाइक बिस्वासिसिका हौसला देल्के आ गिरिस देस गेले। 3ओइलग उ तिन महिना रहले। तर जब पावल ओइलगस पानि जाहाजम चर्हिक सिरिया देस जाइ खोज्ल छले त यहुदिस्या ओक्रा मार लागि सल्लाहा कर्ल बात ओइले थाहा पाइक फेरि माकेडोनियाबाक गेल्हार फैसला करल्के। 4पावल ओइलगस जाइत खुमा बेरिया सहरक पुरसक बेटा सोपातोरोस, थेस्लोनिका सहरक अरिस्तार्खस आ सिकन्दस, डर्बि सहरक गायस आ तिमोथि अनि एसिया पर्देसस आइल तुखिकस आ तोरोफिमस पनि ओक्रसङ गेले। 5ओकर्स्या हमर्सिस अगाहि तोरोआस सहरम पुगिक हमर्सिका अस्याइल छलो। 6तर हमर्स्या चाहिं खमिर नाइ घाल्ल रोटि खाइलाहार पब्नि मनाइक फिलिप्पि सहरस पानि जाहाजम चहर्ल्यो। अनि पाँच दिन् पछा तोरोआस सहरम ओकर्सिलग पुग्ल्यो। ओइलग हमर्स्या एक हप्ता रहल्यो।
पावलले मोर्ल छउँराका जिउँत कर्ल
7जब हमर्स्या हप्ताक अग्ला दिन् प्रभु भोज खाइ लागि ओइलगक बिस्वासिसिसङ धेर्याइल छल्यो त पावल अधा रात तलिक ओकर्सिसङ बज्ति रहलो। किरकि पावल दस्रो दिन् बिहानि ओइलगस जाइबला छलो। 8हमर्स्या धेर्याइल उपरका तलाक कोठाम थुप्रे दिब्यासब बर्ति छलो। 9ओइ कोठाक झ्यालम युटिकस कहलाहार एक जना छउँरा बेठ्ल छलो। पावल बज्ति-बज्ति उ छउँरा निनस झुल लग्लो। एनामे झुल्ति-झुल्ति उ मस्त निनाइक तिन तल्लास खस्लो। अनि मानुकस्या जाइक ओक्रा उठाइत खुमा उ छउँरा मोरि सक्ल छलो। 10तर पावल तर् जाइक घोप्टिया परिक ओक्रा होकार बाह्नल्को आ ओइलग भेल सभे मानुकसिका एनामे कहल्को, “तोर्स्या नाइ डेरा किरकि यि छउँरा जिउँते छो!” 11पछास ओकर्स्या फेरि उपरका तलाम गेले आ सभे जना मिलिक प्रभु भोज खेल्के। अनि बिहान नाइ भेल तलिक पावलले ओकर्सिसङ बात-चित कर्ति रहले। जब बिहान भेले त पावल ओइलगस गेले। 12उ छउँराका जिउँत भेल देकिक ओइलगक बिस्वासिसब एक्दम खुसि भेले। अनि ओकर्स्या ओक्रा आप्न घर पुगाइ देल्के।
तोरोआस सहरस मिलेटस गेल
13तब हमर्स्या तोरोआस सहरस पानि जाहाजम चर्हिक अस्सोस सहर गेल्यो। ओइलग पावलका पनि पानि जाहाजम चर्हाब लागि सल्लाहा भेल छलो। किरकि पावलले ओइलग तलिक पैदल गेल्हार योजना बनाइल छलो। 14ओहेस जब पावलले हमर्सिका अस्सोस सहरम भेटाइल्को त हमर्स्या ओक्रा पानि जाहाजम चर्हाइल्यो आ मितेलेने सहर गेल्यो। 15दस्रो दिन् हमर्स्या ओइलगस पानि जाहाजम चर्हिक खियस टापुक लगम पुग्ल्यो आ तेस्रो दिन् सामोस टापुम पुग्ल्यो। अनि ओक्र दस्रो दिन् चाहिं मिलेटस सहर पुग्ल्यो। 16तर पावलले एसिया पर्देसम समै बिताइलाहार मन नाइ कर्ल कारनस एफिसस सहरम नाइ ढुक्लाहार फैसला करल्को। किरकि ओइले सक्भर झप्सिन पेन्तिकोसक पब्निक दिन् यरुसलेम पुग्लाहार मन कर्ल छलो।
पावलले एफिसस सहरक अगुवासिसङ भेट् कर्ल
17ओहेस पावलले मिलेटस सहरेम एफिसस सहरक मन्डलिक अगुवासिका भेट या कहिक खबर पठाइल्के। 18अनि ओकर्स्या एले त पावलले ओकर्सिका एनामे कहल्के, “जुन दिन् हम एसिया पर्देसम आइल छल्यो उ दिनस लइक आजु तलिक तोर्सिसङ रहत खुमा हम्र बेबहार केहेन छलो उ सभे तोर्सिका थाहा छिति छो। 19यहुदिस्या हम्रा घरि-घरि दुख दैक सताइत खुमा पनि हम नम्र भइक आँखिस लोर चुवाइति प्रभुक सेबा कर्ल्यो। 20तोर्सिका भलाइ भेल्हार बात कह लागि हम कखन्यो पछा नाइ हट्ल्यो। बरु हम सभेक अगाम आ घर-घरम जाइक तोर्सिका उ बातसब सिखाइल्यो। 21हम यहुदि आ दस्रो जातक सभे मानुकसिका आप्न पापक पस्चताप करिक पर्मेसोरभर घुमिक या आ आपन्सिक प्रभु येसु खिरिस्टक उप्रिम बिस्वास कर् कहिक पर्चार कर्ल स्यो। 22आब् हम पबित्र आत्माले कहल अन्सार यरुसलेम जाइति स्यो। ओइलग हम्रसङ कथि हेतो उ हम्रा थाहा नाइ छो। 23तर हम्रा एतेक थाहा छो कि हम जुन सहरम जेबो तैयो ओइलग हम्रा सताबट आ जेलक दुख भोग पर्तो कहिक पबित्र आत्माले कहल छो। 24तर हम आप्न जिबनका कुन्हुँ मोलक नाइ सम्झ स्यो। हम त एत्के मत्रे चाहास्यो कि पर्मेसोरले मानुकसिका कर्ल किर्पाक बारेम खुसिक खबर सुनाइलाहार काम पुरा कर सकुँ, जुन काम प्रभु येसुले हम्रा कर लागि कहल छो।#२ तिमोथि ४:७
25“हम्रा यि बात थाहा छो कि तोर्सिभोरि जक्रा-जक्रा हम पर्मेसोरक राज्येक बारेम सुनाइल्यो तोर्स्या आब् हम्रा कह्याहु देख नाइ पाइब। 26ओहेस आजु हम तोर्सिका गबाहि देति कह स्यो तोर्सिभोरि कुन्हुँ नास हेतो त ओक्र दोस हम्रा नाइ लग्तो। 27किरकि हम पर्मेसोरक सभे योजनाक बारेम तोर्सिका कहि सक्ल स्यो। 28ओहेस आब् तोर्स्या आप्न आ पबित्र आत्माले तोर्सिका जुन बिस्वासिसिक अगुवा बनाइल छो ओकर्सिक देख्भाल कर्। अनि पर्मेसोरम बिस्वास कर्लाहार मानुकसिक अस्लि चर्भा बन्। किरकि पर्मेसोरले ओकर्सिका आप्न बेटाक रकतस किन्ल छो। 29हम्रा थाहा छो कि हम अइलगस जेबो त झुठा सिछ्या सिखाइलाहार डर लग्लाहार नर्ह्या जक्या मानुकसब तोर्सिक बिचम एतो आ बिस्वासिसिका एक्दम सताइतो। 30तोर्सिएक बिचस पनि झुठा सिछ्या सिखाइलाहार मानुकसब निक्लिक एतो आ बिस्वासिसिका भरमम पारिक गलत पैराम लगाइतो। 31ओहेस तोर्स्या होसियार रह आ हम तिन बरिस तलिक दिन-रात लोर चुवाइ-चुवाइक तोर्सिका सिखाइल बातका याद राख्।
32“आब् हम तोर्सिका पर्मेसोर आ ओक्र किर्पास भोर्ल बचनक जिम्माम सुम्पि देस्यो, जुन बचनले तोर्सिका बिस्वासम जोर्गर बनाब सक्तो आ पबित्र कर्ल मानुकसिसङ आसिकक हक्दार बनाब सक्तो। 33हम कुन्हुँ मान्खक सोन, चाँनि आ कप्रासिक लोभ नाइ कर्ल्यो। 34तोर्सिका यि बात थाहा छो कि हम आप्ने हाथस मेहेनत करिक आप्न आ हम्रसङ भेल्हार्सिक खाँचो पुरा कर्ल स्यो कहिक। 35हम सभे बातम तोर्सिक लागि एगो उदाहरन बनिक देखालइ स्यो, ताकि तोर्स्याहु ओनाहिमे मेहेनत करिक कम्जोर मानुकसिका सहयोग कर्। अनि प्रभु येसुले कहल बचनका याद राख्, जुन बचन प्रभुले आप्नि एनामे कहल छो, ‘लेल्हारस त देल्हार धन्येक स्यो।’”
36एतेक कहिक पावलले ठेउन्या मारल्के आ ओकर्सिसङ मिलिक पर्थना करल्के। 37तब ओइलगक बिस्वासिसब एक्दम कान्ले आ पावलका होकार बाह्निक चुम्मा लेल्के। 38पावलले ओकर्सिका “आब् तोर्स्या हम्रा फेरि कह्याहु देख नाइ पाइब” कहिक कहल कारनस ओकर्स्या एक्दम दुखि भेले। अनि ओकर्स्या पावलका पानि जाहाज तलिक पुगाइ देल्के।
Đang chọn:
पेरेरित 20: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
